దక్షిణ కొరియాలో సైనిక పాలన విధింపు.. అధ్యక్షుడికి షాకిచ్చిన పార్లమెంట్

పొరుగు దేశం ఉత్తర కొరియా నియంత కిమ్ జోంగ్ ఉన్‌కు అనుకూలంగా ప్రతిపక్షాలు వ్యవహరిస్తున్నాయని ఆరోపిస్తూ దక్షిణ కొరియా అద్యక్షుడు యూన్ సుక్ యోల్ దేశంలో సైనిక పాలన విధించడం సంచలనంగా మారింది. దీనిపై ప్రజల నుంచి తీవ్ర వ్యతిరేకత రాగా.. వేలాదిగా ప్రజలు వీధుల్లోకి వచ్చి నిరసనలు తెలిపారు. ఈ క్రమంలో అధ్యక్షుడు యోల్ సైనిక పాలన నిర్ణయంపై వెనక్కి తగ్గారు. ఇదే సమయంలో మార్షల్ లా అమలును వ్యతిరేకిస్తూ చేపట్టిన తీర్మానాన్ని ఆ దేశ పార్లమెంట్ ఏకగ్రీవంగా ఆమోదించింది. దీంతో సైనిక పాలన చట్టవిరుద్ధమని స్పీకర్ ప్రకటించారు.

అయితే, అధ్యక్షుడి నిర్ణయం ఆయన పదవికే ఎసరు తెచ్చింది. యూన్‌ సుక్‌ యోల్‌ పై ఆ దేశ పార్లమెంట్‌లో ప్రతిపక్షాలు అభిశంసన తీర్మానం ప్రవేశపెట్టాయి. అభిశంసన నుంచి ఆయన గట్టెక్కాలంటే మూడింట రెండొంతుల సభ్యుల మద్దతు అవసరం. కనీసం ఆరుగురు రాజ్యాంగ న్యాయమూర్తులు దీనికి అనుకూలంగా ఓటు వేయాల్సి ఉంటుంది. మొత్తం 300 మంది సభ్యులున్న దక్షిణకొరియా పార్లమెంట్‌లో అధ్యక్షుడు అభిశంసనను గట్టెక్కాలంటే 200 మంది సభ్యుల మద్దతు పొందాల్సి ఉంటుంది.

ఈ తీర్మానం శుక్రవారం లోపు ఓటింగ్‌కు వచ్చే అవకాశం ఉందని డెమొక్రటిక్ పార్టీ సభ్యుడు కిమ్ యోంగ్-మిన్ పేర్కొన్నారు. ఇక, అధ్యక్షుడు తన నిర్ణయాన్ని వెనక్కి తీసుకున్నా.. పదవికి ఆయన రాజీనామా చేయాలని ప్రతిపక్షాలు డిమాండ్‌ చేస్తున్నాయి. అలాగే, దక్షిణ కొరియాలోని ముఖ్యమైన కార్మిక సంఘం సైతం రాజీనామాకు పట్టుబడుతోంది. ఈనేపథ్యంలో ‘మార్షల్‌ లా’ అమలును వ్యతిరేకిస్తూ తీర్మానం తీసుకురాగా.... పార్లమెంట్‌ ఏకగ్రీవంగా ఆమోదించింది.

మరోవైపు, యూన్‌ సుక్‌ యోల్‌ అధ్యక్ష పదవి నుంచి తప్పుకునే యోచనలో ఉన్నట్లు ఆయన సీనియర్‌ సలహాదారులు, కార్యదర్శులు వెల్లడించారు. 2022 యూన్ సుక్.. దక్షిణ కొరియా అధ్యక్షుడిగా ఎన్నికయ్యారు. అయితే, ఈ ఏడాది ఏప్రిల్‌లో జరిగిన పార్లమెంటట్ ఎన్నికల్లో యూన్‌కు చెందిన పీపుల్ పవర్ పార్టీ దారుణ పరాజయం చవిచూసింది. దీంతో పార్లమెంట్‌లో ఆయన పార్టీ బలం పడిపోయింది.

కొరియా ద్వీపకల్పం 1945లో ఉత్తర, దక్షిణ కొరియాలుగా విడిపోయిన సంగతి తెలిసిందే. దక్షిణ కొరియాలో 1980 తర్వాత సైనిక పాలన విధించడం ఇదే మొదటిసారి. యూన్ పాలనపై ప్రజల్లో తీవ్ర వ్యతిరేకత రావడంతోనే ఉత్తర కొరియాకు ప్రతిపక్షాలు అనుకూలంగా వ్యవహరిస్తున్నాయనే వంకతో సైనిక పాలన విధించినట్టు తెలుస్తోంది. ఇటీవల ఆయన భార్య వ్యవహారంపై కూడా తీవ్ర విమర్శలు వెల్లువెత్తాయి. వీటి దృష్టి మరల్చడానికే మార్లల్ లా అమల్లోకి తీసుకొచ్చారనే ప్రచారం కూడా ఉంది.