ఫుల్లుగా తాగొచ్చి కుమార్తెపై లైంగిక దాడి.. భర్తను రెండు ముక్కలు చేసి పొలాల్లో పడేసిన భార్య

భర్త తాగుబోతు, తిరుగుబోతు అయినా సరే భార్య భరిస్తుంది. అతను ఏ పనీ చేయకుండా ఆస్తి, పాస్తులన్నీ అమ్మి ఖాళీగా తిరిగినా సరే కష్టపడి మరీ కుటుంబాన్ని సాకుతుంది. అలాగే చేసిందో మహా ఇల్లాలు. కానీ ఆ విషయం అర్థం చేసుకోని ఆమె భర్త రోజూ తాగొస్తూ.. శారీరక సుఖం కోసం భార్యను హింసించేవాడు. తాజాగా మద్యం సేవించి వచ్చిన భర్త పడక సుఖం కోసం పక్కకు వచ్చాడు. విపరీతమైన వాసన, కోపంతో భార్య ఛీ పొమ్మంది. దాంతో అతడు వావీ వరసలు మరిచి మరీ కన్నకూతురిపైనే లైంగిక దాడికి యత్నించాడు. ఆ విషయం గుర్తించిన ఆ ఇల్లాలు ఉగ్రకాళిగా మారి అతడిని బండరాయితో మోది చంపేసింది. ఆపై మృతదేహాన్ని రెండు ముక్కలు చేసి పంట పొలాల్లో పడేసింది. ఇదెక్కడ జరిగిందో మనం ఇప్పుడు తెలుసుకుందాం.

కర్ణాటకలోని బెళగావి జిల్లా చిక్కోడి తాలూకా ఉమారాణి గ్రామానికి చెందిన 50 ఏళ్ల శ్రీమంత్ రామప్ప ఇట్నాలేకు భార్య సావిత్రి, ఓ కూతురు ఉన్నారు. అయితే చాలా ఏళ్లుగా మద్యానికి బానిస అయిన ఇట్నాలే.. రోజూ తాగొస్తూ ఇంట్లో వాళ్లతో గొడవ పడేవాడు. భార్య దగ్గర ఉన్న డబ్బులన్నీ తీసుకెళ్తూ ఫుల్లుగా తాగేవాడు. అయితే కొంత కాలంగా ఆమెకు ఉన్న ఓ భూమిని అమ్మేసి తనకు ద్విచక్ర వాహనం కొనివ్వమని అడుగుతున్నాడు.

కానీ సావిత్రి మాత్రం అది తన కూతురు పెళ్లి కోసమని చెబుతూ.. అమ్మేందుకు ఒప్పుకోలేదు. చాలా రోజులుగా వీరిద్దరి మధ్య ఈ గొడవ జరుగుతోంది. అయితే ప్రతిరోజూ లాగే బుధవారం కూడా ఫుల్లుగా మద్యం సేవించిన ఇట్నాలే.. రాత్రిపూట ఇంటికి చేరాడు. ఆపై పడక సుఖం కోసం భార్య సావిత్ర పక్కకు వెళ్లాడు. కానీ అతడు తాగి రావడం, అందులోనూ ప్రతిరోజూ హింసించడంతో ఆమె నిరాకరించింది. ఛీ పొమ్మని గెంటేసింది. దీంతో ఆమె గది నుంచి బయటకు వచ్చిన అతడు కూతురుపై లైంగిక దాడికి పాల్పడ్డాడు.

విషయం గుర్తించిన సావిత్రి ఉగ్రకాళిలా మారిపోయింది. తీవ్ర కోపంతో ఒక్కసారిగా భర్తపై విరుచుకు పడింది. ముఖ్యంగా పక్కనే ఉన్న ఓ బండరాయి తీసి భర్త తలపై మోదింది. దీంతో తీవ్ర గాయాలపాలైన ఇట్నాలే ప్రాణాలు కోల్పోయాడు. అయినా ఆమె కోపం చల్లారకపోవడంతో ఓ కత్తి తీసి మృతదేహాన్ని రెండు ముక్కలు చేసింది. ఆపై వాటిని డ్రమ్ముల్లో వేసి ఇంటి వెనకాల పొలంలో పడేసింది. ఆ తర్వాత ఇంటికి తిరిగి వచ్చి స్నానం చేసింది. రక్తంతో తడిచిన తన చీరను కాల్చి బూడిద చేసింది. ఆపై బూడిదను కూడా పొలాల్లో పడేసింది. ఇదంతా అక్కడే ఉండి చూస్తున్న కుమార్తెకు.. ఈ విషయం ఎవరికీ చెప్పొద్దని వివరించింది.

కానీ పంట పొలాల్లో మృతదేహం కనిపించడంతో.. స్థానికులు పోలీసులకు ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేపట్టారు. ఈక్రమంలోనే ఇంటికి వచ్చి భార్య సావిత్రిని విచారించారు. ఈక్రమంలోనే ఆమే అతడిని చంపినట్లు ఒప్పుకుంది. కుమార్తెపై భర్త లైంగిక దాడి చేయడాన్ని తట్టుకోలేక హత్య చేసిన వివరించింది. దీంతో కేసు నమోదు చేసుకున్న పోలీసులు సావిత్రిని అరెస్ట్ చేశారు.