హెచ్-1బీ వీసా లిమిట్‌పై అప్‌డేట్.. అమెరికా కీలక ప్రకటన

భారతీయులు సహా పలు దేశాలకు చెందినవారు ఎంతో ఆసక్తిగా ఎదురుచూసే హెచ్‌-1బీ వీసాలకు సంబంధించి అమెరికా కీలక అప్‌డేట్‌ ఇచ్చింది. 2025 ఆర్థిక సంవత్సరానికి నిర్దేశించిన వీసాల కోసం తగినన్ని దరఖాస్తులు వచ్చినట్లు అమెరికా సిటిజన్‌షిప్ అండ్ ఇమిగ్రేషన్‌ సర్వీసెస్ విభాగం వెల్లడించింది. హెచ్‌-1బీ పొందని పిటిషనర్లకు మరికొన్ని రోజుల్లో ఆన్‌లైన్‌లో సమాచారం అందిస్తామని తెలిపింది. వీటిని పంపడం పూర్తైన తర్వాత.. ఎంపిక కాని వారికి స్టేటస్‌ మెసేజ్‌ను ఆన్‌లైన్‌లోనూ అందుబాటులో ఉంచుతామని స్పష్టం చేసింది.

 ‘‘2025 ఆర్ధిక సంవత్సరానికి హెచ్‌-1బీ వీసా పిటిషన్‌ దాఖలు ప్రక్రియ జూన్‌ 30, 2024తోనే ముగిసింది.. అయితే, 30వ తేదీ ఆదివారం కావడంతో జులై 1న దాఖలైన పిటిషన్లను కూడా గడువులోగా చేసినట్లుగానే పరిగణిస్తాం.. కానీ, వీసా పరిమితి నుంచి మినహాయింపు కలిగిన పిటిషన్ల స్వీకరణ, పరిశీలన కొనసాగుతుంది.. ముఖ్యంగా హెచ్‌-1బీ వీసాతో అమెరికాలో పనిచేస్తున్న నిపుణుల ఉద్యోగ నిబంధనలు, సంస్థ మార్పు వంటి తదితర కారణాలతో దాఖలు చేసే పిటిషన్ల స్వీకరణ కొనసాగుతుంది’’ అని యూఎస్‌సీఐసీ పేర్కొంది.

మార్చి 6న హెచ్-1బీ వీసా రిజిస్ట్రేషన్ ప్రక్రియ ప్రారంభమై... దానిని మార్చి 25 వరకు ఉంటుందని యూఎస్‌సీఐఎస్ ఈ ఏడాది ఆరంభంలో ప్రకటించింది. తర్వాత దానిని మళ్లీ పొడిగించింది. ‘‘ప్రస్తుత హెచ్‌-1బీ వీసా ఉద్యోగి అమెరికాలో ఉండగలిగే సమయాన్ని పొడిగింపునకు దాఖలు చేసిన పిటిషన్‌లను మేము ఆమోదించి, ప్రాసెస్ చేయడం కొనసాగిస్తాం’’ అని తెలిపింది.

అంతర్జాతీయ, విదేశీ వృత్తి నిపుణుల సేవలను వినియోగించుకోవాలని భావించే అమెరికా కంపెనీలు తాత్కాలికంగా వీసాలను స్పాన్సర్‌ చేస్తుంటాయి. ఇందుకోసం ఏటా 85 వేల హెచ్‌-1బీ వీసాలను అమెరికా జారీ చేస్తుంది. ఇందులో 65 వేలు రెగ్యులర్‌ క్యాప్‌ కింద కాగా.. మరో 20 వేల వీసాలను తమ దేశంలో అడ్వాన్స్‌ డిగ్రీలు చేసిన వారికి మాత్రమే ఇస్తుంది. హెచ్-1బీ వీసాలు ఎక్కువగా పొందుతున్నవారిలో భారతీయులు ఉన్నారు.అయితే, గూగుల్‌, ఇన్ఫోసిస్‌, అమెజాన్‌, ఐబీఎం వంటి దిగ్గజ సంస్థలు 2023 అక్టోబరు 1 నుంచి 2024 సెప్టెంబరు 30 మధ్య ఈ వీసాలను ఇటీవల తగ్గించుకుంటున్నట్లు గణాంకాలు వెల్లడిస్తున్నాయి. 2023 ఆర్ధిక సంవత్సరంలో మొత్తం 3,86,000 వీసాలను జారీచేయగా... ఇందులో భారతీయులే 72.3 శాతం ఉండటం గమనార్హం. ఆ తర్వాత 11.7 శాతంతో చైనీయులు రెండో స్థానంలో ఉన్నారు.