|
|
by Suryaa Desk | Tue, Jun 03, 2025, 02:00 PM
రానున్న రెండు నుండి మూడు సంవత్సరాల్లో విత్తన రంగంలో స్వయం సమృద్ధి సాధించాలన్నదే తెలంగాణ రాష్ట్ర ప్రభుత్వ ప్రధాన లక్ష్యమని ప్రొఫెసర్ జయశంకర్ వ్యవసాయ విశ్వవిద్యాలయం వైస్ ఛాన్సలర్ ప్రొఫెసర్ ఏ. జానయ్య తెలిపారు.
మంగళవారం నల్గొండ జిల్లా తిప్పర్తి మండల కేంద్రంలోని రైతు వేదికలో జరిగిన సమావేశంలో ఆయన మాట్లాడారు. ఈ సందర్భంగా ఆయన మాట్లాడుతూ, రాష్ట్రవ్యాప్తంగా నాణ్యమైన విత్తనాల ఉత్పత్తికి పూనుకోవాలని, రైతులకు అవసరమైన ఫౌండేషన్ విత్తనాలను అందుబాటులోకి తేవాలనే దిశగా విశ్వవిద్యాలయం చర్యలు చేపట్టిందని తెలిపారు.
ప్రస్తుతానికి 430 మంది వ్యవసాయ శాస్త్రవేత్తల పర్యవేక్షణలో నాణ్యమైన విత్తనాలు రూపొందించి, రాష్ట్రంలోని 11 వేల రెవెన్యూ గ్రామాలలో ఉన్న 40 వేల మంది రైతులకు పంపిణీ చేస్తున్నట్లు చెప్పారు. ఈ చర్యల ద్వారా విత్తనాలపై ఇతర రాష్ట్రాలపై ఆధారపడాల్సిన అవసరం లేకుండా స్వయం సమృద్ధి సాధించడం లక్ష్యంగా పెట్టుకున్నట్టు వివరించారు.
ఈ కార్యక్రమం ద్వారా రైతులు అధిక దిగుబడులు పొందడమే కాక, విత్తన నాణ్యత పట్ల అవగాహన పెరిగి, వ్యవసాయ రంగం మరింత అభివృద్ధి చెందుతుందని ఆయన ఆశాభావం వ్యక్తం చేశారు.
