అమ్మకు అక్క అంటేనే ఎక్కువ ఇష్టం.. నేనంటే ప్రేమ లేదు, అందుకే చంపేశా

ఇద్దరు, ముగ్గురు పిల్లలు ఉన్న చాలా ఇళ్లల్లో ఒక సమస్య ఉంటుంది. తల్లిదండ్రులు తనని కాకుండా చెల్లెను, అక్కను, తమ్ముడ్ని, అన్నను ఎక్కువ ప్రేమిస్తారని, వారికే ఎక్కువ ప్రాధాన్యతనిస్తారని చాలా మంది అన్నదమ్ముల్లో, అక్కాచెల్లెల్లో ఉంటుంది. చాలా సందర్భాల్లో ఇది బయటపడుతూనే ఉంటుంది. కొంత మంది నేనంటే నీకేం ఇష్టం లేదు, అక్క లేదా అన్న అంటేనే ఇష్టం అని పిల్లలు చెబుతుంటే సరదాగా నవ్వుకుంటారు తల్లిదండ్రులు.

ఒకరి కంటే ఎక్కువ పిల్లలు ఉన్న ఇంట్లో ఇలాంటి గొడవలు, అలగటాలు చాలా సాధారణం. ఇలాంటి గొడవ ముంబయిలో ఏకంగా ఒకరి ప్రాణాలు తీసింది. అమ్మ తనను కాకుండా అక్కను ఎక్కువ ఇష్టపడుతుందని, తననే ఎక్కువ ప్రేమిస్తుందని భావించిన చెల్లెలు అతి కిరాతకంగా తన తల్లిని చంపేసింది.

ఒళ్లు గగుర్పొడిచే ఈ ఘటన ముంబయి కుర్లాలోని ఖురేషి నగర్ లో గురువారం వెలుగుచూసింది. రేష్మా ముజఫర్ ఖాజీ అనే 41 ఏళ్ల మహిళ ఇంటికి వచ్చిన తన తల్లిపై కూరగాయలు తరిగే కత్తితో కిరాతకంగా పొడిచి చంపేసింది. అనంతరం దగ్గర్లోని పోలీసు స్టేషన్ కు వెళ్లి నేనే చంపేసా, అరెస్టు చేయండి అంటూ లొంగిపోయింది.

అసలేం జరిగిందంటే..

సబీరా బానో అజ్గర్ షేక్ అనే 62 ఏళ్ల మహిళలకు ముగ్గురు సంతానం. ఇద్దరు కుమార్తెలు, ఒక కుమారుడు. ప్రస్తుతం ఆమె తన కుమారుడి వద్ద ఉంటోంది. గురువారం నాడు ఆమె తల్లి చిన్న కూతురు అయిన రేష్మా ముజఫర్ ఖాజీ ఇంటికి వెళ్లింది. కూతుర్ని చూడటానికి వచ్చిన తల్లిలో రేష్మా వాగ్వాదానికి దిగింది. నీకు అక్క అంటేనే ఎక్కువ ఇష్టం, నేనంటే నీకెప్పుడూ ఇష్టం లేదంటూ తల్లిపై కోపగించుకుంది. ఇద్దరి మధ్య తలెత్తిన వాగ్వాదం కాస్త చిలికి చిలికి గాలివానలా మారింది. కోపంతో ఊగిపోయిన రేష్మా.. కిచెన్ లో ఉన్న కూరగాయలు తరిగే కత్తితో సబీరాను కిరాతంగా పొడిచింది. తీవ్ర గాయాలతో రక్తమోడుతూ సబీరా అక్కడికక్కడే ప్రాణాలు కోల్పోయింది.

అనంతరం చునాభట్టి పోలీస్ స్టేషన్ కు వెళ్లి తాను తన తల్లిని చంపానని పోలీసులకు చెప్పింది. అధికారులు వెంటనే సంఘటనా స్థలానికి వెళ్లి తల్లి మృతిని నిర్ధారించారు. అనంతరం రేష్మాను అదుపులోకి తీసుకున్నారు.