హెచ్1బీ వీసాలపై చర్చలు.. ఆందోళనలో భారతీయ విద్యార్థులు.. యూఎస్ ఆశ్రయం కోసం దరఖాస్తులు

భారతదేశానికి చెందిన అనేక మంది అగ్రరాజ్యం అమెరికాకు వెళ్లేందుకు పెద్ద ఎత్తున ఆసక్తి కనబరుస్తారు. అక్కడైతే ఎక్కువ డబ్బులు సంపాదించవచ్చని.. ఇంటి ఆర్థిక పరిస్థితి ఎలా ఉన్నా ఎక్కువ మొత్తంలో బ్యాంకు రుణాలు తీసుకుంటూ స్టూడెంట్ వీసాలపై యూఎస్ వెళ్తుంటారు. అలా వెళ్లిన వారంతా ప్రస్తుతం అనేక సమస్యలు ఎదుర్కుంటున్నారు. ముఖ్యంగా మరో మూడు రోజుల్లో.. ఇటీవలే అమెరికా అధ్యక్షుడిగా ఎన్నికైన డొనాల్డ్ ట్రంప్ పదవీ బాధ్యతలు స్వీకరించబోతుండగా.. యూఎస్‌లో ఆశ్రయం పొందేందుకు దరఖాస్తులు చేసుకోవడానికి సిద్ధం అవుతున్నారు. ఆ పూర్తి వివరాలు ఏంటో మనం ఇప్పుడు తెలుసుకుందాం.

ఇటీవలే అమెరికా అధ్యక్షుడిగా ఎన్నికైన డొనాల్డ్ ట్రంప్.. మరో మూడు రోజుల్లో పదవీ బాధ్యతలు స్వీకరించబోతుండగా.. అమెరికాలో ఆశ్రయం కోసం దరఖాస్తులు చేసుకునేందుకు భారతీయ విద్యార్థులు ఎక్కువ మొగ్గు చూపుతున్నట్లు తెలుస్తోంది. ముఖ్యంగా యూఎస్‌లో ఉండే ఇమ్మిగ్రేషన్ లాయర్లు, ఏజెంట్లే ఈ విషయాన్ని వెల్లడించారు. గత ఆరు వారాల్లోనే 50కి పైగా మంది భారతీయ విద్యార్థులు యూఎస్‌లో ఆశ్రయం పొందేందుకు ఎలా దరఖాస్తు చేసుకోవాలని ప్రశ్నించినట్లు చెప్పారు.

స్టూడెంట్ వీసాలపై అమెరికాకు వెళ్లిన అనేక మంది భారతీయ విద్యార్థులు.. మరికొన్ని రోజుల్లోనే కోర్సులు పూర్తి చేయబోతున్నట్లు తెలుస్తోంది. అలాగే తమకు హెచ్1బీ వీసాలు సలువుగా వచ్చేందుకు పెట్టే ఆప్షనల్ ట్రైనింగ్ ప్రోగ్రామ్ ను తీసేస్తే.. వీసాలు రాక తిరిగి ఇంటికి వెళ్లిపోవాల్సి వస్తుందని ఆందోళన చెందుతున్నారు. ఇదే జరిగితే యూఎస్‌లో ఆశ్రయం కోసం దరఖాస్తులు చేసుకోవాలని వారు భావిస్తున్నట్లు సమాచారం. ఈక్రమంలోనే ఆశ్రయం కోసం ఎలా దరఖాస్తు చేసుకోవాలంటూ విద్యార్థులు లాయర్లు, ఏజెంట్ల వద్దకు వెళ్తున్నారట.

ముఖ్యంగా విద్యార్థులు రుణాలు పొంది అమెరికాకు రావడంతో.. మరింత ఒత్తిడికి గురవుతున్నట్లు తెలుస్తోంది. కానీ అమెరికాలో ఆశ్రయం పొందేందుకు విద్యార్థులు అనేక సవాళ్లను ఎదుర్కోవాల్సి వస్తుందని ఇమ్మిగ్రేషన్ లాయర్లు చెబుతున్నారు. అనేక రకాల డాక్యుమెంట్ల సమర్పిస్తూ.. ఆశ్రయం కోసం దరఖాస్తును పూర్తి చేయాల్సి ఉంటుందని.. ఇదంతా చాలా కష్టమైన పని అంటూ వివరించారు.

గుజరాత్ నుంచి అమెరికాకు వెళ్లి చదువుకుంటున్న ఓ 24 విద్యార్థి దీనిపై స్పందిస్తూ.. ట్రంప్ బాధ్యతలు స్వీకరించడం, స్టెమ్ గ్రాడ్యూయేట్‌ల కోసం పెట్టే ఓపీటీని పొడగించే అవకాశం ఉందని.. దీని వల్ల వీసా వ్యవధి తగ్గే అవకాశాలు కనిపిస్తున్నట్లు చెప్పుకొచ్చారు. ఆర్థికంగా బలహీనమైన కుటుంబం నుంచి వచ్చిన తాను బ్యాంకు నుంచి రుణం పొంది యూఎస్ చేరుకున్నట్లు తెలిపాడు. అయితే తన చదువుకు అయిన అప్పులతో పాటు రుణాన్ని తీర్చాలంటే అమెరికాలో ఉండాలని.. అందుకోసం తాను చివరగా.. ఆశ్రయం పొందేందుకైనా దరఖాస్తు చేసుకుంటానని వివరించాడు.

ఇదంతా ఇలా ఉండగా.. అమెరికాలో ఆశ్రయం పొందేందుకు అర్హత పొందాలంటే దరఖాస్తుదారులు మతం, జాతి మొదలైన వాటి ఆధారంగా హింసను ఎదుర్కొని ఉండాలి, ప్రస్తుతం వాటికి తాను భయపడుతున్నట్లు నిరూపించుకోవాలి. అంతేకాకుండా అమెరికాలోనే నివాసం ఉంటూ.. అక్కడి పౌరసత్వాన్ని కల్గి ఉండకూడదు. ఈ ప్రక్రియ చాలా సుధీర్ఘమైనది. అలాగే ఇందుకోసం దరఖాస్తు చేసుకున్న వ్యక్తి నుంచి ఓ ఒక్క తప్పుడు పత్రాన్ని అధికారులు గుర్తించినా, వారి వాదనలు తప్పు అని రుజువైన వారు బహిష్కరణకు గురయ్యే ప్రమాదం ఉంది.

ఇదంతా తెలిసినప్పటికీ వేరే మార్గం లేక భారతీయ వద్యార్థులు దరఖాస్తులు చేసుకోవడానికి సిద్ధం అవుతున్నారు. హెచ్1బీ వీసాల చుట్టూ పెరుగుతున్న ఊహాగానాలతో అనేక మంది భారతీయులు తిరిగి ఇండియా వచ్చే అవకాశం ఉన్నట్లు తెలుస్తోంది. చూడాలి మరి ఏం జరగనుంది అనేది.