పింఛన్ల తనిఖీపై కూటమి ప్రభుత్వం కీలక నిర్ణయం.. అధికారులకు ఆదేశాలు

రాష్ట్రంలో ప్రస్తుతం సామాజిక భద్రతా పింఛన్ల తనిఖీని పైలట్‌ ప్రాజెక్టుగా చేపట్టాలని కూటమి ప్రభుత్వం నిర్ణయించింది. గత ప్రభుత్వ హయాంలో దివ్యాంగులు, ఇతర కేటగిరీల్లో భారీగా అనర్హులకు పింఛన్లు మంజూరు చేశారనే ఫిర్యాదులు వెల్లువలా వచ్చాయి. ఈ నేపథ్యంలో తనిఖీలు చేపట్టి అనర్హులను గుర్తించాలని ప్రభుత్వం నిర్ణయం తీసుకుంది. తొలి విడతగా జిల్లాకు ఒక గ్రామ/ వార్డు సచివాలయాన్ని ఎంపిక చేస్తారు. అక్కడ తనిఖీలకు పక్క మండలానికి చెందిన అధికారులను నియమించనున్నారు. ఒక్కో బృందం 40 పింఛన్లను మాత్రమే పరిశీలిస్తుంది.

ఆయా సచివాలయాల పరిధిలోని పింఛన్‌దారుల సంఖ్యను బట్టి ఎన్ని బృందాలను ఏర్పాటు చేయాలనేది మాత్రం నిర్ణయిస్తారు. ఈ బృందం లబ్ధిదారుల ఇళ్లకు వెళ్లి వివరాలు సేకరించి, ప్రత్యేకంగా రూపొందించిన యాప్‌లో అప్‌లోడ్‌ చేస్తుంది. ఈ మొత్తం ప్రక్రియ సోమ, మంగళవారాల్లో పూర్తి చేయాలని సెర్ప్‌ సీఈవో వీరపాండ్యన్‌ అన్ని జిల్లాల అధికారులకు ఆదేశాలు జారీచేశారు. ర్యాండమ్‌ తనిఖీల్లో వెల్లడైన వివరాల ఆధారంగా రాష్ట్రవ్యాప్త పరిశీలనపై ప్రభుత్వం నిర్ణయం తీసుకోనుంది.

అర్హత లేకపోయినా సరే కొందరు పింఛన్లు తీసుకుంటున్నారని విమర్శలు రావడంతో ప్రభుత్వం దృష్టిసారించింది. అనర్హుల ఏరివేతకు కసరత్తు మొదలుపెట్టింది. ఈ క్రమంలో తనిఖీలు చేపట్టాలని నిర్ణయించింది. గత వైఎస్సార్‌సీపీ ప్రభుత్వ హయాంలో ఒంటరి మహిళలు, దివ్యాంగులు, చేనేతలు.. ఇలా అన్ని విభాగాల్లో స్థానికంగా ఉండే నేతలు సిఫార్సులతో అనర్హులకు పింఛన్లు ఇచ్చారనే విమర్శలు ఉన్నాయి.

ఇదే సమయంలో అర్హులకు పింఛన్ల అందలేదనే ఆరోపణలు ఉన్నారు. వృద్ధులు, ఒంటరి మహిళలు, వితంతువులు, దివ్యాంగులకు అర్హత ఉన్నా ఏవేవో కారణాలు చెప్పి దరఖాస్తుల్ని పక్కనపెట్టారని కొంతమంది ఆరోపించారు. జగన్ ప్రభుత్వం ఐదేళల్లో 8 లక్షల మందికి పింఛన్లు తొలగించిందనే విమర్శలే వినిపిస్తున్నాయి. అందుకే కూటమి ప్రభుత్వం అర్హత ఉన్న ప్రతి ఒక్కరికి పింఛన్ అందించాలని భావిస్తోంది.. ఆ దిశగా చర్యలు చేపట్టింది. ఇప్పటికే కొత్త పింఛన్లపై విధివిధానాల రూపకల్పన కోసం ఐదుగురు మంత్రులతో సబ్ కమిటీ ఏర్పాటు చేయాలని ముఖ్యమంత్రి చంద్రబాబు ఆదేశించారు.