మెట్రో రైళ్లలో విద్యార్థులకు 50 శాతం రాయితీ.. మోదీ ఏం చేయబోతున్నారు

దేశరాజధాని ఢిల్లీలో మరికొన్ని రోజుల్లోనే అసెంబ్లీ ఎన్నికలు జరగబోతున్నాయి. దీంతో అక్కడి ప్రధాన పార్టీలన్నీ పెద్ద ఎత్తున ప్రచారాలు చేస్తున్నాయి. ఓటర్లను ఆకర్షించేందుకు విపరీతమైన వరాలు జల్లులు కురిపిస్తూ.. ఇతర పార్టీలపై విమర్శలు గుప్పిస్తున్నారు. ముఖ్యంగా బీజేపీ, ఆమ్ ఆద్మీ పార్టీ పెద్ద ఎత్తున పోటాపోటీగా విమర్శలు, ప్రతివిమర్శలు చేసుకుంటున్నాయి. అయితే తాజాగా ఆప్ అధినేత, ఢిల్లీ మాజీ ముఖ్యమంత్రి అరవింద్ కేజ్రీవాల్.. ప్రధాని నరేంద్ర మోదీకి లేఖ రాశారు. అందులో మెట్రో రైళ్లలో ప్రయాణించే విద్యార్థులకు 50 శాతం రాయితీ కల్పించాలని కోరారు. ఆ పూర్తి వివరాలు మీకోసం.

ఢిల్లీలోని అన్ని మెట్రో రైళ్లలో ప్రయాణించే పాఠశాల, కళాశాల విద్యార్థులకు 50 శాతం టికెట్ రాయితీని కల్పించాలని కోరుతూ.. అరవింద్ కేజ్రీవాల్ ప్రధాని మోదీకి లేఖ రాశారు. రాయితీ కారణంగా పడే భారాన్ని కేంద్ర ప్రభుత్వంతో పాటు రాష్ట్ర ప్రభుత్వం కూడా భరించాలని చెప్పారు. ముఖ్యంగా ఈ భారాన్ని చెరో 50 శాతం కట్టాలని ప్రతిపాదన చేశారు. ముఖ్యంగా ఢిల్లీలోని విద్యార్థులు ఎక్కువగా బడులు, కాలేజీలకు వెళ్లేందుకు మెట్రో రైళ్లపైనే ఎక్కువగా ఆధార పడుతున్నారని.. అందుకే వారిపై ఆర్థిక భారాన్ని తగ్గించక తప్పదని కేజ్రీవాల్ వెల్లడించారు.

ఇది మాత్రమే కాకుండా ఆప్ అధినేత కేజ్రీవాల్.. తాము వచ్చే ఎన్నికల్లో గెలిచి అధికారంలోకి వస్తే విద్యార్థులకు ఉచిత బస్సు ప్రయాణం కల్పిస్తామని ఇప్పటికే ప్రకటించినట్లు చెప్పారు. అంతేకాకుండా ఇప్పటికే ఢిల్లీలోని మహిళలు బస్సుల్లో ఉచితంగా ప్రయాణిస్తున్న విషయాన్ని గుర్తు చేశారు. మరి మెట్రో రైళ్లలో ప్రయాణించే విద్యార్థులకు 50 రాయితీపై ప్రధాని మోదీ ఎలా స్పందిస్తారో చూడాలి. కచ్చితంగా మోదీ ఇందుకు ఓకే చెప్పే అవకాశం కనిపిస్తోందని.. దీని వల్ల ఢిల్లీలోని బీజేపీకి చాలా ప్రయోజనాలు చేకూరుతాయని నిపుణులు చెబుతున్నారు.

ఫిబ్రవరి 5వ తేదీన ఢిల్లీలో అసెంబ్లీ ఎన్నికలు జరగబోతున్నాయి. ఆ తర్వాత మూడు రోజులకు అంటే ఫిబ్రవరి 8వ తేదీన ఓట్ల లెక్కింపు జరగనుంది. ఈక్రమంలోనే అధికార ఆమ్ ఆద్మీ పార్టీ ఇప్పటికే మొత్తం 70 స్థానాలకు అభ్యర్థులను ప్రకటించగా.. బీజేపీ మాత్రం 59 స్థానాలకే అభ్యర్థులను ప్రకటించింది. ఈ ఎన్నికల్లో ఈ రెండు పార్టీలతో పాటు కాంగ్రెస్ మధ్య త్రిముఖ పోటీ ఏర్పడనుంది. గతంలో ఒక్క సీటు కూడా సాధించలేని హస్తం పార్టీ సైతం ఈసారి ఎన్నికల్లో విజయం సాధించేందుకు గట్టిగా కృషి చేస్తోంది. చూడాలి మరి ఏం జరగనుంది అనేది.