కోడి పోరుకు కోర్టు సిగ్నల్ ఇస్తుందా

సంక్రాంతి వచ్చిందే తుమ్మేదా...సరదాలు తెచ్చిందే తుమ్మేదా అని ఎలా పాడుకొంటామో...కోడి ఫైట్  గురించి కూడా అంతే గుర్తుచేసుకోవాలి. కోడి పోరు సాగనిదే మజా రాదు అంటారు కొందరు. ఇదిలావుంటే ఏపీలో సంక్రాంతి సందడి మొదలైంది. రాష్ట్రవ్యాప్తంగా కోడి పందాలకు బరులు సిద్ధమయ్యాయి. పందం రాయుళ్లు సై అంటున్నారు. సంక్రాంతి బరికి పందెం కోళ్లు కాలు దువ్వుతున్నా యి. పండుగ దగ్గర పడుతున్న కొద్దీ సమరోత్సాహంతో కదం తొక్కు తున్నాయి. ప్రత్యేక శిక్షణ శిబిరాల్లో రాటుదేలుతున్నాయి. పందెం రాయుళ్లు ఎంత ఖర్చుకైనా వెనకాడడం లేదు. పందెంకోళ్ల వైభోగం చూసి అందరూ ఆశ్చర్యపోతుంటే మరోవైపు వాటి యజమానులు మాత్రం మురిసిపోతున్నారు. పందేల్లో పైచేయి కోసం తహతహలాడిపోతున్నారు. సంక్రాంతికి కోడి పందాల కోసం అందరూ సిద్ధమవుతుంటే.. వారందరి ఆశలపై నీళ్లు చల్లుతూ కోడి పందాలను నిర్వహించకుండా ఆదేశాలు ఇవ్వాలని ఏపీ హైకోర్టులో పిటిషన్ దాఖలైంది. కోడి పందాలు, జూదం, అక్రమ మద్యం అమ్మకాలను జరపకుండా నిలువరించాలని పిటిషన్ వేశారు.. గురువారం హైకోర్టులో విచారణకు వచ్చే అవకాశం ఉంది. గతంలో కూడా హైకోర్టులో పందాలపై పిటిషన్లు దాఖలయ్యాయి.. కోర్టు నిషేధం విధించినా పందెం రాయుళ్ల మాత్రం వెనక్కు తగ్గలేదు. వారి పని వారు చేసుకుని పోయారు. పోలీసులు ఆంక్షలు పెట్టినా వెనక్కు తగ్గలేదు. మరి ఈ ఏడాది కోర్టు ఎలాంటి నిర్ణయం తీసుకుంటుందన్నది ఆసక్తికరంగా మారింది. ఓవైపు ఒమిక్రాన్ కేసులు రోజు, రోజుకు పెరుగుతున్నాయి. ఇలాంటి సమయంలో జనాలు గుంపులుగా ఉంటే వైరస్ వేగంగా వ్యాప్తి చెందే ప్రమాదం ఉంది.. ఇలాంటి సమయాల్లో ఇలాంటి కోడి పందాలు, సంక్రాంతి సంబరాల నిర్వహణ మంచిది కాదని నిపుణులు చెబుతున్నారు. కోడి పందాలు ఉభయ గోదావరి జిల్లాల్లో ఎక్కువగా జరుగుతాయి. పండుగ మూడు రోజులు పందెం బరులు కొనసాగుతాయి. ఈ కోడి పందాల కోసం ఇతర రాష్ట్రాలు, దేశ విదేశాల నుంచి ఎన్నారైలు గోదావరి జిల్లాలకు వస్తారు. ఈ ఏడాది కూడా పందాలు భారీ ఎత్తున నిర్వహించేందుకు పందెం రాయుళ్లు సిద్ధమవుతున్నారు. పండుగకు మరో రెండు వారాలు మాత్రమే సమయం ఉండటంతో బిజీ అయ్యారు. ఏటా సంక్రాంతి కోట్లాది రూపాయలు చేతులు మారతాయి.