అఫ్జల్‌గంజ్ కాల్పుల కేసులో బిగ్ ట్విస్ట్.. వెలుగులోకి కీలక విషయాలు

హైదరాబాద్ అఫ్జల్‌గంజ్‌లో కాల్పులు కలకలం రేపిన సంగతి తెలిసిందే. నిందితులను పట్టుకునేందుకు పోలీసుల గాలింపు విస్తృతంగా కొనసాగుతోంది. తాజాగా.. ఈ కేసులో బిగ్ ట్విస్ట్ చోటు చేసుకుంది. సంచలన విషయాలు వెలుగులోకి వస్తున్నాయి. కాల్పులు జరిపింది బిహార్‌ రాష్ట్రానికి చెందిన మనీష్‌గా పోలీసులు గుర్తించారు. అదే రాష్ట్రానికి చెందిన మరో నిందితుడితో కలిసి మనీష్ చోరీలకు పాల్పడుతున్నట్లు తెలిసింది. బిహార్, కర్ణాటక, తెలంగాణ, ఛత్తీస్‌గఢ్ రాష్ట్రాల్లో వీరు చోరీలకు తెగబడుతున్నట్లుగా పోలీసులు వెల్లడించారు. నగరంలోని సీసీ టీవీ కెమెరాల ద్వారా నిందితులను పోలీసులు కనిపెట్టారు. అఫ్జల్‌గంజ్‌లోలో కాల్పులు జరిపిన దొంగలు నేరుగా ఆటోలో సికింద్రాబాద్‌కు వెళ్లినట్లుగా గుర్తించారు. ఈ మేరకు వారు ప్రయాణించిన ఆటో డ్రైవర్‌ను తాజాగా అదుపులోకి తీసుకున్నారు. ఆటోలో ప్రయాణింతే సమయంలో ఏమైనా మాట్లాడారా..? అన్న విషయాలు రాబడుతున్నారు.

ఇక రైల్వే స్టేషన్ సమీపంలో దొంగలు బట్టలు, బ్యాగులు కొనుగోలు చేశారు. అనంతరం తిరుమలగిరి ఏరియాలో బట్టలు మార్చుకుని బ్యాగ్‌లను మార్చేశారు. హైదరాబాద్ పాతబస్తీలో కొనుగోలు చేసిన ట్రాలీ బ్యాగ్స్‌ను అక్కడే వదిలేసి అక్కడి నుంచి పరారయ్యారు. తిరుమలగిరిలో దొంగలు వదిలేసి వెళ్లిన ఖాళీ ట్రాలీ బ్యాగులను తాజాగా పోలీసులు స్వాధీనం చేసుకున్నారు. అయితే, సుచిత్ర వైపు నిందితులు పరారైనట్లుగా పోలీసులు అనుమానం వ్యక్తం చేస్తున్నారు. ఈ మేరకు సీసీ కెమెరాలు జల్లెడ పడుతున్నారు. దొంగల్ని త్వరలోనే పట్టుకుంటామని పోలీసులు తెలిపారు.

కర్ణాటకలో దోపిడి.. హైదరాబాద్‌లో కాల్పులు

కర్ణాటకలోని బీదర్‌లో ఈనెల 16న ఉదయం ఈ ముఠా దోపిడీ చేసింది. శివాజీ చౌక్ వద్ద ఉన్న ఓ ఏటీఎం సెంటర్‌లో డబ్బులు పెట్టడానికి వచ్చిన వాహన సిబ్బందిపై కాల్పులు జరిపారు. ఈ కాల్పుల్లో ఒక సెక్యూరిటీ గార్డు మృతిచెందగా, మరో ఇద్దరికి తీవ్ర గాయాలు అయ్యాయి. అనంతరం రూ.93 లక్షల నగదుతో పారిపోయారు. పోలీసులు సంఘటన స్థలాన్ని పరిశీలించి, సీసీ కెమెరా ఆధారాల ద్వారా నిందితులను గుర్తించారు. దొంగలు హైదరాబాద్ చేరుకున్నారని పసిగట్టిన బీదర్ పోలీసులు నగరానికి వచ్చారు.

అఫ్జల్‌గంజ్‌లో వారున్న ప్రాంతాన్ని గుర్తించి చుట్టుముట్టారు. బీదర్ పోలీసుల్ని గుర్తుపట్టిన దొంగలు.. వారిపై కాల్పులు జరిపారు. పక్కనే ఉన్న ట్రావెల్స్ ఆఫీసులోకి చొరబడ్డారు. బీదర్ పోలీసులు వారిని పట్టుకునేందుకు ప్రయత్నించగా.. అక్కడి నుంచి డబ్బులతో పరారయ్యారు. ఈ కాల్పుల్లో నగరానికి చెందిన ఓ వ్యక్తి గాయపడ్డాడు. ప్రస్తుతం రెండు రాష్ట్రాల పోలీసులు దొంగల కోసం వేట కొనసాగిస్తున్నారు.