ఏపీలో వారికి ఒక్కొక్కరికి రూ.20 వేలు.. మంత్రి అచ్చెన్నాయుడు కీలక వ్యాఖ్యలు

వైసీపీ అధినేత, మాజీ ముఖ్యమంత్రి వైఎస్ జగన్ మోహన్ రెడ్డిపై.. ఏపీ వ్యవసాయ శాఖ మంత్రి కింజరాపు అచ్చెన్నాయుడు ఓ రేంజులో ఫైరయ్యారు. 2019లో వైఎస్ జగన్ ముఖ్యమంత్రి అయిన తర్వాత రాష్ట్రాన్ని భ్రష్టుపట్టించారని విమర్శించారు. ఐదేళ్లలో ఐదు లక్షల కోట్లు అప్పులు చేశారంటూ ఆరోపించారు. వైఎస్ జగన్ మొత్తం రాష్ట్రాన్ని దోచేశారన్న అచ్చెన్నాయుడు. వైఎస్ జగన్ చేసిన అప్పులకు రూ.22 వేల కోట్లు వడ్డీ కడుతున్నామన్నారు. ఎన్నికల్లో గెలిచి తాము అధికారంలోకి వచ్చేసరికి రాష్ట్రం వెంటిలేటర్ మీద ఉందన్న అచ్చెన్నాయుడు.. కేంద్రం సహకారంతో ఇప్పుడిప్పుడు ఆక్సిజన్ అందుతోందన్నారు. పింఛన్లను గతంలో కంటే రెండు గంటల ముందే ఇస్తున్నామని.. వైసీపీ తెచ్చిన ల్యాండ్ టైటిలింగ్ యాక్ట్ కూడా రద్దు చేశామన్నారు.

ఇదే సమయంలోనే ఎన్నికల్లో ఇచ్చిన సూపర్ సిక్స్ హామీలపై మంత్రి అచ్చెన్నాయుడు కీలక వ్యాఖ్యలు చేశారు. అన్ని హామీలను నెరవేర్చిన తర్వాతే ఎన్నికలకు వెళ్తామని అచ్చెన్నాయుడు స్పష్టం చేశారు. ప్రస్తుతం రాష్ట్రం ఉన్న ఆర్థిక పరిస్థితుల్లో రాష్ట్రానికి వచ్చే సంపద ఉద్యోగుల జీతాలకు సరిపోవడం లేదని అచ్చెన్నాయుడు చెప్పారు. అయితే ప్రజలకు ఇచ్చిన హామీ మేరకు తల్లికి వందనం అమలు చేస్తామని స్పష్టం చేశారు. అలాగే మత్స్యకార భరోసా అందిస్తామని చెప్పారు. వేట నిషేధంలో ఉన్న మత్స్యకారులకు త్వరలోనే 20 వేల రూపాయలు అందించి ఆదుకుంటామని మంత్రి అచ్చెన్నాయుడు వెల్లడించారు. ఏపీలో టీడీపీ కూటమి సర్కారు అధికారంలోకి వచ్చిన ఆరు నెలల్లోనే లక్షా 80 వేల కోట్లు పెట్టుబడులు వస్తున్నాయని మంత్రి తెలిపారు. ఈ పెట్టుబడుల ద్వారా 20 లక్షల మందికి ఉద్యోగాలు వస్తాయని అచ్చెన్నాయుడు వెల్లడించారు.

తూర్పుగోదావరి జిల్లా తాళ్లరేవు మండలం కొరంగి గ్రామంలో జీవనోపాధి కోల్పోయిన మత్స్యకారులకు ఓఎన్‌జీసీ సంస్థ పరిహారం అందించింది. ఈ కార్యక్రమంలో మంత్రి అచ్చెన్నాయుడు, ఇతర ప్రజాప్రతినిధులు పాల్గొన్నారు. ఈ సందర్భంగా మాట్లాడిన అచ్చెన్నాయుడు.. ఎన్నికల్లో ఇచ్చిన హామీల అమలుకు ప్రభుత్వం కట్టుబడి ఉందన్నారు. వచ్చే విద్యాసంవత్సరం నుంచి తల్లికి వందనం అమలు చేస్తున్నామని.. అన్నదాత సుఖీభవ సహా ఇతర సూపర్ సిక్స్ హామీలను కూడా త్వరలోనే అమలు చేస్తామని స్పష్టం చేశారు.