ప్రియుడితో కలిసి భర్త హత్య.. గుండెపోటుగా చిత్రీకరణ.. కూతురు ఎంట్రీతో మారిపోయిన సీన్

రోజురోజుకూ మానవ సంబంధాలు మంట గలుస్తున్నాయి. పెళ్లి చేసుకుని భర్త, పిల్లలతో హాయిగా గడపాల్సిన ఆడవాళ్లు.. పరాయి పురుషుల మోజులో పడుతూ జీవితాలనే నాశనం చేసుకుంటున్నారు. పది నిమిషాల పడక సుఖం కోసం.. తమకోసం జీవితాలనే త్యాగం చేస్తున్న భర్తలకు అన్యాయం చేస్తున్నారు. తాజాగా ఉత్తర ప్రదేశ్‌కు చెందిన ఓ మహిళ కూడా ఇలాగే చేసింది. పెళ్లై, నలుగురు పిల్లలు ఉండగా.. మరో వ్యక్తితో అక్రమ సంబంధం పెట్టుకుంది. ఆ విషయం భర్తకు తెలిసి మందలించడంతో అతడిని అడ్డు తొలగించుకోవాలనుకుంది. అదే విషయాన్ని ప్రియుడికి చెప్పి.. అతడి సాయంతోనే భర్తను హత్య చేసింది. ఆపై దాన్ని గుండెపోటుగా చిత్రీకరించేందుకు ప్రయత్నించింది. కానీ కుమార్తె ఎంట్రీ సీన్ అంతా మారిపోయింది.

ఉత్తర ప్రదేశ్ లక్నోలోని ఠాకూర్ గంజ్‌కు చెందన 50 ఏళ్ల శత్రుఘ్న రాథోడ్‌కు.. రాఖీకి చాలా ఏళ్ల క్రితమే వివాహం జరిగింది. వీరి అన్యోన్య దాంపత్యానికి ప్రతీకలుగా నలుగురు కుమార్తెలు కూడా పుట్టారు. అయితే తాను ఉంటున్న ప్రాంతంలోనే రెస్టారెంట్ నిర్వహిస్తూ.. శత్రుఘ్న కుటుంబాన్ని పోషిస్తున్నాడు. పిల్లలను కూడా బాగా చదివిస్తున్నాడు. అయితే ఎప్పుడూ పనిలో చాలా బిజీగా ఉండే శత్రుఘ్న ఇంటి వద్ద చాలా తక్కువగా ఉంటారు. అర్ధ రాత్రి వరకూ రెస్టారెంట్‌లోనే ఉండి అంతా పడుకున్న తర్వాత ఇంటికి వస్తుంటాడు.

ఈక్రమంలోనే రాఖీ కొన్నేళ్లుగా ట్రావెల్ వ్యాపారి అయిన 40 ఏళ్ల ధర్మేంద్ర రాథోడ్‌తో అక్రమ సబంధం సాగిస్తోంది. భర్త ఎక్కువగా ఇంటికి రాకపోవడం, పిల్లలు కూడా బడికి వెళ్లడంతో.. అతడు నేరుగా వీళ్ల ఇంటికే వచ్చాడు. అలా చాలా రోజులుగా చాటుమాటుగా వ్యవహారం సాగిస్తున్న వీళ్లను.. అనుకోకుండా ఒక రోజు శత్రుఘ్న చూసేశాడు. మరోసారి ఇలా చేస్తే ఊరుకోనని భార్యతో పాటు ధర్మేంద్రకు వార్నింగ్ ఇచ్చాడు. అప్పటి నుంచి భార్య రాఖీని ధర్మేంద్రతో కలవనివ్వట్లేదు.

దీంతో అక్రమ సంబంధానికి అడ్డుగా వస్తున్న భర్తను ఎలాగైనా సరే అడ్డు తొలగించుకోవాలనుకుంది రాఖీ. అదే విషయాన్ని ప్రియుడు ధర్మేంద్రకు చెప్పగా.. శత్రుఘ్నను చంపాలని ప్లాన్ చేశారు. మత్తు మందు పెట్టి చంపేసి గుండెపోటుగా చిత్రీకరించాలనుకున్నారు. అయితే ఇంట్లో పిల్లలు ఉంటారు కాబట్టి ప్రత్యక్షంగా భర్త హత్యలో పాలు పంచుకోకూడదు అని రాఖీ భావించింది. నువ్వే ఎవరినైనా సాయం తెచ్చుకుని భర్తను చంపాలంటూ ప్రియుడికి వివరించింది. ఇందుకు ధర్మేంద్ర కూడా అంగీకరించాడు.

రోజూలాగే రెస్టారెంట్‌కు వెళ్లిన శత్రుఘ్న డిసెంబర్ 30వ రాత్రి 1.30 గంటలకు ఇంటికి చేరుకున్నాడు. ఆ తర్వాత భోజనం చేసి పడుకున్నాడు. భార్య రాఖీ మరో గదిలో పిల్లలతో కలిసి పడుకుంది. అదే విషయాన్ని ప్రియుడికి చెప్పగా... అదే రోజు ధర్మేంద్ర తన స్నేహితులు అయిన అంకిత్, రంజీత్‌లను వెంట పెట్టుకుని ప్రియురాలి ఇంటికి వచ్చాడు. శత్రుఘ్న ఉన్న గదిలోకి వెళ్లి అతడికి మత్తు మందు పెట్టి చంపబోయారు. ఈక్రమంలోనే శత్రుఘ్న చప్పుడు చేయగా... ఆయన పెద్ద కూతురు నిద్ర లేచింది. వెంటనే వెళ్లి తలుపులు తీయబోయింది. కానీ ఎంతకూ రాకపోవడం, చప్పుడు మరింత ఎక్కువ కావడంతో పక్కింటి వాళ్లకు ఫోన్ చేసింది.

దీంతో అప్రమత్తమైన స్థానికులు వెంటనే వాళ్లింటికి చేరుకున్నారు. ఆ విషయం గుర్తించిన నిందితులు అక్కడి నుంచి పారిపోయారు. లోపలికి వచ్చిన స్థానికులకు శత్రుఘ్న మృతదేహం కనిపించింది. అది చూసి భయపడ్డా.. మరో గది తలుపులు తెరవగా భార్యా పిల్లలు బయటకు వచ్చారు. తన విషయం ఎక్కడ బయటపడిపోతుందో అని భావించిన రాఖీ.. నేరుగా పోలీస్ స్టేషన్‌కు వెళ్లి తన భర్తను ఎవరో హత్య చేశారని ఫిర్యాదు చేసింది. ఈక్రమంలోనే సీసీటీవీ కెమెరాలు పరిశీలించిన పోలీసులు నిందితులైన ధర్మేంద్ర, అంకిత్‌లను అరెస్ట్ చేశారు. అయితే ఘటన జరిగిన రోజు రంజీత్ 18 అడుగుల పైనుంచి కిందకు దూకగా అతడి తల పగిలిపోయి ఆస్పత్రిలో చికిత్స పొందుతున్నట్లు పోలీసులు గుర్తించారు.

నిందితులిద్దరినీ తమదైన స్టైల్‌లో విచారించగా.. నేరం ఒప్పుకున్నారు. శత్రుఘ్న భార్య రాఖీ చెబితేనే అతడిని హత్య చేశామని వివరించారు. ఇలా పోలీసులు రాఖీని కూడా అదుపులోకి తీసుకున్నారు. తండ్రి చనిపోయి, తల్లి అరెస్ట్ కావడంతో.. నలుగురు ఆడ పిల్లలు అనాథలుగా మారారు.