కేవలం 5 నిమిషాల్లో 2.62 లక్షల సంపాదన.. అర‌చేతిలో వైకుంఠం అంటే ఇదే కాబోలు
|
|
by Suryaa Desk | Sun, Aug 11, 2024, 08:02 PM
'ఊరు మనకెంతో ఇచ్చింది. ఎంతో కొంత తిరిగిచ్చేయాలి... లేకపోతే లావైపోతాం' శ్రీమంతుడు సినిమాలో హీరో మహేష్ బాబు చెప్పే డైలాగ్ ఇది. ఆ సినిమాలో తన తండ్రి పుట్టిన ఊరు కోసం.. చాలా అభివృద్ధి పనులు చేపడుతాడు మహేష్. స్కూల్, వాటర్ ట్యాంక్, రోడ్లు ఇలా.. గ్రామ అభివృద్ధి కోసం తన వంతుగా సాయం చేసి నిజమైన శ్రీమంతుడు అనిపించుకుంటాడు. కల్కి మూవీతో పాన్ ఇండియా స్థాయిలో గుర్తింపు తెచ్చుకున్న ప్రముఖ దర్శకుడు నాగ్ అశ్విన్ కూడా అంతే. శ్రీమంతుడులో మహేష్ బాబు రీల్ లైఫ్ హీరో అయితే.. నాగ్ అశ్విన్ మాత్రం రియల్ లైఫ్ హీరో అనిపించుకున్నాడు. ఆ మూవీలో చూపించినట్లుగానే.. నాగ్ అశ్విన్ తన స్వగ్రామం అభివృద్ధికి కంకణం కట్టుకున్నారు.
నాగర్‌కర్నూల్‌ జిల్లా తాడూరు మండల పరిధిలోని ఐతోల్‌ నాగ్ అశ్విన్ స్వగ్రామం. అక్కడ జిల్లా పరిషత్‌ ఉన్నత పాఠశాల అభివృద్ధికి ఆయన ముందుకొచ్చారు. రూ.60 లక్షలు సొంత డబ్బులు ఖర్చుపెట్టి నాలుగు అదనపు తరగతి గదులను నిర్మించారు. శనివారం (ఆగస్టు 10) ప్రారంభోత్సవ కార్యక్రమం నిర్వహించగా.. ఈ కార్యక్రమంలో నాగ్ అశ్విన్‌‌తో పాటు ఆయన తల్లిదండ్రులు డాక్టర్‌ జయంతి, డాక్టర్‌ జయరాంరెడ్డిలు పాల్గొన్నారు.
సమాజంలో ఎంత ఎత్తుకు ఎదిగినా ఒదిగి ఉండాలని జీవిత సత్యాన్ని తన తల్లిదండ్రులు నేర్పించారని నాగ్ అశ్విన్ వెల్లడించారు. ప్రతి ఒక్కరూ ఈ జీవిత సత్యానికి కట్టుబడి ఉంటే ఉన్నత శిఖరాలను అధిరోహిస్తారని చెప్పారు. ఇప్పటికే ఐతోల్‌ గ్రామంలో అనేక అభివృద్ధి కార్యక్రమాలు చేపట్టామని చెప్పుకొచ్చారు. రాబోయే రోజుల్లోనూ.. తమ కుటుంబ సభ్యుల సహకారంతో ఈ ప్రాంత ప్రజలకు అండగా ఉంటానని ప్రకటించారు. ప్రతి ఒక్కరూ తమకు ఎన్నో ఇచ్చిన గ్రామానికి ఎంతో కొంత తిరిగిచ్చేయాలని పిలుపునిచ్చారు.
ఈ కార్యక్రమంలోనే పాల్గొన్న ఎస్‌వీఎస్‌ ఆస్పత్రి వ్యవస్థాపకులు రాంరెడ్డి, కృష్ణారెడ్డి మాట్లాడుతూ ఐతోల్‌ను మండల కేంద్రంగా ప్రకటించాలని ప్రభుత్వాన్ని కోరారు. కార్యాలయాల నిర్మాణానికి అవసరమైన నాలుగు ఎకరాల భూమిని తమ రెండు కుటుంబాల నుంచి ఇస్తామని ప్రకటించారు. గ్రామస్థుల కోరిక మేరకు ఐతోల్‌ గ్రామాన్ని మండల కేంద్రంగా ఏర్పాటు చేసేందుకు కృషి చేస్తాననని స్థానిక ఎమ్మెల్యే కూచుకుళ్ల రాజేష్ రెడ్డి వెల్లడించారు. ఇలా తాను పుట్టి పెరిగిన గ్రామాన్ని అభివృద్ది పథంలో నడిపిస్తున్న నాగ్ అశ్విన్.. తాను రీల్ లైఫ్‌లో డైరెక్టర్‌ను అయినా.. రియల్ లైఫ్‌లో మాత్రం హీరోనే అని నిరూపించుకున్నాడు.
