ప్రేమ పెళ్లి.. భర్త దొంగ అని తెలిసి ఇద్దరు పిల్లలను చంపి ఆపై తాను సూసైడ్

ఆమె ఓ యువకుడిని ప్రేమించింది. అతడ్నే పెళ్లి చేసుకుంటానని మెుండికేసింది. అందుకు తల్లిదండ్రులు ఒప్పుకోలేదు. ఏ పని లేకుండా జులాయిగా తిరిగే అతడితో పెళ్లేంటని కూతుర్ని ప్రశ్నించారు. జీవితంలో పెద్ద తప్పు చేస్తున్నావని హెచ్చరించారు. అయినా వినిపించుకోకుండా అతడినే పెళ్లాడింది. ఆ తర్వాత ఇద్దరు పిల్లలు పుట్టారు. అయితే తన భర్త ఏ పని చేయకుండా ఇన్నాళ్లు ఖాళీగా తిరిగినా ఆమె ఏనాడు పట్టించుకోలేదు. కానీ అతడు ఓ దొంగ అని తెలిసి తీవ్ర మనస్థాపానికి గురైంది. తల్లిదండ్రుల మాట వినుంటే ఈ పరిస్థితి వచ్చేది కాదని మనసులో భావించింది. ఇక భూమ్మీద బతికి లాభం లేదని.. ఏ పాపం తెలియని ఇద్దరు పిల్లలను చంపేసి తాను కూడా ఆత్మహత్య చేసుకుంది. ఈ విషాదకర ఘటన ఖమ్మం జిల్లాలో చోటు చేసుకుంది.

వివరాల్లోకి వెళితే.. సూర్యాపేట జిల్లాకు చెందిన మౌనిక తల్లిదండ్రులు ప్రభుత్వ లెక్చరర్లు. వీరి కుటుంబం హైదరాబాద్ నగరంలో స్థిరపడింది. పదేళ్ల క్రితం డిగ్రీ పూర్తయిన తర్వాత పోటీ పరీక్షల కోసం మౌనిక ఓ రోజు ట్రైన్‌లో విజయవాడ బయల్దేరింది. ఖమ్మం జిల్లా మధిర మండలం నిదానపురం గ్రామానికి చెందిన షేక్‌ బాజీ కూడా అదే ట్రైన్‌లో ప్రయాణం చేయగా.. అతడితో మౌనికకు పరిచయం ఏర్పడింది. బాజీది నిరుపేద వ్యవసాయ కుటుంబం. ఉన్న కొద్దిపాటి పొలాన్ని తల్లిదండ్రులు సాగు చేస్తూ.. కూలీ పనులకు కూడా వెళ్లేవారు.

డిగ్రీ పూర్తి చేసిన బాజీ పోటీ పరీక్షల శిక్షణ కోసం విజయవాడ వెళుతుండగా ఇద్దరికీ పరిచయం ఏర్పడింది. ఇద్దరూ ఒకే ఇన్‌స్టిట్యూట్‌లో చేరారు. ఆ తర్వాత ఒకరిపై ఒకరు మనసు పడ్డారు. పెళ్లి చేసుకోవాలని డిసైడ్ అయ్యారు. ప్రేమ వ్యవహారం తల్లిదండ్రులకు తెలియగా.. మౌనిక పేరెంట్స్ పెళ్లికి ఒప్పుకోలేదు. దీంతో విషయం ఖమ్మం పోలీస్‌ స్టేషన్‌కు చేరింది. తాను మేజర్‌ అని.. ఇష్ట ప్రకారమే పెళ్లి చేసుకుంటున్నానని మౌనిక చెప్పటంతో పోలీసులు ఆమె తల్లిదండ్రులకు కౌన్సిలింగ్ ఇచ్చి పంపించారు. దీంతో పుట్టింటితో మౌనికకు పూర్తిగా సంబంధాలు తెగిపోయాయి.

ఆ తర్వాత ముస్లిం సంప్రదాయ పద్ధతిలో మౌనికను బాజీ వివాహం చేసుకున్నాడు. ఆమె పేరును మౌనిక నుంచి ప్రేజా మార్చారు. కొన్నాళ్లుకు వీరికి మెహక్‌ (5), మెనురూల్‌ (4) కూతుళ్లు సంతానంగా కలిగారు. మెుదట్నుంచి ఏ పని చేయకుండా జులాయిగా తిరిగే బాజీ.. కుటుంబాన్ని ఏదో ఓ రకంగా నెట్టుకొచ్చేవాడు. అయితే రెండ్రోజుల క్రితం పోలీసులు ఇంటికి రావటంతో ఇన్నాళ్లు అతడు దొంగతనాలకు పాల్పడుతూ కుటుంబాన్ని పోషిస్తున్నాడనే విషయం ప్రేజాకు తెలిసింది. బైక్‌లు, సెల్‌ఫోన్లు, చైన్‌ స్నాచింగ్‌ కేసుల్లో ఖమ్మం పోలీసులు బాజీని అదుపులోకి తీసుకున్నారు. దీంతో ప్రేజా షాక్‌కు గురైంది. పోలీసులు భర్తను అదుపులోకి తీసుకోవడాన్ని అవమానంగా భావించింది. ఈ ఘటనపై బంధువుల్లోనూ ప్రచారం జరగడంతో ఇక తాను గౌరవంగా జీవించలేనని.. అటు పుట్టింటికీ వెళ్లే పరిస్థితి లేదని భావించింది. ఏ పాపం తెలియని ఇద్దరు పసిపిల్లలకు ఉరేసి ఆపై తాను కూడా ఉరేసుకొని సూసైడ్ చేసుకుంది. దీంతో గ్రామంలో విషాద ఛాయలు అలుముకున్నాయి.