![]() |
![]() |
by Suryaa Desk | Sun, Aug 11, 2024, 07:28 PM
తెలంగాణలో విషజ్వరాలు విజృంభిస్తున్నాయి. ఈ విషజ్వరాల బారినపడి.. ఇప్పటికే చాలా మంది మృత్యువాత పడుతుండగా.. మరో బాలిక కూడా ప్రాణాలు వదిలింది. హాస్టల్లో చదువుకుంటున్న ఓ పదో తరగతి విద్యార్థిని తీవ్ర జ్వరంతో.. ప్రాణాలతో పోరాడి.. చివరికి మృత్యువు చేతిలో ఓడిపోవటం అందరినీ కలిచివేస్తోంది. "నాన్నా.. నన్ను ఎలాగైనా కాపాడు" అంటూ తన తండ్రితో వేడుకున్న చివరి మాటలు కేవలం ఆ కన్నపేగునే కాదు.. ప్రతిఒక్కరి గుండెల్ని మెలిపెడుతున్నాయి.
తన కూతురిని కాపాడుకునేందుకు సర్వశక్తులూ ఒడ్డినా ఫలితం లేకపోయేసరికి.. "నిన్ను కాపాడుకోలేకపోయిన బిడ్డా" అంటూ ఆ తండ్రి గుండెలు పగిలేలా రోధిస్తున్న దృశ్యాలు మనసులను ముక్కలు చేస్తున్నాయి. ఈ హృదయ విదారక ఘటన.. కుమురం భీం ఆసిఫాబాద్ జిల్లా గుండాయిపేటలో చోటు చేసుకుంది.
గ్రామానికి చెందిన జాడె కిశోర్, సురేఖ దంపతులకు ముగ్గురు పిల్లలు కాగా.. పెద్ద కుమార్తె పూజ (16) ఆసిఫాబాద్లోని ట్రైబల్ వెల్ఫేర్ బాలికల హాస్టల్లో ఉంటూ పదో తరగతి చదువుతోంది. ఇటీవలే పూజకు జ్వరం వచ్చింది. దీంతో.. "నాన్నా జ్వరమొచ్చింది. చేతనైతలేదు. కాళ్లు చేతులు గుంజుతున్నయ్. ఇంటికి తీసుకుపో.." అంటూ గత శనివారం తండ్రికి ఫోన్ చేసింది. కూతురికి జ్వరమొచ్చిందని నీరసంగా చెప్పటంతో.. హుటాహుటిన హాస్టల్కు వెళ్లి.. ఆమెను ఇంటికి తీసుకొచ్చుకున్నారు. స్థానిక ఆర్ఎంపీకి చూపించి.. వైద్యం చేయించినా ఫలితం లేకపోయింది. శుక్రవారం సాయంత్రానికి జ్వరం మరింత ఎక్కువైంది.
పూజ పరిస్థితి చూసి.. కుటుంబ సభ్యులు వెంటనే మహారాష్ట్రలోని చంద్రాపూర్లోని ఓ ప్రైవేట్ ఆసుపత్రికి తీసుకెళ్లారు. శనివారం మధ్యాహ్నం పరిస్థితి మరింత విషమించడంతో వైద్యుల సూచన మేరకు మెరుగైన వైద్యం కోసం హైదరాబాద్కు అంబులెన్స్లో తరలిస్తుండగా మార్గమధ్యలోనే పూజ ప్రాణాలు వదిలింది. తుది శ్వాస విడిచే కంటే కొన్ని క్షణాల ముందు.. తన తండ్రి చేయి పట్టుకొని నాన్నా నన్ను ఎలాగైనా కాపాడు అంటూ పూజ ఎంతో దీనంగా వేడుకుంది. నీకేం కాదు బిడ్డా.. నేనున్నా కదా.. హైదరాబాద్కు పోతున్నాం.. ఏంకాదు నువ్వు టెన్షన్ పడకు.. అంటూ ఆ తండ్రి ధైర్యం చెప్పిన కొన్ని క్షణాలకే పూజ మృత్యువు చేతిలో ఓడిపోయింది. ఈ ఘటన.. ఆ తల్లిదండ్రులకు తీరని కడుపకోతను మిగిల్చింది.
అయితే.. గుండాయిపేటతో పాటు రాష్ట్రవ్యాప్తంగా గతకొంతకాలంగా విషజ్వరాలు ఎక్కువవుతున్న విషయం తెలిసిందే. కాగా.. పూజ మరణవార్తతో ప్రజలు ఆందోళనకు గురవుతున్నారు. ఇప్పటికే.. రాష్ట్రవ్యాప్తంగా ఉన్న ప్రభుత్వ ఆస్పత్రుల్లో ఎంతో మంది ఈ విషజ్వరాల బారినపడి చికిత్స పొందుతున్నారు.