గోడకు అంటించిన అరటిపండుకు రూ.52 కోట్లు

సాధారణంగా మార్కెట్లో డజన్ అరటిపండ్లు రూ.50 నుంచి రూ.70కి దొరుకుతాయి. కానీ ఈ అరటిపండు ధర మాత్రం ఏకంగా రూ.52 కోట్లు. పైగా దీన్ని వేలంలో పోటీ పడి మరీ గెలుచుకోవడం గమనార్హం. గోడకు అంటించి ఉన్న ఈ అరటిపండు కోసం నిర్వహించిన ఈ వేలంలో ఓ వ్యక్తి రూ.52 కోట్లు పెట్టి కొనుగోలు చేయడం ఇప్పుడు సర్వత్రా చర్చకు దారి తీస్తోంది. అమెరికాలోని న్యూయార్క్‌లో నిర్వహించిన వేలంలో బనానా ఆర్ట్ వర్క్‌ రూ.52 కోట్లు పలికింది. దీంతో ఆ బనానా టేప్ అందర్నీ ఆశ్చర్యంలో ముంచెత్తింది. ఇంతకీ దాని స్టోరీ ఏంటంటే?

బనానా టేప్ మరోసారి వార్తల్లో హైలైట్‌గా నిలిచింది. ఈసారి ఈ బనానా టేప్ వేలంలో రూ.52 కోట్లు పలికింది. కమెడియన్‌ పేరుతో ఉన్న బనానా ఆర్ట్‌వర్క్‌ ఇప్పుడు అందరినీ ఆశ్చర్యానికి గురి చేస్తోంది. ఇటాలియన్‌ ఆర్టిస్ట్‌ మౌరిజియో కాటెలాన్‌ సృష్టించిన ఈ బనానా టేప్‌ను.. సోథ్‌బే అనే సంస్థ న్యూయార్క్‌లో వేలం నిర్వహించింది. ఈ వేలంలో క్రిప్టోకరెన్సీ ఫౌండర్ జస్టిన్‌ సన్‌ రూ.52 కోట్లకు ఆ బనానా టేప్‌ను దక్కించుకున్నారు. 2019లో తొలిసారి మియామి బీచ్ ఆర్ట్ బాసెల్‌లో ఈ అరటిపండు ఆర్ట్ వర్క్‌ను ప్రదర్శించారు. గోడకు ఒక అరటిపండును పెట్టి.. దాన్ని టేప్‌తో అతికిస్తూ ఉంటారు. ఈ ఆర్ట్ వర్క్‌లో భాగంగా ప్రతీ 3 రోజులకు ఒకసారి గోడకు అంటించిన అరటిపండును మారుస్తూ ఉంటారు. దీంతో అప్పటి నుంచి ఆ బనానా టేప్‌ను ఒక కళాఖండంగా భావించొచ్చా లేదా అనేది తీవ్ర చర్చనీయాంశంగా మారింది.

 ఇక అదే 2019లో ఆ బనానా టేప్‌ను వేలంలో ఉంచగా.. కళ్లు చెదిరే ధరకు విక్రయం అయింది. 5 ఏళ్ల క్రితం నిర్వహించిన ఆ వేలంలో 1.20 లక్షల డాలర్లు అంటే మన భారత కరెన్సీలో ఏకంగా రూ.98 లక్షలకు అమ్ముడుపోయింది. ఇక ఆ తర్వాత కూడా అదే ధరకు మరో బనానా టేప్‌ను కూడా విక్రయించారు. ఆ తర్వాత దీన్ని తయారు చేసిన ఇటాలియన్ ఆర్టిస్ట్ మౌరిజియో కాటెలాన్‌ దీని ధరను భారీగా పెంచేశారు. దీంతో తాజాగా నిర్వహించిన వేలంలో 6.2 మిలియన్‌ డాలర్లు అంటే మన కరెన్సీలో సుమారు రూ.52 కోట్లకు అమ్ముడుపోయి అందర్నీ ఆశ్చర్యంలో ముంచెత్తింది.

అయితే ఈ బనానా టేప్ కేవలం ఆర్ట్‌వర్క్‌ మాత్రమే కాదని దాన్ని వేలం వేసిన సోథ్ బే అనే సంస్థ వెల్లడించింది. ఆర్ట్‌, మీమ్స్‌, క్రిప్టో కరెన్సీ కలగలిసిన ప్రపంచాలను ఆ బనానా టేప్ ప్రతిబింబిస్తోందని పేర్కొంది. అంతేకాకుండా ఆ బనానా టేప్ భవిష్యత్తులో మరిన్ని ఆలోచనలను ప్రేరేపిస్తుందని దాన్ని కొనుగోలు చేసిన బిట్ కాయిన్ ఫౌండర్ జస్టిన్‌ సన్‌ వెల్లడించినట్లు సోథ్ బే ఒక ప్రకటనలో తెలిపింది. మరోవైపు.. పగలు, రాత్రి తేడా లేకుండా అద్భుతంగా కనిపించేలా వేసిన "ద ఎంపైర్‌ ఆఫ్‌ లైట్‌" పెయింటింగ్ న్యూయార్క్‌లోని క్రిస్టీస్‌ వేలంలో ఉంచగా.. 121 మిలియన్‌ డాలర్లు అంటే మన భారత కరెన్సీలో రూ.1021 కోట్లు పలికింది.