బ్రేక్‌త్రూ ఛాలెంజ్ విజేతగా బెంగళూరు టీనేజర్.. 4 లక్షల డాలర్లు ప్రైజ్ మనీ

ఇంటర్నేషనల్ బ్రేక్‌త్రూ సైన్స్ వీడియో పోటీల్లో బెంగళూరుకు చెందిన 17 ఏళ్ల బాలిక సియా గోడిక విజేతగా నిలిచింది. జూనియర్ ఛాలెంజ్ 2023 పోటీల్లో విజేతగా నిలిచిన సియా 4 లక్షల డాలర్ల ప్రైజ్‌మనీ అందుకోనుంది. గూగుల్ సహ వ్యవస్థాపకుడు సెర్గీ బ్రిన్, ఫేస్‌బుక్ వ్యవస్థాపకుడు మార్క్ జుకర్‌బర్గ్, ఆయన భార్య ప్రిస్సిల్లా చాన్, రష్యన్ యూరి మిల్నర్, ఆయన భార్య జులియా, అమెరికాకు చెందిన అన్నే వోజ్కికీ సంయుక్తంగా బ్రేక్‌త్రూ ఫ్రైజ్ ఫౌండేషన్‌ను స్థాపించారు. లైఫ్ సైన్సెస్, ఫిజిక్స్, మ్యాథమెటిక్స్‌ ప్రాథమిక భావనల్లో సృజనాత్మక ఆలోచనలు, కమ్యూనికేషన్ నైపుణ్యాలను ప్రేరేపించడమే లక్ష్యంగా ఏర్పాటుచేసిన ఈ బ్రేక్‌త్రూ ప్రైజ్‌‌ను ‘ఆస్కార్ ఆఫ్ సైన్స్’గా పిలుస్తారు.

ఈ ఏడాది పోటీల్లో బెంగళూరుకు చెందిన ఇంటర్ విద్యార్ధిని సియా రూపొందించిన ‘యమనకా ఫ్యాక్టర్స్’ అనే వీడియో జూనియర్ ఛాలెంజ్‌ను గెలుచుకుంది. 2012లో మెడిసిన్ నోబెల్ గెలుచుకున్న షిన్యా యమనకా ఆవిష్కరణ ఆధారంగా వృద్ధాప్యంలోని మహిళ యవ్వనంగా మారడాన్ని ప్లూరిపోటెంట్ స్టెమ్ సెల్ టెక్నాలజీ సాయంతో రూపొందించారు. ‘కణాల రీప్రోగ్రామింగ్‌‌లో షిన్యా యమనకా ఆవిష్కరణలను వివరిస్తూ సియా రూపొందించిన వీడియో 250,000 డాలర్ల కళాశాల స్కాలర్‌షిప్‌ను అందుకుంటుంది’ అని బ్రేక్‌త్రూ ప్రైజ్ ఫౌండేషన్ ప్రత్యేక ప్రకటనలో వెల్లడించింది. ఇందుకు సహకరించిన ఆమె సైన్స్ టీచర్ అర్కా మౌలిక్‌కు 50,000 డాలర్లు, కోల్డ్ స్ప్రింగ్ హార్బర్ ల్యాబొరేటరీ రూపొందించిన నీవ్ అకాడమీకి 100,000 డాలర్లు చెల్లిస్తారు. ‘వీడియోలో హైలైట్ చేసిన సాంకేతికత వయసు సంబంధిత, క్షీణించిన వ్యాధుల చికిత్సలో ఇబ్బందులను వివరించింది’ అని పేర్కొంది.

కేన్సర్, నాడీ సంబంధిత సమస్యలతో పోరాడిన తన తాతలను చూసి సియా స్ఫూర్తి పొందారు. ‘కణాల వృద్ధాప్యాన్ని తిప్పికొట్టడం వల్ల బలహీనపరిచే అనేక వ్యాధులను ముందుగానే నిరోధించవచ్చు.. ఈ భవిష్యత్తును సాకారం చేసే పరిశోధనలకు సహకరించాలని నేను నిశ్చయించుకున్నాను’ అని ఆమె చెప్పారు. త్వరలో లాస్ ఏంజిల్స్‌లో జరిగే వేడుకల్లో 2024 బ్రేక్‌త్రూ ప్రైజ్ గ్రహీతలతో పాటు సియాకు బహుమతిని అందజేస్తారు. సియా సోదరుడు సమయ్ గోడిక ఆరేళ్ల క్రితం ఇదే పోటీల్లో విజేతగా నిలవడం విశేషం. ఈ ఏడాది బ్రేక్‌త్రూ జూనియర్ ఛాలెంజ్‌కు 100 దేశాలకు చెందిన 2,400 కంటే ఎక్కువ మంది పోటీపడ్డారు.