రాజమౌళి సెంటిమెంటును తారక్, చెర్రీలు బ్రేక్ చేస్తారా...?

ఎస్.ఎస్ రాజమౌళి దర్శకత్వంలో జూనియర్ ఎన్టీయార్, రామ్ చరణ్ తేజ్ లు నటించిన పాన్ ఇండియా మల్టీస్టారర్  చిత్రం ఆర్ ఆర్ ఆర్. గత శుక్రవారం విడుదలై సూపర్ హిట్ టాక్ తో రన్ అవుతుంది. విడుదలైన అన్ని చోట్లా ఈ సినిమా విజయఢంకా మోగిస్తుంది. ప్రస్తుతం ఆర్ ఆర్ ఆర్ గ్రాండ్ సక్సెస్ ను తారక్, చరణ్ లు ఎంజాయ్ చేస్తున్నారు.  మూడున్నరేళ్లు ఈ సినిమా కోసం పడ్డ కష్టానికి పేక్షకులు చూపిస్తున్న ఆదరణ పట్ల ఎంతో సంతోషంగా ఉన్నారు ఇద్దరు స్టార్లు. అయితే వారి అభిమానులు మాత్రం ఒకింత భయంతో ఉన్నారట. ఎందుకంటే... జక్కన్న సినిమా తరవాత ఆయా హీరోలకి ఫ్లాప్ లు వస్తాయట. ఈ విషయం చాలా సార్లు నిరూపితం కూడా అయింది. బాహుబలి సినిమాతో ప్రపంచవ్యాప్తంగా గుర్తింపు తెచ్చుకున్న రెబల్ స్టార్ ప్రభాస్, ఆ సినిమా తర్వాత చేసిన సాహో, రాధేశ్యామ్ లు పరాజయాన్ని చవిచూశాయి. జూనియర్ ఎన్టీఆర్ రాజమౌళి డైరెక్షన్లో చేసిన సింహాద్రి తర్వాత వరసగా ఆంధ్రావాలా, సాంబ, నరసింహుడు, అశోక్ వంటి సినిమాలు పరాజయమవ్వగా యమదొంగ తర్వాత చేసిన కంత్రి కూడా బాక్సాఫీస్ వద్ద ఫ్లాప్ గా నిలిచింది. 2008లో రాజమౌళి దర్శకత్వంలో చేసిన మగధీర తర్వాత ఆరెంజ్ వంటి డిజాస్టర్ ను నమోదు చేసాడు చరణ్. దీంతో తారక్, చరణ్ ల ఫ్యాన్స్ వారి తరవాతి సినిమాల పట్ల టెన్షన్ గా ఉన్నారట. ఈ సెంటిమెంటును తారక్, చెర్రీ లు బ్రేక్ చేసి హిట్ కొడతారా? లేక యాజూజువల్ గా ఫ్లాప్ తో కనిచేస్తారా అన్నది ఇప్పుడు హాట్ టాపిక్ గా మారింది. 

చరణ్ కొరటాల శివ దర్శకత్వంలో తన తండ్రి మెగాస్టార్ తో కలిసి ఆచార్యలో నటిస్తున్నారు. ఈ సినిమా ఏప్రిల్ 29న విడుదల కానుంది. ఈ సినిమా ఫలితం ఎలా ఉండనుందో అని మెగా అభిమానులతో పాటు మిగిలినవారు కూడా ఆసక్తిగా ఉన్నారు. ప్రస్తుతం చరణ్ తమిళ స్టార్ డైరెక్టర్ శంకర్ దర్శకత్వంలో ఒక సినిమా చేస్తున్నారు. తారక్ ప్రస్తుతం ఖాళీగానే ఉన్నా త్వరలోనే కొరటాలతో కలిసి న్యూ ప్రాజెక్టు ను స్టార్ట్ చేయనున్నాడు. 100శాతం సక్సెస్ గ్రాఫ్ తో దూసుకుపోతున్నారు కొరటాల, పోతే... శంకర్ సినిమాలంటే ఏరేంజు అంచనాలుంటాయో చెప్పనవసరం లేదు.