దేశంలో హెచ్ఎంపీవీ భయాందోళనలు.. చైనా వైరస్ పట్ల కేంద్రం కీలక విషయాలు

భారత్‌లో హెచ్‌ఎంపీవీ వైరస్‌ వ్యాప్తి పట్ల ఆందోళన అవసరం లేదని కేంద్ర ప్రభుత్వం వెల్లడించింది. ప్రస్తుతం చైనా, జపాన్, మలేసియా, భారత్‌ సహా వివిధ దేశాలకు హెచ్‌ఎంపీవీ వైరస్ ఇప్పటికే వ్యాప్తి చెందుతున్న నేపథ్యంలో కేంద్ర ఆరోగ్యశాఖ కీలక విషయాలను తెలిపింది. చైనాలో విజృంభిస్తోన్న హ్యూమన్‌ మెటానిమోవైరస్‌.. భారత్‌లోనూ సోమవారం వెలుగుచూడటం తీవ్ర కలవరపాటుకు గురిచేస్తోంది. తాజాగా ఈ హెచ్ఎంపీవీ వైరస్‌పై స్పష్టతను ఇచ్చిన కేంద్ర ఆరోగ్య శాఖ.. ఇప్పటికే భారత్‌ సహా ప్రపంచవ్యాప్తంగా హెచ్‌ఎంపీవీ వైరస్ వ్యాప్తిలో ఉందని తెలిపింది. ఈ హెచ్ఎంపీవీ వైరస్‌ మిగతా శ్వాసకోశ వైరస్‌ల మాదిరిగానే ఉంటుందని తేల్చి చెప్పింది. దీని పట్ల ప్రజలు ఆందోళన పడాల్సిన అవసరం లేదని స్పష్టం చేసింది.

దేశంలో ఇన్‌ఫ్లుయెంజా లాంటి వ్యాధులు లేదా తీవ్ర శ్వాసకోశ వ్యాధులు అసాధారణ రీతిలో ఏమీ లేవని కేంద్ర ఆరోగ్యశాఖ అధికారులు తాజాగా స్పష్టం చేశారు. ఈ హ్యూమన్ మెటానిమోవైరస్.. ఇతర శ్వాసకోశ వైరస్‌ల మాదిరిగానే ఉంటుందని.. సాధారణంగా వచ్చే జలుబు, ఫ్లూ లాంటి లక్షణాలే కనిపిస్తాయని తెలిపారు. ఇక ఈ హెచ్ఎంపీవీ వైరస్.. చిన్నారులు, వృద్ధుల్లో ఎక్కువగా కనిపిస్తుంటుందని కేంద్ర ఆరోగ్య సేవల డైరెక్టర్‌ జనరల్‌ డాక్టర్‌ అతుల్‌ గోయల్‌ వెల్లడించారు. సీజనల్‌ శ్వాసకోశ సంబంధింత కేసులను ఎదుర్కొనేందుకు అవసరమైన వైద్య సామగ్రి, పడకలు, ఇతర వసతులతో భారత్‌లోని ఆస్పత్రులు సిద్ధంగా ఉన్నాయని తెలిపారు. ఈ సందర్భంగా ప్రస్తుత చలికాలంలో అవసరమైన జాగ్రత్తలు పాటించడంతోపాటు ప్రతీ ఒక్కరు వ్యక్తిగత పరిశుభ్రతను పాటించాలని ఆయన విజ్ఞప్తి చేశారు.

హెచ్ఎంపీవీ వైరస్.. జన్యు పరివర్తన జరిగిందని ప్రపంచ ఆరోగ్య సంస్థ వెల్లడించడం మినహా దీని గురించి అంత పెద్దగా భయపడాల్సిన అవసరం లేదని ఐసీఎంఆర్‌ మాజీ సైంటిస్ట్ డాక్టర్‌ రామన్‌ గంగాఖేడ్కర్‌ తెలిపారు. ప్రస్తుతం వ్యాప్తి చెందుతున్న హెచ్ఎంపీవీ రకం వైరస్‌తో ఎలాంటి ఆందోళన చెందాల్సిన అవసరం లేదని స్పష్టం చేశారు. ఈ హెచ్ఎంపీవీ వైరస్‌ అనేది ఇప్పటివరకు ఉన్న వైరసేనని చెప్పారు. ప్రపంచవ్యాప్తంగా పిల్లల్లో సంభవించే శ్వాసకోశ ఇన్‌ఫెక్షన్లలో 12 శాతం వరకు ఈ హెచ్ఎంపీవీ వైరస్ కారణం అవుతోందని అంచనా వేస్తున్నారు.

రెస్పిరేటరీ సిన్సిటియల్‌ వైరస్‌ను పోలి ఉండే ఈ హెచ్ఎంపీవీ వైరస్‌.. ఇతర శ్వాసకోశ ఇన్‌ఫెక్షన్ల మాదిరిగానే కనిపిస్తుందని డాక్టర్లు చెబుతున్నారు. అయితే సాధారణ వ్యక్తులకు దీని వల్ల ఎక్కువగా ప్రమాదం లేదని.. అయితే తక్కువ రోగనిరోధక శక్తి కలిగిన వాళ్లలోనే దీని ప్రభావం ఎక్కువగా ఉంటుందని పేర్కొంటున్నారు. కొన్ని సందర్భాల్లో మాత్రమే ఈ హెచ్ఎంపీవీ వైరస్ సోకిన వారికి ఆస్పత్రిలో చికిత్స అవసరం అవుతుందని స్పష్టం చేశారు. సాధారణంగా 11 ఏళ్ల చిన్నారుల్లోనే ఈ హెచ్ఎంపీవీ వైరస్ ఎక్కువగా కనిపిస్తుందని తెలిపారు. మొట్టమొదటిసారిగా ఈ హెచ్ఎంపీవీ వైరస్‌ను 2001లోనే నెదర్లాండ్స్‌లో గుర్తించగా.. అప్పుడు 28 మంది చిన్నారులకు ఇది సోకినట్లు తెలుస్తోంది.