కేజిఎఫ్ :చాప్టర్ 2 నుండి "ఎదగారా " సాంగ్ ఔట్

2018లో విడుదలై దేశవ్యాప్తంగా సంచలనాలకు కేంద్ర బిందువుగా మారిన చిత్రం కేజిఎఫ్ చాప్టర్ 1. ప్రశాంత్ నీల్ డైరెక్ట్ చేసిన ఈ సినిమాలో యష్ హీరోగా నటించాడు. శ్రీనిధిశెట్టి హీరోయిన్ గా నటించిన ఈ సినిమా విడుదలైన అన్ని భాషల్లో ఘనవిజయం సాధించింది. సినిమాలో ప్రతి సీన్, ప్రతి ఒక్కరి డైలాగులు, పాటలు అన్నీ కూడా ఈ సినిమాకు చాలా బాగా కుదిరాయి. ప్రశాంత్ నీల్ తెరకెక్కించిన హీరో ఎలివేషన్ సీన్స్ అయితే నెక్స్ట్ లెవెల్. దీంతో ఈ సినిమాకు కొనసాగింపుగా వస్తున్న కేజిఎఫ్:చాప్టర్ 2పై ముందునుండీ భారీ అంచనాలున్నాయి. కరోనా కారణంగా విడుదల ఆలస్యమైన ఈ సినిమా ఏప్రిల్ 14వ తేదీన ప్రేక్షకుల ముందుకు రాబోతుంది. దీంతో ప్రమోషన్స్ ముమ్మరం చేసారు చిత్రబృందం. 

ఇటీవలే ఈ మూవీ థియేట్రికల్ ట్రైలర్ విడుదలైంది. ఈ ట్రైలర్ ప్రేక్షకుల అంచనాలను అందుకోవడంలో విఫలమైందని, భారీతనంపై పెట్టిన శ్రద్ధ ప్రశాంత్ స్టోరీ పై కూడా పెడితే బావుండేదని కొంతమంది తమ అభిప్రాయాన్ని వ్యక్తం చేశారు. ట్రైలర్ దేముంది సినిమా చూసి మాట్లాడాలి అని మరికొంతమంది చెప్తున్నారు. ఈ నేపథ్యంలోనే ఈ మూవీ నుండి మరొక లిరికల్ సాంగ్ విడుదలైంది. ముందు గా రిలీజైన తుఫాన్ పాటకు ప్రేక్షకుల నుండి విశేష స్పందన రాగా ఇప్పుడు విడుదలైన ఎదగారా సాంగ్ కూడా ప్రేక్షకుల హృదయాలను హత్తుకునేలా ఉంది. చాప్టర్ 1లో బ్లాక్ బస్టర్ హిట్ ఐన ధీరా ధీరా మదర్ సాంగ్ లాగానే ఎదగారా సాంగ్ కూడా మదర్ సెంటిమెంటుతో కూడిఉంది. దీంతో ఈ పాట చూసిన ప్రేక్షకులు ఒకింత ఎమోషన్ కి గురవుతున్నారు. బిడ్డకి భవిష్యత్తు దిశానిర్దేశాలు చేస్తున్న తల్లి పాడే ఈ పాట... వినడానికి ఎంతో మధురంగా ఉంది. చిత్రీకరణ కూడా ఎంతో హృద్యంగా సాగింది. ఈ పాటతో ఈ సినిమాపై మరింత అంచనాలు పెరిగిపోయాయి. ఏప్రిల్ 14 న విడుదలయ్యే ఈ సినిమా ఎన్ని రికార్డులను క్రియేట్ చేస్తుందో చూడాలి మరి.