ట్రంప్ గెలిచుంటే ఉక్రెయిన్‌తో యుద్ధమే ఉండేదు కాదు.. పుతిన్

ఉక్రెయిన్‌తో యుద్దంపై రష్యా అధినేత వ్లాదిమిర్ పుతిన్ ఆసక్తికర వ్యాఖ్యలు చేశారు. ఈ అంశంపై అమెరికా అద్యక్షుడు నాల్డ్ ట్రంప్‌తో చర్చించేందుకు తాను సిద్ధంగా ఉన్నానని ఉద్ఘాటించారు. ఈ మేరకు రష్యా అధికారిక టెలివిజన్‌ పుతిన్ మాట్లాడుతూ.. ట్రంప్‌పై ప్రశంసలు కురిపించారు. ఆయన స్మార్ట్‌ అంటూ ఆకాశానికెత్తేశారు. అంతేకాదు, 2020 అమెరికా ఎన్నికల్లో ట్రంప్‌ గనక విజయం సాధించి ఉంటే ఉక్రెయిన్‌తో యుద్ధం వచ్చుండేది కాదని వ్యాఖ్యానించారు. కానీ, అమెరికాతో సంప్రదింపులు విషయమై మాత్రం పుతిన్‌ స్పష్టతనివ్వలేదు. పుతిన్‌ను కలిసి మాట్లాడేందుకు తాను ఎదురుచూస్తున్నట్టు ఇటీవల ట్రంప్‌ ఇటీవల వెల్లడించింది విషయం తెలిసిందే. అయితే, వాషింగ్టన్‌ నుంచి పిలుపుకోసం తాను ఎదురుచూస్తున్నట్లు పుతిన్‌ అన్నారు.

ఈ క్రమంలో ఉక్రెయిన్‌తో సంఘర్షణకు సంబంధించి సంప్రదింపులకు సిద్ధంగా ఉన్నామని స్పష్టం చేసిన క్రెమ్లిన్ అధినేత... ఇప్పటికే దీనిపై ఎన్నో సార్లు చెప్పామని, మళ్లీ ఇదే చెబుతున్నామని తెలిపారు. ఇదే సమయంలో అమెరికా నూతన అధ్యక్షుడ్ని పుతిన్ పొగడ్తల్లో ముంచెత్తారు. ట్రంప్‌ ఎంతో చురుకైన వ్యక్తి అని, చెప్పింది చేసి చూపిస్తారని అన్నారు. 2020 అమెరికా ఎన్నికల్లో ట్రంప్‌ గెలిచి ఉంటే. ఒకవేళ ఆయన విజయాన్ని తస్కరించకపోయి ఉంటే ఉక్రెయిన్‌-రష్యా మధ్య సంఘర్షణ ఉండేది కాదన్నారు. గతంలో అనేకసార్లు 2020 ఎన్నికల గురించి ట్రంప్ ఇదే వాదన చేసిన విషయం తెలిసిందే. ఎన్నికల్లో రిగ్గింగ్‌ జరిగిందని, తన గెలుపును లాక్కున్నారని ఫలితాల అనంతరం పదేపదే ట్రంప్ ఆరోపించారు.

కాగా, అమెరికా అధ్యక్షుడి బాధ్యతలు చేపట్టిన తర్వాత మరోసారి ఉక్రెయిన్‌-రష్యా యుద్ధంపై ట్రంప్ స్పందించారు. సంఘర్షణ ముగించేలా పుతిన్ చర్చలకు రాకుంటే రష్యాపై మరిన్ని ఆంక్షలు తప్పవని హెచ్చరించారు. యుద్ధాన్ని ఆపకుంటే రష్యాపై అధిక టారిఫ్‌లు, పన్నులు వడ్డిస్తామని, పలు ఆంక్షలు విధిస్తానని అని ఓ ఇంటర్వ్యూలో ట్రంప్‌ స్పష్టం చేశారు. అంతేకాకుండా, ఇటీవల దావోస్‌ వేదికగా జరిగిన ప్రపంచ ఆర్థిక సదస్సులోనూ ఉక్రెయిన్‌ సంక్షోభంపై ట్రంప్ మాట్లాడారు. చమురు ధరలు తగ్గించాలని సౌదీ సహా ఒపెక్‌ (పెట్రోలియం ఎగుమతి దేశాల కూటమి)‌ను కోరతానని, ఒకవేళ వాటి ధరలు తగ్గితే అప్పుడు రష్యా-ఉక్రెయిన్‌ యుద్ధం ముగుస్తుందని అని ట్రంప్‌ అశాభావం వ్యక్తం చేశారు. ఈ నేపథ్యంలో రష్యా అధ్యక్షుడు వ్యాఖ్యలకు ప్రాధాన్యత ఏర్పడింది.

ఉక్రెయిన్ యుద్ధంతో రష్యా, అమెరికాల మధ్య గతంలో ఎన్నడూ లేనివిధంగా సంబంధాలు దెబ్బతిన్నాయి. రష్యాపై ఆర్ధిక ఆంక్షలు విధించిన అమెరికా దాని మిత్ర దేశాలు.. ఉక్రెయిన్‌కు ఆయుధ, సైనిక సహకారం అందిస్తున్నాయి. మరోవైపు, పుతిన్ వ్యాఖ్యలపై ఉక్రెయిన్ స్పందిస్తూ.. చర్చల్లో ఎటువంటి మినహాయింపులు ఉండబోవని హెచ్చరించింది. ‘అతడు (పుతిన్) ఐరోపా లేకుండా యూరప్ గురించి చర్చలు జరపాలనుకుంటున్నాడు.. ఉక్రెయిన్ లేకుండా ఉక్రెయిన్ గురించి మాట్లాడాలనుకుంటున్నాడు’ ఉక్రెయిన్ అధ్యక్ష భవనం చీఫ్ ఆండ్రీ యెర్మాక్ అన్నారు. కానీ, ‘ఇది జరగదు. పుతిన్ వాస్తవికతకు తిరిగి రావాలి.. లేకుంటే ఆయన్ను తిరిగి తీసుకొస్తాం.... ఆధునిక ప్రపంచంలో ఇది కుదరదు’ అని స్పష్టం చేశారు.