by Suryaa Desk | Fri, Oct 11, 2024, 06:59 PM
తెలంగాణ పల్లెల్లో సర్పంచ్ ఎన్నికల ఫీవర్ మెుదలైంది. నోటిఫికేషన్ ఎప్పుడెప్పుడు వస్తుందా..? అని ఆశావాహులు ఎదురు చూస్తున్నారు. సర్పంచ్గా పోటీ చేయాలనుకుంటున్న ఆశావాహులు గ్రామాల్లోనే మకాం వేసి ఓటర్లను మచ్చిక చేసుకునేందుకు ప్రయత్నిస్తున్నారు. ప్రతి కార్యక్రమంలో పాల్గొని ప్రజలతో మమేకమవుతున్నారు. ఇంకొందరు ఒకడుగు ముందుకేసి మేనిఫెస్టో సైతం రిలీజ్ చేస్తున్నారు. అసెంబ్లీ ఎన్నికల తరహాలో.. తమను గెలిపిస్తే ఏం ఏం చేస్తామో చెబుతూ హామీ పత్రాలు విడుదల చేస్తున్నారు.
తాజాగా.. యాదాద్రి జిల్లా తుర్కపల్లి మండలం మల్కాపూర్ గ్రామంలో సర్పంచ్గా తనను గెలిపించాలంటూ ఓ గ్రామ యువనాయకురాలు మేనిఫెస్టో విడుదల చేసింది. పార్టీలకు అతీతంగా తనను గెలిపిస్తే గ్రామాన్ని అభివృద్ధి చేస్తానని హామీ ఇచ్చింది. గ్రామానికి చెందిన కొడారి లతా మల్లేష్ యాదవ్ ఈ మేనిఫెస్టో రిలీజ్ చేశారు. మెుత్తం 14 అంశాలతో కూడిన మేనిఫెస్టో పోస్టర్ను నేడు విడుదల చేశారు. తనను గెలిపిస్తే గ్రామాన్ని అన్ని రకాలుగా అభివృద్ది చేస్తానని అందులో పేర్కొన్నారు.
గ్రామపంచాయతీలో మంచినీటి ఫిల్టర్ ఏర్పాటు, ఇంటి పన్ను పూర్తిగా మాఫీ, కులాలకు అతీతంగా చనిపోయిన వ్యక్తి అంత్యక్రియలు కోసం వైకుంఠ రథం, ఫ్రీజర్, వాటర్ ట్యాంకర్, చనిపోయిన కుటుంబానికి 20 వేల ఆర్థిక సహాయం, గ్రామంలోని ఏ ఇంట్లో ఆడపిల్ల పుట్టినా 5 వేల ఆర్థికసాయం, ఆడపడుచు పెళ్లి కానుక, ఎస్సీ , బీసీ కమ్యూనిటీ హాల్స్ నిర్మాణం, ఒంటరి మహిళలకు వృద్ధులకు నివాస వసతి గృహం, స్కూల్ పిల్లలకు నోట్ బుక్స్, ఆధునికరణ పరికరాలు, నిరుద్యోగ ఆడపడుచులకు 30 కుట్టు మిషన్లతో టైలరింగ్ ట్రైనింగ్ సెంటర్, ముదిరాజ్లకు చేపలు పెంచుకొనుటకు చెరువులపై పూర్తి అధికారం, అండర్ గ్రౌండ్ డ్రైనేజ్లు, సీసీ రోడ్లు, బస్తీ దావఖాన, గ్రంథాలయం ఏర్పాటు గ్రామంలో గ్రామ దేవతల గుడి నిర్మాణం వంటివి చేసి గ్రామాన్ని ఆదర్శంగా తయారు చేస్తానని మేనిఫెస్టో విడుదల చేశారు. కాగా, ఈ మేనిఫెస్టో ప్రస్తుతం సోషల్ మీడియాలో వైరల్గా మారింది.
కాగా, ఈ ఏడాది ఫిబ్రవరిలో పంచాయతీ పాలక వర్గం పదవీ కాలం ముగిసింది. ప్రస్తుతం ప్రత్యేక అధికారులు గ్రామాల్లో పాలన సాగిస్తున్నారు. అయితే పంచాయతీ ఎన్నికల నోటిఫికేషన్కు మరికొంత సమయం పట్టే ఛాన్స్ ఉంది. ఎస్సీ వర్గకీరణ, బీసీ కులగణన, ఆర్థిక సర్వే పూర్తయిన తర్వాతే నోటిఫికేషన్ రానుంది. ఈ ప్రక్రియ పూర్తి కావటానికి 60 రోజుల సమయం పట్టే అవకాశం ఉండగా.. వచ్చే ఏడాది జనవరిలో ఎన్నికల నోటిఫికేషన్ వచ్చే ఛాన్స్ ఉంది.