30 లక్షల కుక్కలను చంపేందుకు సర్కారు నిర్ణయం.. ఎందుకంటే?

2030లో జరగనున్న ఫిఫా వరల్డ్ కప్‌కు ముందే మొరాకో ప్రభుత్వం.. దాదాపు 30 లక్షల వీధి కుక్కలను చంపేందుకు ప్లాన్ వేసిందని పలు నివేదికలు సూచిస్తున్నాయి. మొరాకోతో పాటు స్పెయిన్, పోర్చుగల్‌లో జరగబోతున్న ఈ ఫుట్‌బాల్ ప్రపంచ కప్ కోసం.. ఆ దేశాలు ఏర్పాట్లు చేస్తున్నాయి. ముఖ్యంగా మొరాకో అయితే తమ దేశంలోని నగరాలను అందంగా తీర్చిదిద్దేందుకు కృషి చేస్తోంది. ఈక్రమంలోనే వీధుల్లో తిరుగుతున్న లక్షలాది కుక్కలను చంపేసి.. రోడ్లను మరింత అందంగా తయారు చేయాలని భావిస్తోందట. క్లీన్ అప్ పేరుతో మొత్తం 30 లక్షల వీధి కుక్కలను చంపాలని నిర్ణయించుకుందట.

ఈ వార్తలు తెలుసుకున్న ప్రపంచ వ్యాప్తంగా ఉన్న జంతు ప్రేమికులు ఆగ్రహం వ్యక్తం చేస్తున్నారు. ఇది క్రూరమైన చర్య అని చెబుతున్నారు. ఉత్తర ఆఫ్రికా దేశంలోని పలు ప్రదేశాలలోనూ కుక్కలను వధించడం ప్రారంభించదని కూడా కొన్ని నివేదికలు పేర్కొన్నాయి. 2030 ఫిఫా ప్రపంచ కప్ ఫైనల్స్‌కు వేధిక ఇంకా ఖరారు కాకముందే.. మొరాకో ఇలాంటి చర్య చేపట్టింది. ముఖ్యంగా టోర్నమెంట్ 100వ వార్షికోత్సవం కావడంతో.. 2030 ప్రపంచ కప్‌కు మరింత ప్రాముఖ్యత ఏర్పడింది.

ఫిఫా ప్రమాణాలకు అనుగుణంగా స్టేడియాలు, రవాణా సౌకర్యాలను పెంచుతూ పోతుంది మొరాకో. ఈక్రమంలోనే లక్షలాది కుక్కలను చంపే అవకాశం ఉందని పలు మీడియా వర్గాలు నివేదించాయి. ఈక్రమంలోనే ఇంటర్నేషనల్ యానిమల్ కోయలిషన్ కొన్ని క్రూరమైన పద్ధతుల గురించి తెలిపింది. ఇందులో స్ట్రైక్నైన్‌తో విష ప్రయోగం, కాల్పులు వంటివి కూడా ఉన్నాయని చెప్పింది. అలాగే కుక్కలను పలు పరికరాలతో బలవంతంగా బంధించి వాటిని సుత్తె వంటి వాటితో కొట్టి చంపుతారని వివరించింది. ఇందులో చాలా జంతవులు తీవ్రంగా గాయపడి నొప్పితో విలవిల్లాడుతూ ప్రాణాలు కోల్పోతాయని సంస్థ వెల్లడించింది.

మొరాకాలో ఇదే పద్ధతిలో ప్రతీ ఏటా 3 లక్షల వీధి కుక్కలు చంపబడుతున్నాయని.. ప్రభుత్వం తరఫున పని చేస్తున్న వ్యక్తులు వాటిని దారుణంగా కొట్టి చంపుతున్నారని కూడా చెబుతోంది. అయితే వీధి కుక్కలను చంపే ఈ అమానవీయ ఘటనపై చర్యలు తీసుకోవాలంటూ జంతు హక్కుల ప్రచార కర్తలు ఫిఫాను ఆశ్రయిస్తున్నారు. మొరాకోపె వెంటనే చర్యలు తీసుకుని.. వీధి కుక్కల హత్యను ఆపాలని కోరుతున్నారు.