ఇక ఆ నిబంధన కంపల్సరీ: ఎల్ఐసీ

ఈ నెలలో జారీ చేసిన నోటిఫికేషన్‌లో ఎల్‌ఐసీ ఓ క్లారిటీ ఇచ్చింది. ‘‘పబ్లిక్ ఆఫరింగ్‌లో పాల్గొనాలంటే, పాలసీదారులు తప్పనిసరిగా మీ పాన్ వివరాలను కార్పొరేషన్ రికార్డులలో అప్ డేట్ చేయాలి. అంతేకాక వాలిడ్ డీమాట్ అకౌంట్ ఉండాలి. పాలసీహోల్డర్స్ ప్రయోజనార్థం మీ పాన్ కార్డు వివరాలను మా రికార్డులలో అప్ డేట్ చేసే విషయంపై ప్రముఖ అన్ని ఛానల్స్‌లో అడ్వర్‌టైజ్‌మెంట్స్ ఇచ్చాం. అయితే ఇంకా ఎవరైనా పాన్ కార్డు వివరాలు అప్ డేట్ చేయకపోతే, వేగంగా ఈ ప్రక్రియను పూర్తి చేయండి. కేవైసీ పరంగా ఇది ఎంతో ముఖ్యం. ఎల్ఐసీ పబ్లిక్ ఆఫరింగ్‌లో పాల్గొనేందుకు కూడా ఇది తప్పనిసరి’’ అని ఎల్ఐసీ తెలిపింది.

జీవిత బీమా దిగ్గజం లైఫ్ ఇన్సూరెన్స్ కార్పొరేషన్ త్వరలోనే ఇనీషియల్ పబ్లిక్ ఆఫర్(ఐపీఓ)కి రాబోతుంది. ప్రస్తుత ఆర్థిక సంవత్సరంలోనే పబ్లిక్ ఆఫర్‌కు రావాలని సన్నద్ధమవుతోంది. దేశంలో అన్ని పబ్లిక్ ఇష్యూలలో కెల్లా ఎల్ఐసీ ఐపీఓ అతిపెద్దదిగా నిలవబోతుంది. ఎల్‌ఐసీ స్టాక్ మార్కెట్‌లో లిస్ట్ అయ్యేందుకు ఆర్థిక వ్యవహారాల కేబినెట్ కమిటీ(సీసీఈఏ) జూలైలోనే సూత్రప్రాయంగా ఆమోదం కూడా తెలిపింది. ఈ ట్రాన్సాక్షన్ కోసం కేంద్ర ప్రభుత్వం 10 మంది మర్చెంట్ బ్యాంకర్లను నియమించింది. అయితే ఇంకా ఈ ఐపీఓలో ఇష్యూ ధరను ఏం రేంజ్‌లో ఆఫర్ చేయబోతున్నారో వెల్లడించలేదు. ఈ ఆర్థిక సంవత్సరం చివరి క్వార్టర్‌లో ఎల్ఐసీని ఐపీఓకు తీసుకురావాలనే ప్లాన్‌లో ఉన్నట్టు మాత్రం కేంద్రం స్పష్టం చేసింది. ఎల్ఐసీ పబ్లిక్ ఆఫర్ కోసం ఎంతో మంది ఇన్వెస్టర్లు ఎంతో ఆసక్తిగా ఎదురుచూస్తున్నారు. ప్రభుత్వ రంగ దిగ్గజమైన ఎల్ఐసీ జీవిత బీమా కంపెనీలలో అతిపెద్దది. ఈ కంపెనీ ఐపీఓకి వస్తే షేర్లు తప్పనిసరిగా కొనాలని చాలా మంది ప్లాన్స్ వేసుకుని కూడా ఉన్నారు. అయితే ఈ ఐపీఓలో షేర్లు కొనాలంటే కొన్ని షరతులను పాటించాల్సి ఉంది. దానిలో తొలి నిబంధన మీకు డీమాట్, ట్రేడింగ్ అకౌంట్ ఉండి తీరాలి. ప్రస్తుతం ఏ ఐపీఓలో పెట్టుబడి పెట్టాలన్నా కూడా డీమాట్ అకౌంట్ అనేది తప్పనిసరి. అయితే డీమాట్ అకౌంట్‌తో పాటు పాలసీదారుల ఎల్ఐసీ అకౌంట్ తప్పనిసరిగా పాన్‌ కార్డుతో అనుసంధానమై ఉండాలని ఈ బీమా కంపెనీ చెప్పింది.