మహా కుంభమేళా గురించి ప్రియాంక గాంధీ వివాదాస్పద పోస్టు చేశారా..?

ఉత్తరప్రదేశ్‌లోని ప్రయాగ్ రాజ్‌లో మహా కుంభమేళా 2025ను ఘనంగా నిర్వహిస్తున్నారు. గంగా నదిలో స్నానం ఆచరించేందుకు కోట్లాది మంది భక్తులు ఇక్కడికి తరలివస్తున్నారు. మకర సంక్రాంతి రోజునే 3.5 కోట్ల మంది భక్తులు ప్రయాగ్ రాజ్ వద్ద గంగా నదిలో స్నానం చేశారు. ఫిబ్రవరి 26 వరకు జరగనున్న మహా కుంభమేళాలో 40 కోట్ల మందికిపైగా భక్తులు పుణ్యస్నానాలు ఆచరిస్తారని అంచనా వేస్తున్నారు. ఓవైపు మహా కుంభమేళా సాగుతుండగా.. మరోవైపు ఈ కార్యక్రమం గురించి సోషల్ మీడియాలో ఫేక్ పోస్టులు కూడా వైరల్ అవుతున్నాయి. మహా కుంభమేళా గురించి కాంగ్రెస్ ఎంపీ ప్రియాంక గాంధీ ఇలా ట్వీట్ చేశారంటూ.. ఓ పోస్టు వైరల్ అవుతోంది.

క్లెయిమ్ ఏమిటి?

‘భారత్ మూర్ఖుల దేశం. ఇక్కడ ప్రభుత్వం కోట్లాది రూపాయలను ప్రజలకు తాగు నీరు అందించడం కోసం కాకుండా.. కపటధారులు, మోసగాళ్లు రాచ స్నానం ఆచరించడానికి ఖర్చు చేస్తుంది’ అంటూ ప్రియాంక గాంధీ ఎక్స్‌లో పోస్టు చేసినట్టుగా ఉన్న స్క్రీన్ షాట్‌ను సుభాష్ వధ్వా అనే యూజర్ జనవరి 16న ఎక్స్‌లో పోస్టు చేశారు.

‘కుంభమేళాపై ప్రియాంక వాద్రా ట్వీట్ చూడండి. చాణక్యుడు చెప్పింది నిజమే.. పరాయి గర్భం నుంచి పుట్టిన బిడ్డ దేశభక్తుడు కాలేడు. మీరు ఏమనుకుంటున్నారు. ఆమె చెప్పేది సరైనదేనా.. విశ్వాసంతో చలిలో కూడా కుంభమేళాలో స్నానం చేయడానికి వెళ్లే సాధారణ సనాతనీ ప్రజలు’ అనే క్యాప్షన్‌ను సుభాష్ వధ్వా ఈ స్క్రీన్ షాట్‌కు జత చేశారు.

మనోజ్ శ్రీవాస్తవా అనే యూజర్ ఎక్స్ హ్యాండిల్ నుంచి కూడా అదే స్క్రీన్ షాట్‌ను పోస్టు చేశారు. ‘పరదేశీ గర్భంలో పుట్టిన బిడ్డ దేశభక్తుడు కాలేడు. ఆలోచించండడి.. దేశాన్ని ఈ ద్రోహుల చేతికి అప్పగిస్తారా..?’ అనే క్యాప్షన్‌ను మనోజ్ శ్రీవాస్తవ రాసుకొచ్చారు.

అసలు నిజమేంటి..?

వైరల్ అవుతోన్న స్క్రీన్ షాట్‌ను గూగుల్ లెన్స్ సాయంతో సెర్చ్ చేయగా.. ఇప్పటికే చాలా మంది దీన్ని పోస్టు చేశారని తేలింది. మనోజ్ శ్రీవాస్తవ అనే హ్యాండిల్‌ నుంచి జనవరి 16వ తేదీనే కాకుండా 2024 డిసెంబర్ 17న కూడా ఈ స్క్రీన్ షాట్ పోస్టు చేసినట్లు సజగ్ టీమ్ గుర్తించింది.

 అంతకు ముందు 2019 ఫిబ్రవరి 9న రోహిత్ ఎలక్ట్రిక్ ఆటో మొబైల్ అనే పేరుతో ఉన్న ఎక్స్ హ్యాండిల్లోనూ ఈ స్క్రీన్ షాట్‌ను పోస్టు చేశారు.

యూజర్లు పోస్టు చేసిన స్క్రీన్ షాట్‌లో హ్యాండిల్ పేరు Priyanka Gandhi INC అని ఉంది. కానీ ఈ యూజర్ నేమ్‌తో ఎక్స్ హ్యాండిల్ ఏదీ కనిపించలేదు. కాంగ్రెస్ ఎంపీ ప్రియాంక గాంధీ అధికారిక ఎక్స్ ఖాతాపేరు Priyanka Gandhi Vadra (X/priyankagandhi) అని ఉంటుంది. ఈ హ్యాండిల్‌లో మహా కుంభమేళా విషయంలో ఎలాంటి నెగటివ్ పోస్టులు కనిపించలేదు.

2025 జనవరి 13న మహా కుంభమేళా గురించి ప్రియాంక గాంధీ తన ఎక్స్ హ్యాండిల్‌లో ఒక పోస్టు చేశారు. అందులో నేటి నుంచి ప్రయాగ్ రాజ్‌లో పవిత్ర గంగా నదిలో స్నానాలు ప్రారంభమవుతాయని.. కోట్లాది మంది భక్తులు గంగమ్మ అమృతధారలో స్నానమాచరిస్తారంటూ.. కుంభమేళా గురించి ప్రియాంక గాంధీ గొప్పగా రాసుకొచ్చారు.

ఇదీ అసలు వాస్తవం

ప్రియాంక గాంధీ ట్వీట్ పేరిట సోషల్ మీడియాలో వైరల్ అవుతోన్న స్క్రీన్ షాట్‌‌ కావాలనే క్రియేట్ చేసిందని స్పష్టంగా తెలుస్తోంది. కుంభమేళా గురించి ప్రియాంక గాంధీ ఎప్పుడూ ఇలాంటి ట్వీట్లు చేయలేదని.. ఎవరో కావాలనే ఎడిట్ చేసి దాన్ని క్రియేట్ చేశారని సజగ్ టీమ్ దర్యాప్తులో తేలింది.