రైల్వే ఉద్యోగికి అడ్డంగా దొరికిపోయిన ప్రయాణికుడు

రైలు ప్రయాణం అంటే ఎన్నో రకరకాల అనుభవాలు ఎదురవుతూ ఉంటాయి. అందులో కొన్ని మంచి అనుభవాలు అయితే.. మరికొన్ని మాత్రం భయంకరంగా ఉంటాయి. దూర ప్రయాణాలు చేసేవారు ఎక్కువగా రైళ్లపైనే ఆధారపడుతూ ఉంటారు. దీంతో వారు ఏం జరిగినా గమ్య స్థానాలు చేరేవరకు అలాగే ఓర్చుకుని ప్రయాణించాల్సిందే. అయితే రైళ్లలో జరిగే దొంగతనాలు, దోపిడీలు, దాడులు, భోజనం, ఆహార పదార్థాలకు సంబంధించిన వీడియోలు, రైలు శుభ్రత, బాత్రూంలు సహా అనేక వీడియోలు.. సోషల్ మీడియాలో వైరల్ అవుతూ ఉంటాయి. తాజాగా ఓ వ్యక్తి రైళ్లోని దుప్పట్లను దొంగిలించి పారిపోతుండగా.. రైల్వే సిబ్బంది పట్టుకున్నారు. ఆ వీడియోలు ఇప్పుడు వైరల్‌గా మారడంతో సోషల్ మీడియాలో నెటిజన్లు కామెంట్ల వర్షం కురిపిస్తున్నారు.

ఉత్తర్‌ప్రదేశ్‌లోని ప్రయాగ్‌రాజ్‌ రైల్వే స్టేషన్‌లో ఓ ప్రయాణికుడు రైల్వే ఉద్యోగులకు రెడ్ హ్యాండెడ్‌గా పట్టుబడ్డాడు. రైలులోని స్లీపర్ కోచ్‌లలో ప్రయాణికుల కోసం ఏర్పాటు చేసిన దుప్పట్లను ఎత్తుకెళ్లాలని నిర్ణయించుకున్నాడు. దీంతో తన లగేజీ బ్యాగులో పట్టిన కాడికి.. ఆ బెడ్ షీట్లను మలిచి పెట్టుకున్నాడు. అనంతరం రైలు దిగి.. బయటికి వెళ్తుండగా.. అక్కడే తనిఖీలు చేపట్టిన రైల్వే ఉద్యోగులకు షాకింగ్ దృశ్యం కనిపించింది. ఓ వ్యక్తి లగేజీని చెక్ చేయగా.. అందులో రైల్వేల్లో ఉపయోగించే బెడ్‌షీట్లు కనిపించడంతో అంతా అవాక్కయ్యారు.

అనేక వీడియోలు సోషల్ మీడియాలో వైరల్ అవుతున్నాయి. దీనిలో ప్రయాణీకులు కొన్నిసార్లు రద్దీ గురించి, కొన్నిసార్లు ఆహార లోపాల గురించి మాట్లాడుకోవడం కనిపిస్తుంది. ప్రయాణికులు రైళ్లలో అతి చేసిన సందర్భాలు, అందుకు సంబంధించిన వీడియోలు సోషల్ మీడియాలో చాలా వైరల్ అయ్యాయి. వాటిపై సోషల్ మీడియాలో తీవ్ర విమర్శలు వెల్లువెత్తుతున్నాయి. రైల్వే కంపార్ట్‌మెంట్ల నుంచి బెడ్ షీట్లు, టవల్స్ వంటి వస్తువులను దొంగిలించి తీసుకెళ్తున్నట్లు రైల్వే సిబ్బంది గుర్తించారు. “whoismayankk” అనే నెటిజన్ రెడ్డిట్‌లో ఒక వీడియోను షేర్ చేయగా ఇప్పుడు ఆ వీడియో కింద కామెంట్ల వర్షం కురుస్తోంది.

ఆ ప్రయాణికుడు చేసిన పనికి తీవ్రంగా మండిపడుతున్నారు. ఇలాంటి ప్రయాణికులను కఠినంగా శిక్షించాలని పలువు నెటిజన్లు డిమాండ్ చేశారు. అలా చేస్తేనే మరోసారి ఇలాంటి దొంగతనాలు జరగకుండా అడ్డుకోవచ్చని పేర్కొంటున్నారు. ప్రజలు ఇలాంటి చిన్న వస్తువులను కూడా దొంగిలించకుండా ఆపలేకపోవడం సిగ్గుచేటు అని మరో నెటిజన్ కామెంట్ చేశాడు. ఇలాంటి వారు చేయడం వల్ల భారతీయ రైల్వేలు నష్టాలను ఎదుర్కొంటోందని మండిపడుతున్నారు.