|
|
by Suryaa Desk | Sat, Dec 13, 2025, 10:06 AM
పాన్ ఇండియా స్టార్ ప్రభాస్ నటిస్తున్న తాజా చిత్రం 'ది రాజా సాబ్' విడుదలపై నీలినీడలు అలుముకున్న నేపథ్యంలో మేకర్స్ ఖచ్చితంగా ఈ సినిమా జనవరి 9న విడుదల అవుతుందని ఘంటాపధంగా చెబుతున్నారు. 'అఖండ 2' సినిమా విడుదలలో జరిగిన జాప్యానికి ఆర్థిక పరమైన అంశాలే ప్రధాన కారణం. అలానే డిసెంబర్ 12న విడుదల కావాల్సిన 'వా వాతియర్' (తెలుగులో 'అన్నగారు వస్తారు), 'లాక్ డౌన్' చిత్రాలు వాయిదా పడటానికీ ఆర్థిక పరమైన విషయాలే రీజన్ అని ట్రేడ్ వర్గాలు చెబుతున్నాయి. ఇక్కడ 14 రీల్స్ ఎంటర్ టైన్ మెంట్స్, అలానే తమిళనాట స్టూడియో గ్రీన్, లైకా సంస్థలు నిజానికి చిన్నా చితకవి కాదు. ఇప్పటికే నిర్మాణ రంగంలో ఎంతో అనుభవం సంపాదించుకున్నవి. కానీ ఈ సంస్థల చిత్రాలు అనుకున్న విధంగా రిలీజ్ కాకపోవడంతో పెద్ద నిర్మాణ సంస్థలు తెరకెక్కిస్తున్న సినిమాల విడుదల విషయంలోనూ బయ్యర్లు, డిస్ట్రిబ్యూటర్స్ అనేక అనుమానాలు వ్యక్తం చేస్తున్నారు. అయితే... తమ సంస్థకు సంబంధించిన ఆర్థిక పరమైన లావాదేవీలు ఏవీ 'ది రాజాసాబ్' విడుదల కు ఆటంకం కలిగించేవి కాదని ఆ సంస్థ అధినేత టీజీ విశ్వప్రసాద్ ఇటీవల ఇన్ డైరెక్ట్ గా చెప్పారు. దానికి తోడు ఇటీవల మరో 30 రోజుల్లో జనం ముందుకు వస్తున్నట్టు ప్రత్యేకంగా ప్రకటించారు.
Latest News