అమెరికాలో దుండగుల కాల్పులు.. హైదరాబాద్‌ యువకుడి మృతి

అమెరికాలో గన్ కల్చర్ రోజు రోజకూ పెరిగిపోతుంది. ఉన్నత విద్య, ఉజ్వల భవిష్యత్తు కోసం యూఎస్ వెళ్తున్న చాలా మంది తెలుగు యువత దుండగుల తూటాలకు బలవుతున్నారు. ఇండియన్స్ టార్గెట్‌గా గత కొంత కాలంగా కాల్పులు జరుగుతున్నాయి. ఇప్పటికే దుండగుల కాల్పుల్లో పదుల సంఖ్యలో తెలుగు యువత ప్రాణాలు కోల్పోయారు. తాజాగా.. హైదరాబాద్ నగరానికి చెందిన మరో యువకుడి అసువులు బాసాడు. ఉన్నత చదవుల కోసం వెళ్లి.. తన కలలు నెరవేరకుండానే ఓ దుండగుడి తుపాకి తూటాకు బలపోయాడు.

వివరాల్లోకి వెళితే.. హైదరాబాద్ నగరంలోని చైతన్యపురి పీఎస్ పరిధిలోని ఆర్కేపురం గ్రీన్ హిల్స్ కాలనీలో రవితేజ కుటుంబం నివాసం ఉంటుంది. వీరి స్వస్థలం నల్గొండ అయినా.. చాలా ఏళ్ల క్రితం నగరానికి వచ్చి ఇక్కడే స్థిరపడ్డారు. రవితేత ఉన్నత చదువులు చదివేందుకు గాను.. 2022 మార్చిలో అమెరికాకు వెళ్లాడు. అక్కడే మాస్టర్స్ పూర్తి చేసి ఉద్యోగ అన్వేషణలో ఉన్నాడు. ఈ క్రమంలో అమెరికా వాషింగ్టన్‌ ఏస్‌లో గత రాత్రి అతడిపై కాల్పులు జరిగాయి. ఓ దండుగుడు ఉన్నట్లుండి ఒక్కసారిగా విచక్షణారహితంగా కాల్పులు జరిపాడు. కాల్పుల్లో తీవ్రంగా గాయపడిన రవితేజ.. స్పాట్‌లోనే ప్రాణాలు కోల్పోయాడు.

విషయం తెలుసుకున్న స్థానిక పోలీసులు.. ఘటనాస్థలికి చేరుకుని మృతదేహాన్ని స్వాధీనం చేసుకున్నారు. అనంతరం భారత ఎంబసీ, స్నేహితుల ద్వారా రవితేజ మృతి సమాచారాన్ని హైదరాబాద్‌లోని కుటుంబసభ్యులకు తెలియజేశారు. యువకుడి మృతితో ఆర్కేపురం గ్రీన్ హిల్స్ కాలనీలో విషాదఛాయులు అలముకున్నాయి. విదేశాల్లో ఉన్నత చదువును పూర్తి చేసి.. అక్కడే ఉద్యోగం చేస్తూ తమకు అండగా ఉంటాడని భావించిన కుమారుడు అకాల మరణం చెందటం పట్ల తల్లిదండ్రులు కన్నీరు మున్నీరుగా విలపిస్తున్నారు. కాగా, రవితేజ మృతదేహాన్ని హైదరాబాద్ రప్పించేందుకు ఏర్పాట్లు జరుగుతున్నాయి.

కాగా, ఉన్నత చదువుల కోసమనో, ఉద్యోగం కోసమో అగ్రరాజ్యం అమెరికాకు వెళ్తున్న భారతీయుల పరిస్థితి అక్కడ దయనీయంగా మారుతోంది. ఎప్పుడు ఎట్నుంచి ఎవరు వచ్చి కాల్చిపడేస్తారోనన్న భయం వెంటాడుతోంది. యూఎస్‌లో విచ్చలవిడిగా గన్ లైసెన్స్‌లు ఇస్తుండంటంతో ఉన్మాదులు రెచ్చిపోతున్నారు. తరచుగా అమెరికాలో జరుగుతున్న కాల్పుల్లో భారతీయ యువకులు ప్రాణాలు కోల్పోతున్నారు. ఒక విషాదాన్ని మరువక ముందే మరో విషాదం చోటు చేసుకుంది.