![]() |
![]() |
by Suryaa Desk | Sun, Aug 11, 2024, 09:22 PM
జీవితం ఓ నీటిబుడగ లాంటింది. ఎప్పుడు ఎలా ముగిసిపోతుంది అన్నది ఎవరి చేతుల్లోనూ ఉండదు. అందుకు ప్రత్యక్ష నిదర్శనమే ఈ ప్రమాదం. మేడ్చల్ జిల్లాలోని గాజులరామారానికి చెందిన బాషా గోపి అనే వ్యక్తి.. సెక్యూరిటీ గార్డుగా పని చేస్తున్నాడు. ఎప్పటిలాగే.. తన డ్యూటీ ముగించుకుని.. నడుచుకుంటూ ఇంటికి వెళ్తున్నాడు. మనం ఎంత జాగ్రత్తగా ఉన్నా.. ఎదుటివాడి నిర్లక్ష్యం కూడా అప్పుడప్పుడు మన ప్రాణాల మీదికి వస్తుందనటానికి ఇదే ప్రత్యక్ష సాక్ష్యం. తాను రోడ్డు పక్క నుంచే నడుచుకుంటూ వస్తున్నా.. అతివేగంతో నిర్లక్ష్యంగా వచ్చిన ఓ కారు అతన్ని ఢీకొట్టగా.. గాల్లోకి ఎగిరిపడి.. అక్కడికక్కడే గోపి మరణించాడు. ఈ ప్రమాదానికి సంబంధించిన దృశ్యాలు.. సీసీ కెమెరాల్లో నిక్షిప్తం కాగా.. అవి చూస్తుంటేనే ఒళ్లు జలదరిస్తోంది.
గాజులరామారం వద్ద క్రాసింగ్లో ఓ మలుపు దగ్గర.. అతివేగంతో వస్తున్న ఓ కారు.. ఎదురుగా వస్తున్న ద్విచక్రవాహనాన్ని తప్పించబోయి.. పక్కనే నడుచుకుంటూ వెళ్తున్న సెక్యూరిటీ గార్డు గోపిని బలంగా ఢీకొట్టింది. ఈ ప్రమాదంలో.. కారు ఢీకొట్టి వెంటనే గోపి ఒక్కసారిగా అంతెత్తున పైకి లేచి.. పక్కనే ఉన్న గోడ అవతల పడ్డాడు. కారు బలంగా ఢీకొట్టడంతో తీవ్ర గాయాలపాలైన గోపీ స్పాట్లోనే ప్రాణాలు వదిలాడు. అక్కడున్న రెండు ఇనుప స్తంబాలు విరిగిపోయి వేలాడుతున్నాయి.
అయితే.. ఇంతపెద్ద ప్రమాదం జరిగితే.. కారులో వున్న వ్యక్తులు ఏమీ జరగనట్టుగా ఫోన్ మాట్లాడుకుంటూ బయటకు వచ్చి చూసి.. ఘటనా స్థలం నుంచి పరారయ్యారు. కానీ.. డ్రైవింగ్ చేసిన వ్యక్తిని స్థానికులు పట్టుకున్నారు. ఘటనపై పోలీసులకు సమాచారం అందించారు. హుటా హుటిన ఘటన వద్దకు చేరుకున్న పోలీసులు కారు డ్రైవింగ్ చేసిన వ్యక్తిని అదుపులో తీసుకున్నారు. కారులో ఉన్న మిగతా ఐదుగురు పరారీలో ఉన్నట్లు సమాచారం. కేసు నమోదు చేసిన పోలీసులు.. దర్యాప్తు చేస్తున్నారు. పరారీలో ఉన్న వారికోసం గాలింపు చర్యలు చేపట్టారు. ఈ ఘటనలో మృతి చెందిన బాషా గోపి తండ్రి నర్సింలు.. కొద్ది రోజుల క్రితమే మరణించాడు. దీంతో.. గోపీనే తన కుటుంబాన్ని పోషిస్తూ జీవనం సాగిస్తున్నాడు. తండ్రి లేని కుటుంబంలో పెద్ద దిక్కుగా ఉన్న కుమారుడు గోపి కూడా మృతి చెందడంతో కుటుంబం దిక్కులేనిదైంది.