ఆ బాధ్యతల నుంచి తప్పుకుంటా.. మంత్రి సీతక్క

హైదరాబాద్ గాంధీ భవన్‌లో జరిగిన ఆదిలాబాద్ పార్లమెంట్ నియోజకవర్గ సమీక్ష సమావేశానికి హాజరైన మంత్రి సీతక్క సంచలన వ్యాఖ్యలు చేశారు. ఉమ్మడి ఆదిలాబాద్ జిల్లాలోని నియోజకవర్గ ఇంఛార్జ్‌ల పనితీరు ఏ మాత్రం బాగోలేదని ఆమె బహిరంగంగానే తీవ్ర అసంతృప్తి వ్యక్తం చేశారు. అందుకే ఆదిలాబాద్ జిల్లా ఇంఛార్జ్ బాధ్యతల నుంచి తప్పుకోవాలని నిర్ణయించుకున్నట్లు కీలక ప్రకటన చేశారు. త్వరలోనే ముఖ్యమంత్రి రేవంత్ రెడ్డిని కలిసి.. ఉమ్మడి ఆదిలాబాద్ జిల్లా పరిస్థితి వివరించి బాధ్యతల నుంచి వైదొలుగుతానని మంత్రి సీతక్క వెల్లడించారు. రాష్ట్రంలో మంత్రి వర్గ విస్తరణ తర్వాత ఆదిలాబాద్ జిల్లా పదవీ బాధ్యతల నుంచి తాను తప్పుకుంటానని తెలిపారు.

ఇక ఆదిలాబాద్ నియోజకవర్గంలో పార్టీ, ప్రభుత్వం మధ్య సమన్వయానికి ఒక కమిటీ ఏర్పాటు చేద్దామని రాష్ట్ర వ్యవహారాల ఇంఛార్జ్ మీనాక్షి నటరాజన్ ఒక ప్రతిపాదన తీసుకువచ్చారు. ఆదిలాబాద్ పార్లమెంట్ నియోజకవర్గంలో ఐదుగురు సభ్యులతో కూడిన పొలిటికల్ అఫైర్స్ కమిటీ వేస్తానని మీనాక్షి నటరాజన్ తెలిపారు. ఈ పొలిటికల్ అఫైర్స్ కమిటీ ప్రభుత్వం, పార్టీ మధ్య సమన్వయం కోసం పనిచేయనుందని మీనాక్షి నటరాజన్ తెలిపారు. ఇక ఈ సందర్భంగా సిర్పూర్ కాంగ్రెస్ పార్టీ ఇంఛార్జ్ రావి శ్రీనివాస్‌పై మీనాక్షి నటరాజన్ ఆగ్రహం వ్యక్తం చేశారు. మంత్రి సీతక్కకు ఫోన్ చేస్తే ఆమె ఎత్తడం లేదని రావి శ్రీనివాస్ ఫిర్యాదు చేయగా.. మీనాక్షి నటరాజన్ మందలించారు.

మరోవైపు.. అంతకుముందు కాంగ్రెస్ పార్టీ నుంచి బహిష్కరణకు గురైన ఎమ్మెల్సీ తీన్మార్ మల్లన్నపై మంత్రి సీతక్క తీవ్ర ఆగ్రహం వ్యక్తం చేశారు. కాంగ్రెస్‌ పార్టీ కార్యకర్తల శ్రమతో ఎమ్మెల్సీగా గెలిచిన తీన్మార్ మల్లన్న.. ఆ విషయం గుర్తుపెట్టుకోవాలని హితవు పలికారు. కులగణనపై ఏవైనా అభ్యంతరాలు ఉంటే శాసనమండలితో పాటు ప్రభుత్వ పెద్దలతో మాట్లాడి అభిప్రాయాన్ని వెల్లడించాలి కానీ.. ప్రభుత్వ ప్రతిష్టను దిగజార్చేలా ఇష్టానుసారం మాట్లాడొద్దని సూచించారు. 10 ఏళ్లు అధికారంలో ఉన్న బీఆర్ఎస్ ప్రభుత్వం చేయలేని పనిని తమ కాంగ్రెస్ ప్రభుత్వం ఏడాదిలోనే చేసి చూపించిందని చెప్పారు. కులగణన చేసినందుకు తమ ప్రభుత్వాన్ని అభినందించాల్సింది పోయి.. విమర్శలు చేయడం ఏంటని మంత్రి సీతక్క తీవ్ర ఆగ్రహం వ్యక్తం చేశారు.