మా ఇంటో రెండు కులాల వారున్నారు: విజయేంద్ర ప్రసాద్

కలాన్ని నమ్ముకున్నోడికి కులంతో పనేంటెహే.. అదే ఉంటే ఆ కలం నుంచి వచ్చేవి అక్షరాలు వక్రభాష్యాలే అవుతాయి తప్ప.. సక్రమం ఎలా అవుతుంది. అందుకే తన కలానికికే కాదు తనకీ కులం ఫీలింగ్ లేదంటున్నారు లెజెండరీ రైటర్, రాజమౌళి తండ్రి విజయేంద్రప్రసాద్. తన కలం నుంచి పుట్టుకొచ్చిన కథలతో రికార్డుల కోటల్ని బద్దలు కొట్టి.. కలెక్షన్ల వర్షం కురిపిస్తున్న విజయేంద్ర ప్రసాద్ తాజాగా చిత్రం ఆర్ఆర్ఆర్ శుక్రవారం నాడు విడుదలై బ్లాక్ బస్టర్ హిట్ చిత్రంగా నిలిచింది. ఈ సందర్భంగా ప్రముఖ ఛానల్‌తో చిత్ర విశేషాలను పంచుకున్న ఆయన.. తన పర్సనల్ విషయాలను షేర్ చేసుకుంటూ సామాజిక రుగ్మతగా మారిన కులం గురించి ఆసక్తికరమైన వ్యాఖ్యలు చేశారు. ఈ కులంకంపులోకి రైటర్‌ని లాగాలని.. యాంకర్ ఓ పిచ్చి ప్రశ్నవేశాడు.. ఎన్టీఆర్, రామ్ చరణ్‌లు వేరే వేరు కులాలు కావడంతో.. ఆ ఇద్దరికీ కథ రాయడం వెనుక ఏదైనా రాజకీయం నేపథ్యం ఉందా? అన్న కోణంలో ప్రశ్న వేయగా.. కలం నమ్ముకున్న తనకి కులంతో పనేంటి అన్నట్టుగా సమాధానం ఇచ్చారు విజయేంద్రప్రసాద్. మాది లవ్ మ్యారేజ్.. విశాఖపట్నం అమ్మాయిని పెళ్లి చేసుకున్నా. నాది కమ్మ కులం. ఆ అమ్మాయిది కమ్మ కులం కాదన్న వరకే నాకు తెలుసు. ఎప్పుడూ ఆమెను నీ కులం ఏంటని ఎప్పుడూ అడగలేదు. 1966లో మాకు పెళ్లైంది. 2017 ఖైదీ నెం.150 రిలీజ్ అయ్యేవరకూ కూడా ఆమె కులం ఏంటో నాకు తెలియదు. ఆ సినిమా రిలీజ్ అప్పుడు ఆమె మా చిరంజీవి అని అన్నది.. ఏంటి మా చిరంజీవి అంటున్నావ్ అంటే.. మరి మా కాపులు కదండీ అన్నది. అలా నా భార్య క్యాస్ట్ ఏంటో నాకు చిరంజీవి సినిమా ద్వారా తెలిసింది.. (నవ్వుతూ) సో.. మా ఇంట్లోనే మా ఇద్దరిలోనే రెండు కులాలు ఉన్నాయి. కులం అనే పట్టింపే మాకు లేదు. మా ఇంట్లో ఎవరికీ క్యాస్ట్ ఫీలింగ్ ఉండదు. మా అమ్మాయి ఓ మలయాళీ అబ్బాయిని చేసుకుంది. మా అన్నయ్య గారి అబ్బాయి కాపుల అమ్మాయిని చేసుకుంది. ఇంకో అన్నయ్యగారి అబ్బాయి రెడ్లు అమ్మాయిని చేసుకున్నాడు. కులం అనే దానిపైనే మాకు నమ్మకం లేదు.. అలాంటప్పుడు కులం పేరు చెప్పుకోవడం హాస్యాస్పదం’ అని అన్నారు విజయేంద్ర ప్రసాద్. ఇదిలావుంటే విజయేంద్రప్రసాద్ భార్య.. భర్త, కొడుకు సక్సెస్‌ని చూడకుండానే కన్నుమూశారు. బాహుబలి రిలీజ్‌కి ముందే విజయేంద్రప్రసాద్ భార్య రాజనందిని తీవ్ర అనారోగ్యంతో కొన్నాళ్ల పాటు కోమా ఉండి కన్నుమూశారు.