ఉద్యోగం పోయిందా.. పరువు కాపాడుకోవాలంటే ఈ కొత్త ట్రెండ్‌ను ఫాలో అవ్వాల్సిందే!

తక్కువ జీతం వస్తున్నా ఎక్కువ వస్తుందంటూ.. తాము చేసేది పెద్ద ఉద్యోగం అంటూ గొప్పలకు పోయే వాళ్లను మనం చాలానే చూసుంటాం. ముఖ్యంగా ఎలాంటి ఉద్యోగం లేకపోయినా.. ఇతర పట్టణాల్లో మంచి ఉద్యోగం చేస్తున్నారంటూ నమ్మించి అనేక మంది తమ పిల్లలకు పెళ్లిళ్లు చేయడం.. ఆపై వారు ఇంట్లో ఖాళీగా ఉంటే ఉద్యోగం లేదని తెలుసుకుని విడాకులు తీసుకున్న అమ్మాయిలను కూడా మనం బాగానే చూశాం. అలాంటి వారి కోసమే అన్నట్లు ఓ సరికొత్త ట్రెండ్ వచ్చేసింది. ముఖ్యంగా ఉద్యోగాలు లేకపోయినా వారి పరువు కాపాడే ఈ ట్రెండ్ ఏంటి.. దీన్ని ఎక్కడ ఎవరు ప్రారంభించారో మనం ఇప్పుడు తెలుసుకుందాం.

చైనాలో నిరుద్యోగం విపరీతంగా పెరిగిపోయింది. ఇప్పటికే ఉద్యోగాలు పొందిన వాళ్లను కూడా కంపెనీలు తీసేస్తూ.. వారిని నిరుద్యోగులుగా మారుస్తున్నారు. ఈక్రమంలోనే ఉద్యోగం కోల్పోయిన వారు, కొత్తగా ఉద్యోగం వచ్చిందని చెప్పి పెళ్లిళ్లు చేసుకోవాలనుకునే యువత సరికొత్త దారులు తొక్కుతోంది. ముఖ్యంగా "ఫేక్ జాబ్ ట్రెండ్"ను తీసుకు వచ్చారు కొంత మంది ఆలోచనాపరులు. అంటే ఉద్యోగం లేకపోయినా సరే ఉద్యోగం చేస్తున్నట్లు బిల్డప్ ఇచ్చే ఓ సరికొత్త ప్రయత్నంతో ముందుకు వచ్చారు.

 ఎవరైనా ఈ ఫేక్ జాబ్‌ను ఫాలో అవుతూ పరువును కాపాడుకోవాలనుకుంటే కొన్ని డబ్బులు చెల్లించాల్సి ఉంటుంది. ఆపై తమకు నచ్చిన ఉద్యోగాన్ని (ఉద్యోగి నుంచి సీఈఓ వరకు) సెలెక్ట్ చేసుకుని.. ఆపై సూటు, బూట్లు వేసుకుని ఆఫీసుకు వెళ్లవచ్చు. ఈ ఫేక్ ఆఫీసులు ఉదయం 10 గంటల నుంచి సాయంత్రం 5 గంటల వరకు అందుబాటులో ఉంటాయి. ఇవి అచ్చం నిజమైన ఆఫీసుల కనిపించేందుకు ఓ సెటప్ కూడా చేయబడి ఉంటుంది. ఉద్యోగం చేయాలనుకునేవారికి ఓ రకమైన ధర ఉండగా.. ఆ భవనాన్ని పూర్తిగా అద్దెకు తీసుకోవడానికి మరో ధర ఉంటుంది.

తామే కొత్తగా కంపెనీ పెట్టినట్లు చెప్పుకునే వాళ్లు.. రోజుకు 30 యువాన్లు అంటే 350 రూపాయలు చెల్లిస్తూ ఆ భవనాలను అద్దెకు తీసుకోవచ్చు. అలాగే అందులో బాసులుగా నటించాలంటే.. రోజుకు 580 రూపాయలు చెల్లించాల్సి ఉంటుంది. ఇక చిన్న చిన్న ఉద్యోగులుగా నటించేందుకు మరింత తక్కువ మొత్తంలో చెల్లించాల్సి ఉంటుంది. అయితే మరిన్ని డబ్బులు చెల్లిస్తే ఇక్కడే ఆహారం కూడా పొందవచ్చు. ఎవరి ముందైనా పరువు కాపాడుకోవాలనుకే ప్రతీ యువతీ, యువకుడికీ ఈ ఫేక్ జాబ్ ఎంతగానో ఉపయోపడుతుంది. ప్రస్తుతం ఈ ఫేక్ జాబ్ గురించి చైనాలో పెద్ద ఎత్తున ప్రకటనలు కూడా వస్తున్నాయి. దాంతోనే ఈ వార్త వైరల్ అయింది.