|
|
by Suryaa Desk | Wed, Nov 20, 2024, 07:04 PM
వేములవాడ రాజరాజేశ్వర క్షేత్రం అభివృద్ధికి రేవంత్ సర్కార్ భారీగా నిధులు మంజూరు చేసింది. వేములవాడలో పర్యటనలో ఉన్న సీఎం రేవంత్.. అనేక అభివృద్ధి కార్యక్రమాలకు శ్రీకారం చుట్టారు. ఆలయ అభివృద్ధి పనులకు రూ.127.65 కోట్లు మంజూరు చేశారు. ఆలయ కాంప్లెక్స్ విస్తరణ, భక్తులకు అవసరమైన అధునాతన సదుపాయాలకు రూ.76 కోట్లు కేటాయిస్తూ ఉత్తర్వులు జారీ చేసారు. ఆలయంలో అన్నదాన కేంద్రం ఏర్పాటు చేస్తూ ప్రభుత్వం ఉత్తర్వులు జారీ చేసింది. ఇందుకోసం మున్సిపల్ అడ్మినిస్ట్రేషన్ శాఖ రూ.35.25 కోట్ల నిధులను విడుదల చేసింది. అలాగే ఆలయం నుంచి మూలవాగు బ్రిడ్జి వరకు ఉన్న రోడ్లును వెడల్పు చేసేందు రూ.47.85 కోట్లు మంజూరు చేశారు.
మూలవాగులో ఉన్న బతుకమ్మ తెప్ప నుంచి జగిత్యాల కమాన్ జంక్షన్ వరకు పైప్లైన్ డ్రైనేజీ నిర్మాణానికి రూ.3.8 కోట్లు కేటాయించి పనులకు సీఎం శ్రీకారం చుట్టారు. ఇప్పటికే రాజన్న సిరిసిల్ల జిల్లాలో రూ.26 కోట్లతో ఎస్పీ భవనం నిర్మాణం పూర్తి చేయగా.. రూ.45 లక్షలతో నిర్మించిన జిల్లా గ్రంథాలయ భవనం, రూ.4 కోట్ల 80 లక్షలతో వర్కింగ్ ఉమెన్ హస్టల్ నిర్మాణాలు పూర్తి చేశారు. వేములవాడకు చెందిన 17 కుటుంబాలకు చెందిన వ్యక్తులు గల్ఫ్ దేశాలలో మరణించగా.. ఒక్కో కుటుంబానికి రూ.85 లక్షల పరిహారం అందజేశారు. 631 శివశక్తి మహిళ సంఘాలకు రూ.102 కోట్ల బ్యాంకు లింకేజీ రుణాలు పంపిణి చేశారు. నేతన్నల కోసం రూ.50 కోట్లతో నూలు బ్యాంకును సీఎం రేవంత్ ప్రారంభించనున్నారు.
అంతకు ముందు సీఎం రేవంత్ రాజరాజేశ్వరస్వామిని దర్శించుకొని ప్రత్యేక పూజలు చేశారు. ఆలయ అధికారులు ఆయనకు స్వాగతం పలికారు. దర్శనానంతరం వేదపండితులు ఆశీర్వచనాలిచ్చి తీర్థప్రసాదాలు అందజేశారు. అనంతరం వేములవాడలో నిర్వహించిన వేములవాడ ప్రజా పాలన విజయోత్సవ సభలో పాల్గొని ప్రసంగించారు. ప్రతిపక్ష పార్టీలపై తీవ్ర స్థాయిలో విమర్శలు గుప్పించారు. తాము అభివృద్ధి చేస్తున్నా.. సోషల్ మీడియా వేదికగా.. అసత్య ఆరోపణలు చేస్తున్నారని మండిపడ్డారు.
'కేసీఆర్ రాష్ట్రాన్ని అప్పుల ఊబిలో నెట్టేశారు. కేసీఆర్ అసెంబ్లీకి వస్తే లెక్కలు బయటపెడతాం. ఇది నా సవాల్. మేం రాష్ట్రాన్ని గాడిలో పెడుతున్నాం. వేములవాడ రాజన్నను కూడా కేసీఆర్ మోసం చేశారు. పదేళ్లలో కేసీఆర్ చేయలేని పనులు చేస్తున్నాం. కేటీఆర్, హరీష్ అభివృద్ధిని అడ్డుకుంటున్నారు. రైతు రుణమాఫీపై లేనిపోని ఆరోపణలుృ చేస్తున్నారు. ఎన్నికల్లో ఓడిపోయినా కేసీఆర్‌కు బుద్ది రాలేదు. బీఆర్ఎస్ నేతలకు మైండ్ పోయింది. ఆ పార్టీ నేతలు చిల్లర మాటలు మాట్లాడుతున్నరు. అభివృద్ది కోసం భూసేకరణ చేపడుతుంటే.. అడ్డుపడుతున్నరు. రెండుసార్లు కరీంనగర్ ఎంపీగా పని చేసిన సంజయ్.. నియోజకవర్గానికి ఏం చేయలేదు. కరీంనగర్ అభివృద్ధిపై ఏనాడు మోదీతో మాట్లాడలేదు.' అని రేవంత్ తీవ్రస్థాయిలో ఫైరయ్యారు.
