తిరుమల దర్శనానికి వెళ్తున్నారా..? అయితే ఈ విషయాన్ని గమనించండి

కలియుగ ప్రత్యక్షదైవం తిరుమల శ్రీవారి దర్శనానికి వెళ్తున్నారా..? అయితే మీకో అలర్ట్. ప్రస్తుతం తిరుమలలో భక్తుల రద్దీ ఎక్కువగా ఉంది. ఎస్‌ఎస్‌డీ టోకెన్లు లేకుండా తిరుమల వచ్చిన భక్తులకు శ్రీవారి సర్వదర్శనానికి దాదాపు 10 గంటలు పడుతోంది. ఈ మేరకు టీటీడీ అధికారులకు భక్తులకు అలర్ట్ జారీ చేశారు. రూ.300 టికెట్లు కలిగిన భక్తుల దర్శనానికి కూడా కాస్త సమయం పడుతోంది. ఆ టికెట్లు కలిగిన భక్తుల శ్రీవారి దర్శనానికి మూడు గంటలు పడుతోంది. వీకెండ్ కావటంతో తిరుమలలో భక్తుల రద్దీ పెరిగిందని టీటీడీ అధికారులు వెల్లడించారు. కాబట్టి దర్శనానికి వచ్చే భక్తులు ఈ విషయాన్ని గమనించాలన్నారు. కాగా, శుక్రవారం శ్రీవారిని 63,731 మంది భక్తులు దర్శించుకున్నట్లు అధికారులు తెలిపారు. భక్తుల హుండీ కానుకల ద్వారా రూ.3.94 కోట్ల ఆదాయం వచ్చిందని చెప్పారు.

కాణిపాకంలోనూ భక్తుల రద్దీ..

ఇక కాణిపాకం శ్రీ వరసిద్ధి వినాయకస్వామి వారి ఆలయంలోనూ భక్తుల రద్దీ ఎక్కువగా ఉన్నట్లు ఆలయ అధికారులు ప్రకటించారు. సాధారణ, అయ్యప్ప భక్తులతో శనివారం ఆలయం కిటకిటలాడింది. ఉదయం నుంచి భక్తులు స్వామివారి దర్శనానికి క్యూలైన్లలో భారీగా బారులు తీరారు. దర్శనానికి సుమారు నాలుగు గంటల సమయం పట్టింది. నేడు కూడా భక్తులు అధిక సంఖ్యలో ఆలయానికి వచ్చే అవకాశం ఉంది. ఈ విషయాలను భక్తులు గమనించాలని కాణిపాకం దేవస్థానం అధికారులు సూచించారు.

తిరుచానూరులో బ్రహ్మోత్సవ సందడి

తిరుచానూరు శ్రీపద్మావతి అమ్మవారి కార్తిక బ్రహ్మోత్సవాలు ఈనెల 28 నుంచి ప్రారంభం కానున్నాయి. భక్తుల కొంగుబంగారంగా విరాజిల్లుతున్న ఆలయంలో ఈ మేరకు ఏర్పాట్లు శరవేగంగా కొనసాగుతున్నాయి. ఇప్పటికే ఆలయంలో లైటింగ్ పనులు దాదాపుగా పూర్తయ్యాయి. అమ్మవారి గాలిగోపురం, పద్మ సరోవరం ప్రస్తుతం నయనానందకరంగా అద్భుతంగా కనిపిస్తోంది.

ఉద్యాన వనంలో అలంకరణ ఏర్పాట్లు చురుగ్గా జరగుతున్నట్లు ఆలయ అధికారులు తెలిపారు. నమూనాలు పూర్తిస్థాయిలో మంగళవారం రాత్రికి ఏర్పాటు చేయనున్నట్లు చెప్పారు. బ్రహ్మోత్సవాల ఏర్పాట్లను శ్రీవారి భక్తులు తిలకించి ఆనందిస్తున్నారు. క్యూలైన్లు, షెడ్లు, పందిళ్ల నిర్మాణం ఏర్పాటు పనులు చురుగ్గా జరుగుతున్నాయి. టీటీడీ ఈవో శ్యామలరావు, జేఈవో వీరబ్రహ్మం ఇతర అధికారులు ఏర్పాట్లను పరిశీలించారు. భక్తులకు ఎటువంటి అసౌకర్యం కలగకుండా ఏర్పాట్లు చేస్తున్నట్లు అధికారులు తెలిపారు.