'భాగమతి' రీమేక్ కి బాలీవుడ్‌ రెడీ...!

అసలు బాలీవుడ్ ఇండస్ట్రీకి ఏమైంది? ఒక్కసారిగా టాలీవుడ్ కథలపై పడింది. అక్కడ దర్శకులకు కథలు తక్కువయ్యాయా, లేక మన కథలతో సినిమా తీస్తేనే వారికి హిట్లు వస్తున్నాయా. 2019 బాలీవుడ్‌కు రీమేక్ నామ సంవత్సరం అనే చెప్పాలి. తెలుగులో బ్లాక్ బస్టర్ విజయాలు అందుకున్న సినిమాలన్నీ ఇప్పుడు బాలీవుడ్‌లో రీమేక్ అయ్యేందుకు వరుస కట్టాయి. ఇలా ఓ తెలుగు సినిమా రిలీజ్ అవడం.. అలా బాలీవుడ్‌లో రీమేక్ రెడీ అయిపోవడం. మన సినిమాలను వారు రీమేక్ చేయడంలో తప్పు లేదు. అది మనకే గర్వకారణం. కానీ మన మార్కెట్ విలువ పెంచిన సినిమాలన్నీ అక్కడ కూడా బాగా ఆడతాయన్న నమ్మకం లేదు. అన్ని సినిమాలు ‘కబీర్ సింగ్’లా బ్లాక్ బస్టర్ అవుతాయన్న గ్యారెంటీ లేదు కదా. అయినా సరే అక్కడి దర్శకులు, నిర్మాతలు తెలుగు కథలకే ఓటేస్తు్న్నారు. మున్ముందు బాలీవుడ్‌లో విడుదలయ్యేవన్నీ మన సినిమాలకు రీమేక్‌లే. ఇప్పుడు మరో బ్లాక్ బస్టర్ సినిమా రీమేక్‌కు సంబంధించిన చర్చ ఒకటి జరుగుతోంది. అదే.. భాగమతి. ‘అందరి లెక్కలు తేలాలి’ అంటూ అనుష్క బాక్సాఫీస్ లెక్కల్ని కూడా తేల్చేసిన సినిమా ఇది. ఇప్పుడు ఈ సినిమాను హిందీలోనూ రీమేక్ చేయాలనుకుంటున్నారట. భాగమతి సినిమాను తెరకెక్కించిన భాగమతి సినిమా దర్శకుడు అశోక్‌కు బాలీవుడ్‌లో బంపర్ ఆఫర్ తగిలిందని విశ్వసనీయ వర్గాల సమాచారం. ఓ ప్రముఖ నిర్మాణ సంస్థ భాగమతి సినిమాను రీమేక్ చేయాలని అశోక్‌ను కోరిందట. అనుష్క పాత్రలో బాలీవుడ్ నటి భూమి పెడ్నేకర్‌ను ఎంపిక చేసుకున్నట్లు తెలుస్తోంది. అనుష్క స్థాయిలో ఆమె పెర్ఫాం చేయలేరని పలువురు అభిమానులు అంటున్నారు. అనుష్కకు తగ్గ నటిని ఎంపిక చేసుకోవాలని సూచిస్తున్నారు. ‘సాండ్ కీ ఆంఖ్’ సినిమాలో భూమి నటనకు మంచి మార్కులు పడ్డాయి. ఈ సినిమా చూశాకే భాగమతి రీమేక్‌లో నటించే అవకాశం ఇచ్చారట. భాగమతి లాంటి సినిమాను భూమి తన భుజాలపై మోయలేదనే చెప్పాలి. ఎందుకంటే ఇప్పటివరకు భూమి మంచి కాన్సెప్ట్ ఉన్న సినిమాల్లో నటించారు కానీ భాగమతి లాంటి లేడీ ఓరియెంటెడ్ సినిమాను తన భుజాలపై వేసుకోగలిగేంత పెర్ఫామెన్స్ ఉన్న సినిమాల్లో నటించలేదు. ఒకవేళ సినిమాలో భూమిని తీసుకుంటే ఆమె కెరీర్‌కు ప్లస్ పాయింట్ అవుతుంది. మరి విమర్శకుల అంచనాలను తలకిందులు చేసేలా భూమి తన నటనతో ఆకట్టుకుంటారో లేదో వేచి చూడాలి.