![]() |
![]() |
by Suryaa Desk | Sat, Jul 13, 2024, 08:52 PM
చదువుకు వయస్సు ఎప్పుడూ అడ్డంకి కాదు. చదవాలనే కసి.. ఏదైనా కొత్తగా సాధించాలనే తపన నీలో ఉంటే.. ఎంత వయస్సు వచ్చినా.. యువతతో పోటీపడి మరీ సాధించవచ్చు. గతంలో చాలా మంది లేటు వయస్సులో ఉన్నత చదువులు చదివారు. తమ కలల్ని సాకారం చేసుకున్నారు. తాజాగా.. వరంగల్ జిల్లాకు చెందిన ఓ వృద్ధుడు నిత్య విద్యార్థిగా చదువుతూనే ఉన్నాడు. 80 ఏళ్లు పైబడిన ఆయన.. 20 పీజీలు పూర్తి చేశాడు. మరో ఐదు పీజీలు పూర్తి చేయాలని గోల్ పెట్టుకున్నాడు. వివరాల్లోకి వెళితే.. వరంగల్కు చెందిన డాక్టర్ అంకతి వీరస్వామి 1962లో హెచ్ఎస్సీ ఉత్తీర్ణులయ్యారు. అనంతరం ఉపాధ్యాయ శిక్షణ పూర్తిచేసి 1968లో ప్రభుత్వ ఉద్యోగం సాధించాడు.
వరంగల్లోని ఎయిడెడ్ పాఠశాలలో ఉపాధ్యాయుడిగా ఉద్యోగ జీవితాన్ని ప్రారంభించాడు. ఉద్యోగంలో చేరినా.. తన చదువును ఆపలేదు. 1973లో దూరవిద్య ద్వారా బీఏ పూర్తి చేశారు. 1978లో బీఈడీ పూర్తి చేసిన వీరస్వామి.. 1981లో హిమాచల్ప్రదేశ్లో ఎంఈడీ చేస్తున్న సమయంలో ఒక ప్రొఫెసర్ మూడు పీజీలు పూర్తి చేయటం చూసి ఆయన ఆశ్చర్యపోయారు. ఆయన నుంచి స్ఫూర్తిపొందారు. దూరవిద్య ద్వారా వివిధ విశ్వవిద్యాలయాల్లో వరుసగా పీజీలు చేస్తూనే ఉన్నారు. హైదరాబాద్లోని ఉస్మానియా విశ్వవిద్యాలయం నుంచి 3, కాకతీయ యూనివర్సిటీ నుంచి 7, ఇందిరాగాంధీ వర్సిటీ నుంచి 4, పొట్టి శ్రీరాములు తెలుగు యూనివర్సిటీ నుంచి 3, పలు రాష్ట్రాలకు చెందిన ఇతర యూనివర్సిటీల నుంచి మరో 3 పీజీలు చేశారు.
మొత్తం 25 పీజీలు చేయాలన్నదే తన లక్ష్యమని వీరస్వామి వెల్లడించారు. 2002లో రిటైర్మెంట్ తీసుకున్న వీరస్వామి.. ఆ తర్వాత వరంగల్ స్తంభంపల్లిలో తన పేరిటే ఏవీఎస్ స్కూల్ను ప్రారంభించారు. ఈ వయసులోనూ ఆయన నిత్యం యోగా చేస్తూ ఎంతో ఉత్సాహంగా కనిపిస్తారు. యోగా, ఎయిడ్స్పై అవగాహనతో పాటు అనేక అంశాలపై ఇప్పటికీ రేడియో, టీవీల్లో బుర్ర కథలు వంటివి చెబుతారు. న్యూయార్క్కు చెందిన ఒక వర్సిటీ గతంలో వీరస్వామికి గౌరవ డాక్టరేట్ ప్రదానం చేసింది. తాజాగా ఇగ్నో నుంచి ఎంఏ ఆంత్రోపాలజీ పరీక్షలు రాసిన వీర స్వామి రిజల్ట్స్ కోసం వేచిచూస్తున్నారు.