గడ్డి మేయడానికి వెళ్లిన దున్నపోతు.. రెండు రాష్ట్రాల పోలీసులకు పనిచెప్పిందిగా

కుక్క పిల్ల, సబ్బుబిళ్ల, అగ్గిపుల్ల.. కాదేదీ కవితకు అనర్హమని అప్పట్లో శ్రీశ్రీ మహానుభావుడు అన్నారు. ఆయన ఏ ఉద్దేశంతో అన్నారో కానీ.. ఈ కవితకు అర్థం మార్చేస్తున్నారు ఇవాళ్టి జనం. కుక్క పిల్ల.. కోడి పిల్ల.. దున్నపోతు.. కాదేదీ కయ్యానికి అనర్హం అంటూ కొత్త భాష్యం చెప్తున్నారు. ఈ వివరాల్లోకి వెళ్తే.. అనగనగా ఓ దున్నపోతు. ఆ దున్నపోతు కోసం రెండూర్ల కొట్లాట. మాదంటే మాదంటూ పొట్టుపొట్టున కొట్టుకున్నారు. ఇక్కడ ట్విస్ట్ ఏంటంటే అందులో ఒక ఊరు ఆంధ్రప్రదేశ్‌లోది అయితే మరో ఊరు కర్ణాటకలోనిది. దున్నపోతు కోసం ఈ రెండు గ్రామాలు భీకరంగా కొట్టుకున్నాయి. తమ సమస్యను పరిష్కరించండి మహాప్రభో అంటూ పోలీసుల వద్దకు పంచాయతీ చేరింది. అటువైపు కర్ణాటక పోలీసులు, ఇటువైపు ఏపీ పోలీసులు రంగంలోకి దిగారు. అయితే ఈ దున్నపోతు పంచాయతీ ఎందుకు మొదలైంది.. ఎలాంటి మలుపులు తిరిగింది. ఎలా శుభంకార్డు పడిందనేది ఇప్పుడు చూద్దాం.

కర్ణాటకలోని బళ్లారి జిల్లా బొమ్మనహాల్ గ్రామం.. ఈ ఊరిజనం ఐదేళ్లకోసారి సక్కమ్మ దేవి ఉత్సవాలు నిర్వహిస్తారు. ఈ సారి కూడా జనవరి నెలలో ఈ ఉత్సవాన్ని ఘనంగా నిర్వహించేందుకు ఏర్పాట్లు చేసుకున్నారు. జాతరలో భాగంగా అమ్మవారికి సమర్పించేందుకు ఓ దున్నపోతును కూడా సిద్ధం చేసుకున్నారు. అయితే ఇక్కడ కథ అనుకోని మలుపు తిరిగింది. ఈ దున్నపోతు తమదంటూ ఆంధ్రప్రదేశ్‌లోని కర్నూలు జిల్లా మేడేహాల్ గ్రామ ప్రజలు గొడవకు దిగారు. బొమ్మనహాల్, మేడేహాల్ గ్రామాల మధ్య సుమారుగా 20 కిలోమీటర్ల దూరం ఉంటుంది. అయితే తమ దున్నపోతును మేత కోసం వదిలితే.. దారి తప్పి మేడేహాల్ చేరిందని బొమ్మనహాల్ గ్రామ ప్రజల వాదన. కాదు కాదు.. ఈ దున్న తమదేనని మేడేహాల్ గ్రామవాసుల వాదన.

తమ దున్నపోతు మేడేహాల్ గ్రామంలో ఉన్న విషయం తెలుసుకున్న బొమ్మనహాల్ ప్రజలు.. దున్నపోతును వెనక్కి తెచ్చుకునేందుకు మేడేహాల్ వెళ్లారు. అయితే దున్నను ఇవ్వడానికి మేడేహాల్ వాసులు తిరస్కరించారు. దీంతో దున్నపోతు కోసం రెండు గ్రామాల ప్రజల మధ్య గొడవ జరిగింది. చివరకు ఈ విషయం పోలీసులను చేరింది. ఈ దున్నపోతు పంచాయితీని తేల్చాలంటూ బళ్లారి జిల్లా మోకా పోలీసులను రెండు గ్రామాల ప్రజలు ఆశ్రయించారు. దున్నపోతు తమదేనని.. దున్నపోతు తల్లి కూడా తమ వద్దే ఉందని బొమ్మనహాల్ ఊరిజనం పోలీసులకు చెప్పారు. కావాలంటే డీఎన్ఏ పరీక్ష చేసుకోవాలన్నారు. అటు మేడేహాల్ వాసులు కూడా దున్నపోతుకు డీఎన్ఏ పరీక్ష చేయాలని పట్టుబట్టారు. దీంతో ఈ వ్యవహారం హాట్ టాపిక్‌గా మారింది.

అయితే ఈ సమస్యను పోలీసులు శాంతియుతంగా పరిష్కరించారు. ఏపీ, కర్ణాటక పోలీసులు కలిసి సమన్వయంతో ఈ సంక్లిష్టమైన దున్నపోతు సమస్యను సామరస్యపూర్వకంగా పరిష్కరించారు. బళ్లారి జిల్లా మోకా పోలీసులు, కర్నూలు జిల్లాలోని హళహర్వి పోలీసులు రెండు గ్రామాల ప్రజలను కూర్చొబెట్టి కౌన్సిలింగ్ ఇచ్చారు. ఈ సమస్యకు ఇక్కడితో ఫుల్ స్టాప్ పెట్టాలని.. మరోసారి ఇలాంటి గొడవలు జరగకూడదంటూ స్ట్రాంగ్ వార్నింగ్ ఇచ్చారు. దీంతో బొమ్మనహాల్ ప్రజలకు దున్నపోతును అప్పగించేందుకు మేడేహాల్ ప్రజలు అంగీకరించారు. దీంతో సమస్యకు పరిష్కారం లభించింది.