యుద్ధాలతో ఆయుధ కంపెనీలకు కాసులు.. ఏకంగా రూ.53 లక్షల కోట్ల ఆదాయం

ప్రపంచ వ్యాప్తంగా వివిధ దేశాల మధ్య జరుగుతోన్న భీకర యుద్ధాలతో ఆయుధ తయారీ సంస్థల పంట పండింది. అటు ఉక్రెయిన్-రష్యా, ఇటు పశ్చిమాసియాలో గాజా, లెబనాన్, ఇరాన్‌లపై ఇజ్రాయేల్ సాగిస్తోన్న పోరుతో కొంతకాలంగా ప్రపంచ దేశాలు వణికిపోతున్నాయి. ఈ పరిణామాలతో మూడో ప్రపంచ యుద్ధం రాబోతుందని ఆందోళనలు వ్యక్తమవుతున్నాయి. అయితే, ఇప్పటికే మూడో ప్రపంచ యుద్దం మొదలై పోయిందని కొందరు చెబుతున్నారు. ఓ వైపు యుద్ధ భయంతో ప్రపంచం వణికిపోతుంటే.. మరోవైపు ఈ భయాన్నే వ్యాపారంగా మలుచుకుని ఆయుధ తయారీ సంస్థలు లబ్ది పొందుతున్నాయి.

2023లో ప్రపంచంలోని 100 ఆయుధ కంపెనీలన్నీ కలిపి ఏకంగా 632 బిలియన్ డాలర్లు అంటే భారత కరెన్సీలో సుమారు రూ.53 లక్షల కోట్ల వ్యాపారం చేసినట్లు స్టాక్‌హోమ్‌ ఇంటర్నేషనల్‌ పీస్‌ రీసెర్చి ( సిప్రి) నివేదిక స్పష్టం చేసింది. అంతకుముందు ఏడాదితో పోలిస్తే ఇది 4.2 శాతం అధికమని వెల్లడించింది. 2022లో సరైన వ్యాపారం లేక ఢీలా పడిన ఆయుధ కంపెనీలకు 2023 సంవత్సరం బాగా కలిసొచ్చినట్లు సిప్రి తెలిపింది. 2024లోనూ అదే తీరు కొనసాగుతోందని సిప్రి ఆయుధ ఉత్పత్తి నిపుణుడు లోరెంజో తెలిపారు.

ఈ యుద్ధాలతో ఆమెరికాకు చెందిన ఆయుధ కంపెనీలే అత్యధికంగా ప్రయోజనం పొందాయి. టాప్-100 కంపెనీల్లో 41 సంస్థలు అమెరికాకు చెందినవే. ఇవి గతేడాది 2.3 శాతం వృద్ధి సాధించాయి. ఆ తర్వాతి స్థానంలో ఐరోపాకు చెందిన 27 సంస్థలున్నాయి. ఇవి సగటున కేవలం 0.2 శాతమే వృద్ధిని చూడగా.. మరికొన్ని కంపెనీలు ఉక్రెయిన్‌ యుద్ధానికి అవసరమైన శతఘ్నుల తూటాలు, మందుగుండు వంటివి ఉత్పత్తి చేసి భారీగానే ఆర్జించాయి.

ఓ వైపు చిన్న చిన్న కంపెనీల వ్యాపారం పెరిగితే.. ప్రపంచంలోనే అతిపెద్ద ఆయుధ తయారీ సంస్థలైన లాక్‌హీడ్‌ మార్టిన్‌, రేథియాన్‌ టెక్నాలజీస్‌ ఆదాయం తగ్గడం గమనార్హం. ఇక రష్యాకు చెందిన సంస్థలు సగటున 40 శాతం వ్యాపారం పెంచుకోగా.. ఇజ్రాయేల్‌కి చెందని మూడు కంపెనీలు 13.5 బిలియన్ డాలర్ల వ్యాపారం చేశాయి.

గాజా, ఉక్రెయిన్, ఇతర సంక్షోభాల కారణంగా పుట్టుకొచ్చిన డిమాండ్‌ను అందుకోవడంలో చిన్న ఉత్పత్తిదారులు ముందున్నారని సిప్రి వెల్లడించింది. తాము పరిశీలించిన 100 ఆయుధ కంపెనీలకు 2023లో కనీసం 1 బిలియన్‌ డాలర్ల చొప్పున వ్యాపారం జరిగినట్లు తెలిపింది. 2023 కంటే 2024లో అంతర్జాతీయ పరిణామాలు, పరిస్థితులు మరింత దిగజారడంతో ఆయుధ తయారీ సంస్థల వ్యాపారం మరింత పుంజుకునే ఉంటుందని సిప్రి నివేదిక అభిప్రాయడింది.