ఎమ్మెల్యేగా ఓడిపోయినా బాధపడాల్సిన పని లేదు.. త్వరలోనే అలా వస్తా..

గతేడాది డిసెంబర్‌లో జరిగిన అసెంబ్లీ ఎన్నికల్లో కాంగ్రెస్ పార్టీ అనూహ్య విజయం సాధించిన విషయం తెలిసిందే. అయితే.. ఈ ఎన్నికల్లో కాంగ్రెస్ పార్టీ 64 స్థానాలు గెలుచుకుంది. అయితే.. ఇందులో కాంగ్రెస్ సీనియర్ నేత, ఫైర్ బ్రాండ్ జగ్గారెడ్డి ఓడిపోవటం ఊహించని పరిణామం. ఎన్నో ఏళ్లుగా పార్టీలో ఉంటూ మాస్ లీడర్‌గా పేరు తెచ్చుకున్న జగ్గారెడ్డి.. సంగారెడ్డి నియోజకవర్గం నుంచి మూడు పర్యాయాలు గెలవగా.. ఈసారి ఓడిపోయారు. ఒకవేళ జగ్గారెడ్డి గెలిస్తే.. మాత్రం కాంగ్రెస్ ప్రభుత్వంలో మంచి హోదా దక్కేదంటూ పెద్ద ఎత్తున చర్చ నడిచింది కూడా. అయితే.. ఈరోజు జగ్గారెడ్డి పుట్టిన రోజు సందర్భంగా ఈ విషయాన్ని ఆయన అభిమానులు గుర్తు చేసుకుంటున్నారు.

ఈ క్రమంలోనే.. జగ్గారెడ్డి ఇంట్రెస్టింగ్ కామెంట్స్ చేశారు. నేడు ఆయన పుట్టిన రోజు సందర్భంగా మీడియాతో మాట్లాడిన జగ్గారెడ్డి.. తాను ఎమ్మె్ల్యేగా ఓడినందుకు చాలా ప్రశాంతంగా ఉన్నానని ఆసక్తికర వ్యాఖ్యలు చేశారు. తాను ఓడిపోయానని బాధపడాల్సిన అవసరం లేదని.. రాష్ట్రంలో తమ ప్రభుత్వమే అధికారంలో ఉందని, కావాల్సిన పనులు జరుగిపోతాయని కార్యకర్తలకు భరోసా కల్పించారు. ఎన్నికల్లో ఓటమి పాలైనప్పటికీ సంగారెడ్డి ప్రజలకు జవాబుదారీగా ఉంటానన్న జగ్గారెడ్డి.. 2 నెలల తర్వాత ప్రతి సోమవారం నియోజకవర్గ ప్రజలకు అందుబాటులో ఉంటానని స్పష్టం చేశారు. అయితే.. జగ్గారెడ్డి చేసిన ఈ వ్యాఖ్యల వెనుక అర్థం ఏంటీ అన్నది ఆయన అభిమానులు, కార్యకర్తలు చర్చించుకుంటున్నారు.అయితే.. అసెంబ్లీ ఎన్నికల ప్రచారం సమయంలో.. కాంగ్రెస్ ప్రభఉత్వం వస్తే.. తాను కూడా సీఎం అభ్యర్థినే అంటూ కీలక వ్యాఖ్యలు చేశారు జగ్గారెడ్డి. అయితే.. ఎమ్మెల్యేగా ఓడిపోవటంతో.. సీఎం పదవి కాదు కదా.. జగ్గారెడ్డికి కనీసం మంత్రి హోదా కూడా దక్కలేదు. ఈ క్రమంలోనే.. ఆయన పార్టీలోని కీలక పదవి ఆశిస్తున్నట్టు సమాచారం. ప్రస్తుతు కాంగ్రెస్ వర్కింగ్ ప్రెసిడెంట్‌గా ఉన్న జగ్గారెడ్డి.. టీపీసీసీ అధ్యక్ష పదవి పోరులో ఉన్నట్టు తెలుస్తోంది. ఈ మేరకు ఢిల్లీ హైకమాండ్‌తోనూ మంతనాలు జరుపుతున్నట్టు తెలుస్తోంది.

టీపీసీసీగా రేవంత్ రెడ్డిని నియమించటం దగ్గరి నుంచి.. రేవంత్ తీసుకునే నిర్ణయాల వరకు.. తరచూ తన అసంతృప్తిని బహిరంగంగా వ్యక్తం చేసే జగ్గారెడ్డిని.. పలుమార్లు హైకమాండ్ హెచ్చరించటం, దానికి ఆయన వివరణలు ఇచ్చుకోవటం జరిగాయి. అయితే.. అలాంటి వ్యక్తికి ఇప్పుడు ఏకంగా టీపీసీసీ అధ్యక్ష పదవి కట్టబెడతారా అన్నది తెలియాల్సి ఉంది.