వివేక్ అగ్నిహోత్రి కొత్త చిత్రం ది ఢిల్లీ ఫైల్స్ కథేమిటంటే ...?
cinema | Suryaa Desk | Published : Tue, Apr 19, 2022, 11:53 AM
ఇటీవల దేశవ్యాప్తంగా సంచలన విజయం సాధించిన సినిమా ది కాశ్మీర్ ఫైల్స్. 1990ల కాలంలో కాశ్మీరీ హిందువుల దయనీయ జీవితాన్ని, పండిట్ల ఊచకోతను, ఇంకా ఎన్నో కాశ్మీర్ అంతర్గత విషయాలను ప్రపంచానికి బహిర్గతం చేసిన చిత్రమిది. వాస్తవ సమాచారాన్ని సేకరించి, నాలుగేళ్లు శ్రమించి మరీ ఈ చిత్రాన్ని తెరకెక్కించాడు దర్శకుడు వివేక్ అగ్నిహోత్రి. అభిషేక్ అగర్వాల్ నిర్మించిన ఈ చిత్రం దాదాపు 350 కోట్ల పై చిలుకు కలెక్షన్లు సాధించి విశ్లేషకులు సైతం నివ్వెరపోయేలా చేసింది.
పోతే... వివేక్ అగ్నిహోత్రి, అభిషేక్ అగర్వాల్ మరో వాస్తవ కథతో ప్రేక్షకుల ముందుకు రానున్నారు. ఈ మధ్యనే తన కొత్త చిత్రాన్ని అధికారికంగా ప్రకటిస్తూ, దానికి ది ఢిల్లీ ఫైల్స్ అనే టైటిల్ ను ఫిక్స్ చేసినట్టు ప్రకటించారు దర్శకుడు వివేక్ అగ్నిహోత్రి. అయితే ఈ చిత్ర కథ ఎలా వుండబోతుందనే దానిపై ఎలాంటి క్లారిటీ ఇవ్వలేదు. కానీ ఈ చిత్ర కథ విషయమై ఒక న్యూస్ సోషల్ మీడియాలో హల్చల్ చేస్తుంది.1984లో ఢిల్లీలో సిక్కుల అల్లర్ల నేపథ్యంలో ది ఢిల్లీ ఫైల్స్ చిత్రం రూపొందనుందని టాక్. 1984, అక్టోబర్ 31న ఇందిరాగాంధీ హఠాన్మరణం తర్వాత దేశ రాజధాని ఢిల్లీలోని పలు ప్రాంతాల్లో సిక్కు వ్యతిరేకులు చేసిన అల్లర్లలో దాదాపు 3000 మందికి పైగా సిక్కులు అన్యాయంగా చనిపోయారు. ఈ నరమేథం వెనక ఎవరెవరున్నారు..? ఈ సంఘటన వెనక ఉన్న చీకటి కోణాలను వెలికి తీసి ప్రపంచానికి తెలియ చేయాలనుకుంటున్నారట వివేక్ అగ్నిహోత్రి.
|
|