అటహాసంగా ప్రారంభమైన వ్యాక్సినేషన్

వ్యాక్సినేషన్ అందించడంలో ప్రపంచదేశాలతో పోటీపడుతున్న భారత్ తాజాగా మరో భారీ కార్యక్రమానికి శ్రీకారం చుట్టింది. దేశంలో కరోనా వ్యాక్సినేషన్ ప్రక్రియలో మరో కీలక ఘట్టానికి కేంద్ర ప్రభుత్వం శ్రీకారం చుట్టింది. నేటి నుంచే దేశ వ్యాప్తంగా 12-14 ఏళ్ల చిన్నారులకు కరోనా వ్యాక్సిన్ పంపిణీ ప్రారంభమయ్యింది. హైదరాబాద్‌కు చెందిన బయోలాజికల్ -ఇ ఫార్మా సంస్థ రూపొందించిన కొర్బివ్యాక్స్ వ్యాక్సిన్‌ను 12–14 ఏళ్ల చిన్నారులకు పంపిణీ చేయాలని కేంద్ర ప్రభుత్వం నిర్ణయించింది. ఈ నేపథ్యంలో అన్ని రాష్ట్రాలకు కేంద్ర ప్రభుత్వం మార్గదర్శకాలను విడుదల చేసింది. కేంద్రం సూచనలతో చిన్నారులకు టీకా పంపిణీ కోసం ఏర్పాట్లు పూర్తి చేశారు. అలాగే 60 ఏళ్లుపై బడినవారికి నేటి నుంచే ప్రికాషనరీ లేదా బూస్టర్ డోస్‌ను అందజేయనున్నారు. చిన్నారులకు టీకా పంపిణీ ప్రక్రియలో కొర్బివ్యాక్స్‌ను అన్ని జిల్లాలకు పంపించారు. చిన్నారులకు కొర్బివ్యాక్స్ 0.5 ఎంఎల్‌ను ఒక్క డోసుగా ఇవ్వనున్నారు. రెండో డోస్‌ను 28 రోజుల తర్వాత అందజేయాలని అధికారులు సూచించారు. అలాగే టీకా తీసుకున్న తర్వాత.. పిల్లలను దాదాపు గంట పాటు పరిశీలనలోనే ఉంచాలని అధికారులు తెలిపారు. కేంద్ర మార్గదర్శకాల ప్రకారం 2021 మార్చి 1 నాటికి దేశంలో 12-14 ఏళ్ల మధ్య వయసు పిల్లలు దాదాపు 4.7 కోట్ల మంది ఉన్నారు. ‘‘అర్హులైన చిన్నారులకు సంబంధించి కొవిన్‌ పోర్టల్‌ ద్వారా నమోదు చేసుకోవాల్సి ఉంటుంది. 12 ఏళ్లు పూర్తయినవారికి మాత్రమే టీకా వేయాలి.. టీకా కేంద్రాల్లో ఈ వయసు పిల్లల కోసమే ప్రత్యేకించి సెషన్లు నిర్వహించాలి.. ప్రభుత్వ టీకా కేంద్రాల్లో వ్యాక్సిన్‌ను ఉచితంగా అందజేస్తారు’’ అని కేంద్రం మార్గదర్శకాల్లో పేర్కొంది. ఈ ఏడాది జనవరి 3 నుంచి 15-18 ఏళ్ల టీనేజర్లకు దేశంలో వ్యాక్సినేషన్ కార్యక్రమం ప్రారంభించారు. టీకాలు వేసుకోడానికి ఈ వయసు పిల్లలు ఉత్సాహంగా ముందుకొచ్చారు. అటు, చిన్నారులకు కొవిడ్‌ వ్యాక్సినేషన్‌ కార్యక్రమంలో తాము అభివృద్ధి చేసిన కొవోవాక్స్‌ టీకాను కూడా చేర్చాలని సీరమ్‌ ఇన్‌స్టిట్యూట్‌ ఆఫ్‌ ఇండియా (ఎస్‌ఐఐ) కేంద్ర ప్రభుత్వాన్ని కోరింది. ఈమేరకు ‘కొవోవాక్స్‌’ను ప్రైవేటు ఆసుపత్రులకు సరఫరా చేయాలని భావిస్తున్నట్లు తెలిపింది. 12-14 ఏళ్లలోపు చిన్నారులకు వ్యాక్సినేషన్ ప్రారంభంపై ప్రధాని నరేంద్ర మోదీ ట్విట్టర్ ద్వారా స్పందించారు. ‘‘మన పౌరులకు టీకాలు వేయడానికి భారతదేశం చేస్తున్న ప్రయత్నాల్లో ఈ రోజు చాలా ముఖ్యమైన రోజు.. ఈ రోజు నుంచి 12-14 ఏళ్లలోపు పిల్లలందరూ కోవిడ్ టీకా తీసుకోడానికి అర్హులు.. 60 ఏళ్లు దాటిని వారంతా ప్రికాషనరీ డోస్‌కు అర్హులు.. ఈ వయసు గ్రూప్ వాళ్లంతా టీకాలు వేసుకోవాలని కోరుతున్నాను’’ అని అన్నారు.