|
|
by Suryaa Desk | Sun, Apr 06, 2025, 11:54 AM
‘బేబీ’తో ఓవర్‌నైట్‌ స్టార్‌గా మారింది వైష్ణవి చైతన్య. తర్వాత ‘లవ్ మీ: ఇఫ్‌ యూ డేర్‌’ అంటూ ప్రేక్షకులను భయపెట్టే ప్రయత్నం చేసింది కానీ పెద్దగా వర్కవుట్‌ కాలేదు. అయినా సరే ‘బొమ్మరిల్లు’ భాస్కర్‌, ‘టిల్లూ’ సిద్ధూ జొన్నలగడ్డ కాంబినేషన్‌లో రాబోతున్న ‘జాక్’లో జాక్‌పాట్‌లాంటి ఆఫర్‌ కొట్టేసింది. ఈ సందర్భంగా ఆమె పంచుకున్న కొన్ని ఆసక్తికరమైన విషయాలు చెప్తూ... కూచిపూడి, పాశ్చాత్య నృత్యంలో నాకు ప్రావీణ్యం ఉందని చాలామందికి తెలుసు. ఎవరికీ తెలియని విషయమేంటంటే... నేను పాటలు కూడా బాగా పాడతా. అలాగని ప్రొఫెషనల్‌ సింగర్‌ని కాదు. ఇంట్లో సరదాగా పాడుతుంటా. చిన్నతనంలో గుళ్ళు, అయ్యప్ప భజనల్లో పాడేదాన్ని. ఓసారి ‘లవ్ మీ’ సెట్‌లో సరదాగా హమ్‌ చేస్తుంటే, అది విని మా డైరెక్టర్, ప్రొడ్యూసర్ ‘రావాలి రా’ అనే పాటకు ఒక వెర్షన్‌ని నాతో పాడించాలనుకున్నారు. దాంతో కీరవాణి గారి దగ్గర నాలుగు రోజులు శిక్షణ తీసుకుని నా స్టైల్‌లో పాడేశా. ఆ పాటకు మంచి ఆదరణ లభించింది.‘గంగూబాయి కఠియావాడి’లో అలియాభట్‌ నటనకి ఫిదా అయ్యా. ఆ పాత్రకు ప్రాణం పోసిందామె. నన్ను నేను కొత్తగా ఆవిష్కరించుకునే ఆస్కారం ఉన్న అలాంటి పాత్రలు వస్తే గనుక... ఎంత కష్టమైనా సరే నటించడానికి నేను రెడీ. నటనకి ప్రాధాన్యం ఉందంటే ఆ పాత్ర గ్లామర్‌గా ఉందా? డీ గ్లామర్‌గా ఉందా? అనే విషయాల్ని అస్సలు పట్టించుకోను.హీరోయిన్లుగా తెలుగమ్మాయిలకు అవకాశాలు రావనే ప్రచారం ఎందుకు వచ్చిందో తెలియదు. ఆ దుష్ప్రచారాన్నే నిజమని భావించి చాలామంది అమ్మాయిలు ఇండస్ట్రీకి రావడం లేదు. ఎవరైనా సరే, ప్రయత్నిస్తేనే కదా.. అసలు అవకాశం వచ్చేది, రానిది తెలిసేది. నిజానికి ఓపికతో గట్టిగా ప్రయత్నిస్తే అవకాశాలు తలుపు తట్టక మానవు. నా విషయంలో అదే నిజమైంది. కాబట్టి ఇండస్ట్రీలోకి రావాలనుకునేవారికి నేనిచ్చే సలహా కూడా ఇదే అన్నారు.
Latest News