![]() |
![]() |
by Suryaa Desk | Sun, Aug 11, 2024, 09:05 PM
తెలంగాణలోని వచ్చే ఏడాది నుంచి రేషన్ లబ్ధిదారులకు సన్నబియ్యం పంపిణీ చేయాలని డిసైడ్ అయింది. ఈ మేరకు కొత్త రేషన్ కార్డుల జారీ, విధివిధాల ఖరారు అంశంపై ఏర్పాటు చేసిన కేబినెట్ సబ్ కమిటీ కీలక ప్రకటన చేసింది. చౌకధర దుకాణాలు, మధ్యాహ్న భోజన పథకం ద్వారా ఏటా 24 లక్షల టన్నుల దొడ్డు బియ్యం పంపిణీ జరుగుతోందని ఈ కమిటీ గుర్తించింది. దీనిలో సగానికి పైగా దారి మళ్లుతున్నట్లు తెలిపారు. ప్రస్తుతం అంగన్వాడీ సెంటర్లు, కొన్ని ప్రభుత్వ పాఠశాలల్లో మాత్రమే సన్నబియ్యం పంపిణీ జరుగుతుండగా.. వచ్చే ఏడాది నుంచి పూర్తిగా సన్నబియ్యం మంజూరు చేయాలని నిర్ణయం తీసుకుంది.
ఇక తెలంగాణ ప్రజలు చాలా కాలంగా ఎదురుచూస్తున్న కొత్త రేషన్ కార్డుల పంపిణీపై కూడా కేబినెట్ సబ్ కమిటీ కీలక ప్రకటన చేసింది. త్వరలోనే కొత్త రేషన్ కార్డులు మంజూరు చేయాలని నిర్ణయించింది. తెలంగాణలోని అర్హులందరికీ కుటుంబ ప్రతిపాదికన తెల్ల రేషన్ కార్డులు మంజూరు చేయాలని నిర్ణయించారు. పాత రేషన్ కార్డుల స్థానంలో కూడా నూతనంగా రేషన్ కార్డులు ఇవ్వాలని డిసైడ్ అయింది. కొత్తగా ఇచ్చే రేషన్ కార్డులు.. ఏటీఎం తరహాలో స్వైపింగ్ కార్డులు ఇవ్వాలని ప్రభుత్వం నిర్ణయం తీసుకున్నారు. కొత్తగా మంజూలు చేసే రేషన్ కార్డులకు సంబంధించిన విధివిధానాలపై కూడా సూత్రప్రాయంగా అంగీకారానికి వచ్చినట్లు తెలిసింది.
కొత్తగా పంపిణీ చేసే తెల్లరేషన్ కార్డులు పొందేందుకు.. కొన్ని నింబంధనలు కూడా పెట్టాలని సబ్ కమిటీ నిర్ణయించినట్లు సమాచారం. గ్రామీణ ప్రాంతాల్లో ఉండేవారి వార్షిక ఆదాయం లక్షన్నరగానూ, మాగాణి మూడున్నర ఎకరాలు, చెలక ఏడున్నర ఎకరాలుగా నిర్ణయింంచినట్లు తెలిసింది. పట్టణ ప్రాంతాల్లో ఉంటున్నవారి వార్షిక ఆదాయం 2 లక్షలు ఉన్నవారికే కొత్త రేషన్ కార్డులు ఇవ్వాలని యోచిస్తున్నట్లు తెలిసింది. త్వరలోనే ఇందుకు సంబంధించిన అధికారిక ఉత్తర్వులు రానున్నాయి. కాగా, ప్రభుత్వం కొత్త రేషన్ కార్డులు మంజూరు చేస్తామని ప్రకటించటంతో అర్హులు హర్షం వ్యక్తం చేస్తున్నారు.