వారందరినీ అమెరికా నుంచి తరిమేస్తా.. ప్రమాణ స్వీకారానికి ముందు డొనాల్డ్ ట్రంప్ వార్నింగ్

 మరికొన్ని గంటల్లో అమెరికా అధ్యక్షుడిగా రెండోసారి డొనాల్డ్ ట్రంప్ ప్రమాణ స్వీకారం చేయనున్నారు. ఈ ప్రమాణ స్వీకార కార్యక్రమానికి ముందు ఆదివారం వాషింగ్టన్ డీసీలో డొనాల్డ్ ట్రంప్ విక్టరీ ర్యాలీ చేపట్టారు. ఈ మేక్‌ అమెరికా గ్రేట్‌ ఎగెయిన్‌ ర్యాలీలో పాల్గొన్న తన ఫ్యాన్స్, ఫ్రెండ్స్‌కు ట్రంప్ కృతజ్ఞతలు తెలిపారు. ఈ సందర్భంగా కొన్ని నెలల క్రితం జరిగిన అమెరికా ఎన్నికల ప్రచారంలో భాగంగా తాను ఇచ్చిన హామీలను ఈ 4 ఏళ్లలో నెరవేరుస్తామని మరోసారి స్పష్టం చేశారు. ఇందులో భాగంగా మరీ ముఖ్యంగా అమెరికాలో అక్రమంగా వలస ఉంటున్న వారికి బిగ్ షాక్ ఇచ్చారు. ఎట్టి పరిస్థితుల్లోనూ వారిని అమెరికాలో ఉండనీయనని తేల్చి చెప్పారు. ఇక అక్రమ వలసదారులు అమెరికాలో అడుగుపెట్టకుండా అన్ని చర్యలు తీసుకుని.. సరిహద్దులను పటిష్ఠం చేస్తామని ట్రంప్ హామీ ఇచ్చారు.

ఈ సందర్భంగా అమెరికాలోకి వచ్చే వలసలపై దూకుడుగా వ్యవహరించనున్నట్లు డొనాల్డ్ ట్రంప్ తెలిపారు. తాను అమెరికా అధ్యక్షుడిగా ప్రమాణ స్వీకారం చేసిన వెంటనే.. దేశంలోని అక్రమ వలసదారుల దండయాత్ర నిలిచిపోతుందని పేర్కొన్నారు. అమెరికా సరిహద్దుల నుంచి అక్రమంగా దేశంలోకి ప్రవేశించడాన్ని అడ్డుకుంటామని చెప్పారు. ఇక అమెరికా దేశ సంపదను అమెరికన్లే అనుభవిస్తారని వెల్లడించారు. ఇక అమెరికాలోకి అక్రమంగా వలసలు వచ్చిన వారిని సాగనంపే కార్యక్రమం.. దేశ చరిత్రలో నిలిచిపోనుందని డొనాల్డ్ ట్రంప్ పేర్కొన్నారు.

ఈ క్రమంలోనే ఎన్నికల హామీలు నెరవేరుస్తామని డొనాల్డ్ ట్రంప్ స్పష్టం చేశారు. ఇప్పటికే టిక్‌టాక్‌ యాప్‌ను తిరిగి అందుబాటులోకి తీసుకొచ్చినట్లు చెప్పారు. అమెరికా ఉద్యోగాలు చైనాకు తరలిపోవద్దని.. అందుకే టిక్‌టాక్‌ యాప్‌లో అమెరికా ప్రభుత్వం 50 శాతం భాగస్వామ్యం తీసుకోనున్నట్లు వెల్లడించారు. అధికారం చేపట్టక ముందే ట్రంప్‌ ఎఫెక్ట్‌తో ఇప్పటికే కొన్ని పనులు జరిగాయని.. అయితే ఇది తన ఎఫెక్ట్‌ కాదని.. అమెరికన్లు అందరి ఎఫెక్ట్‌ అని డొనాల్డ్ ట్రంప్ వివరించారు.

అమెరికన్‌ బలం, శ్రేయస్సు, గౌరవం, గర్వంతో సరికొత్తగా ప్రారంభించనున్నామని ట్రంప్ చెప్పారు. మహిళలకు సంబంధించిన ఆటల్లో ట్రాన్స్‌జెండర్లు పాల్గొనకుండా అడ్డుకుంటానని తన వైఖరిని వెల్లడించారు. అంతేకాకుండా జాన్‌ ఎఫ్‌ కెనడీ, రాబర్ట్ ఎఫ్‌ కెనడీ, మార్టిన్‌ లూథర్‌ కింగ్ జూనియర్‌ హత్య కేసులకు సంబంధించిన ఫైళ్లను అందరికీ తెలిసేలా బహిర్గతం చేస్తానని ట్రంప్ తెలిపారు. ప్రభుత్వం చేస్తున్న పనులు, తీసుకుంటున్న నిర్ణయాలకు సంబంధించి.. పాలనలో పారదర్శకతను తీసుకొచ్చేందుకు భవిష్యత్‌లో ఆదేశాలు జారీ చేయనున్నట్లు వివరించారు. ఇక మూడో ప్రపంచ యుద్ధం రాకుండా తాను అడ్డుకుంటానని ట్రంప్ హామీ ఇచ్చారు. అమెరికా అధ్యక్షుడిగా బాధ్యతలు స్వీకరించిన కొన్ని గంటల వ్యవధిలోనే ఇప్పటివరకు అధ్యక్షుడిగా కొనసాగిన జో బైడెన్ తీసుకున్న నిర్ణయాలు ఏవీ అమలు కాకుండా చూస్తానని ట్రంప్ స్పష్టం చేశారు.