“స్ట్రైట్ ఆఫ్ హార్మూజ్‌లో షాక్ ఘటన.. నావలో అగ్నిప్రమాదం, భారతీయుడు మృతి”

స్ట్రైట్ ఆఫ్ హార్మూజ్ (Strait of Hormuz) పరిధిలో జరిగిన ఘోర సముద్ర ప్రమాదం అంతర్జాతీయంగా తీవ్ర కలకలం రేపింది. ఇక్కడ ప్రయాణిస్తున్న ఓ నౌకలో ఒక్కసారిగా భారీ అగ్నిప్రమాదం చోటుచేసుకోవడంతో ఒక భారతీయ నావికుడు దుర్మరణం చెందారు.ప్రమాద సమయంలో ఆ నౌకలో మొత్తం 18 మంది భారతీయ సిబ్బంది ఉన్నట్లు సమాచారం. మంటల తీవ్రత కారణంగా మరో నలుగురునావికులు తీవ్రంగా గాయపడ్డారు. ఘటన జరిగిన వెంటనే రెస్క్యూ బృందాలు స్పందించి క్షతగాత్రులను దుబాయ్‌లోని స్థానిక ఆసుపత్రికి తరలించాయి. ప్రస్తుతం వారికి అక్కడ అత్యవసర చికిత్స అందుతోంది.ఈ ఘటనపై దుబాయ్‌లోని భారత కాన్సులేట్ జనరల్ వెంటనే స్పందించింది. ఆసుపత్రిలో చికిత్స పొందుతున్న భారతీయ నావికులను అధికారులు స్వయంగా పరామర్శించి వారి ఆరోగ్య పరిస్థితిని తెలుసుకున్నారు. బాధితులకు అవసరమైన వైద్య, దౌత్య సహాయం అందిస్తున్నట్లు కాన్సులేట్ వెల్లడించింది.అలాగే నౌక యజమానితో నిరంతరం సంప్రదింపులు కొనసాగుతున్నాయని అధికారులు తెలిపారు. మృతుడి కుటుంబానికి అవసరమైన సహాయం అందించడంతో పాటు, పార్థివ దేహాన్ని త్వరగా స్వదేశానికి తీసుకురావడానికి చర్యలు తీసుకుంటున్నట్లు పేర్కొన్నారు. అయితే ఈ ప్రమాదానికి గల అసలు కారణం ఇంకా అధికారికంగా నిర్ధారించాల్సి ఉంది.ఇక మరోవైపు, హార్మూజ్ ప్రాంతంలో ఇటీవల పెరుగుతున్న ఇరాన్–అమెరికా ఉద్రిక్తతల నేపథ్యంలో ఈ ఘటన జరగడం ప్రాధాన్యం సంతరించుకుంది. Strait of Hormuz వద్ద ఇరాన్, అమెరికా బలగాల మధ్య ఇటీవల కాల్పుల ఉద్రిక్తతలు చోటుచేసుకున్నాయి. ఒకవైపు ఇరాన్ అమెరికాపై ఆరోపణలు చేస్తుండగా, మరోవైపు అమెరికా దాడులను ఆత్మరక్షణ చర్యలుగా సమర్థించుకుంది.ఈ పరిణామాల మధ్య అమెరికా అధ్యక్షుడు Donald Trump చేసిన వ్యాఖ్యలు కూడా ఉద్రిక్తతలను పెంచాయి. ఇరాన్‌తో చర్చలు త్వరగా ప్రారంభం కావాలని, లేకపోతే మరింత తీవ్ర పరిణామాలు ఎదుర్కోవాల్సి వస్తుందని ఆయన హెచ్చరించారు.ఈ కీలక భౌగోళిక ఉద్రిక్తతల మధ్య భారత నౌక ప్రమాదానికి గురికావడంతో, ఇది సాధారణ ప్రమాదమా లేక పరిస్థితుల ప్రభావమా అనే దానిపై దర్యాప్తు కొనసాగుతోంది.