by Suryaa Desk | Fri, Jul 12, 2024, 08:09 PM
నేరం చేసినవాడు ఎంత తెలివైన వాడైనా సరే.. ఏదో ఒక తప్పు చేయకపోడు.. ఏదో ఒక క్లూను వదిలేయకపోడనేది విచారణ అధికారులు బలంగా నమ్మే మాట. చాలా సందర్భాల్లో ఇది నిజమని తేలింది కూడా. దొంగతనాలు చేసే వారు, హత్యలు లాంటి తీవ్ర నేరాలకు ఒడిగట్టిన వాళ్లు కూడా ఎంత పకడ్బందీ ప్లాన్ వేసుకున్నా సరే.. ఏదో చిన్న మిస్టేక్తో దొరికిపోయిన సందర్భాలు బోలెడు. మిస్టరీగా మారిన కేసులను చేధించిన తర్వాత పోలీసులు ప్రెస్ మీట్ పెట్టినప్పుడు.. ఇలాంటి చిన్న క్లూల సాయంతో కేసును చేధించామని చెబుతుంటారు కూడా.
అయితే హైదరాబాద్లో దొంగలు బాగా తెలివి మీరారు. పోలీసులను డైవర్ట్ చేయడం కోసం ఉద్దేశపూర్వకంగానే ఓ క్లూను వదిలి వెళ్లారు. ఆ క్లూను ఆధారంగా చేసుకొని పోలీసులు విచారణ జరిపితే.. ఈలోగా తాము పారిపోవచ్చని, కుదిరితే కేసు నుంచి తప్పించుకోవచ్చని ప్లాన్ వేశారు. ఈ కేసు వివరాల్లోకి వెళ్తే.. నాగోలు పరిధిలోని తట్టి అన్నారం వైఎస్సార్ కాలనీలో ఇటీవల దొంగలు పడ్డారు. మంగళవారం అర్ధరాత్రి సమయంలో సుదర్శన్ అనే వ్యక్తి ఇంట్లో చోరీకి పాల్పడిన దొంగలు.. అందినకాడికి ఎత్తుకెళ్లారు. పని ముగిశాక వెళ్లేటప్పుడు కావాలనే ఓ ఫోన్ను ఆ ఇంట్లో వదిలేసి వెళ్లారు.
సుదర్శన్ ఫిర్యాదుతో రంగంలోకి దిగిన పోలీసులు.. ఆ ఇంటిని పరిశీలించగా ఫోన్ కనిపించింది. అది తమది కాదని సుదర్శన్ కుటుంబీకులు చెప్పడంతో.. దొంగలది కావొచ్చనే దిశగా పోలీసులు విచారణ జరిపారు. అయితే ఆ ఫోన్ అదే కాలనీకి చెందిన హర్సలాన్ అనే వ్యక్తిది అని తేలింది. దీంతో అతడే దొంగతనం చేసి ఉంటాడని పోలీసులు భావించారు. అతడి ఇంటికి తాళం వేసి ఉండటంతో.. పక్కింట్లో ఉండే అతడి బంధువులతో మాట్లాడిన పోలీసులు అతడి గురించి ఆరా తీశారు.
బంధువుల చికిత్స కోసం షోలాపూర్ వెళ్లిన హర్సలాన్ కుటుంబ సభ్యులు.. కొద్దిరోజులుగా అక్కడే ఉంటున్నారు. పోలీసులు పిలవడంతో తిరిగి హైదరాబాద్ వచ్చిన అతడు.. తన ఇంటిలోపల తలుపులు పగలగొట్టి ఉన్నట్టు గుర్తించాడు. ఇంట్లో ఉండాల్సిన పాత ఫోన్తోపాటు.. 4 తులాల బంగారు ఆభరణాలు కూడా మిస్సయినట్లు గుర్తించి డయల్ 100కి ఫోన్ చేయడంతోపాటు పోలీసు స్టేషన్కు వెళ్లి ఫిర్యాదు చేశాడు.
అప్పటి దాకా హర్సలాన్ దొంగతనం చేసి ఉంటాడని భావించిన పోలీసులు.. అతడి ఇంట్లోనూ దొంగతనం జరిగిందని తెలుసుకొని అవాక్కయ్యారు. తమను డైవర్ట్ చేయడం కోసం దొంగలు హర్సలాన్ ఇంట్లోని ఫోన్ను తీసుకొచ్చి సుదర్శన్ ఇంట్లో ఉంచి వెళ్లారనే నిర్ధారణకు వచ్చారు. అయితే హర్సలాన్ ఇంట్లోని బంగారం కూడా చోరీకి గురైందని భావించగా.. చివరికి అతడి ఇంట్లోనే బంగారం దొరికింది.