|
|
by Suryaa Desk | Thu, Jun 05, 2025, 05:49 PM
తెరపై హుందాగా కనిపించే నటి నదియా... నిజ జీవితంలో కుటుంబానికి అత్యంత ప్రాధాన్యత ఇస్తానని స్పష్టం చేశారు. సినిమా తన ప్యాషన్ అయినప్పటికీ, అదే సర్వస్వం కాదని, తన మనసంతా కుటుంబం చుట్టూనే తిరుగుతుందని ఆమె ఒక ఇంటర్వ్యూలో తెలిపారు. వరుసగా సినిమాలు చేయడం కంటే, ప్రతి సినిమాకు మధ్య కొంత విరామం తీసుకుని, కుటుంబంతో గడపడానికి, వ్యక్తిగత జీవితానికి ప్రాముఖ్యత ఇవ్వడానికే తాను ఇష్టపడతానని నదియా వెల్లడించారు."సినిమా నా అభిరుచి మాత్రమే, కానీ అది నా ప్రాధాన్యత కాదు. నా మనసు ఎప్పుడూ నా ఇంటి చుట్టూనే ఉంటుంది" అని నదియా అన్నారు. షూటింగ్ పూర్తయిన వెంటనే, ఫ్లైట్ టైమ్ ఎంతైనా సరే, ఇంటికి పరుగులు తీస్తానని, తన ఇల్లు తనకు ఒక చిన్న గూడు లాంటిదని ఆమె పేర్కొన్నారు. సినిమా నటిగా ఎంత బిజీగా ఉన్నప్పటికీ, ఆ స్టార్డమ్ను తాను ఎప్పుడూ పెద్దగా పట్టించుకోలేదని, అది తన జీవితంలో ఒక బోనస్గా మాత్రమే భావిస్తానని తెలిపారు."నా తల్లిదండ్రులు నన్ను పెంచిన విధానం వల్లనే నేను ఇలా ఉండగలిగాను. మొదటి సినిమాతోనే ప్రజాదరణ పొందినా, ఇది జీవితం కాదని, దీనికి మించి జీవితంలో చాలా ఉందని వాళ్ళు ఎప్పుడూ చెబుతుండేవారు" అని నదియా గుర్తుచేసుకున్నారు. సినిమాల్లోకి రాకముందే తన భర్తతో పరిచయం ఉందని, ఏదో ఒక రోజు ఆయనను వివాహం చేసుకుని స్థిరపడతానని తనకు ముందే తెలుసని ఆమె చెప్పారు.సినిమాల్లో నటించడాన్ని ఒక హాబీగా, 9 నుంచి 5 గంటల ఉద్యోగంలా భావించానని, సెట్లో ఉన్నంతవరకే తాను నటినని, సెట్స్ దిగిన తర్వాత తను నదియా కాదని, తన అసలు పేరు జరీనా అని, ఆ పేరుతో సాధారణ జీవితం గడుపుతానని ఆమె వివరించారు. "నటన నా ఉద్యోగం. సెట్లో నా పాత్రకు వంద శాతం న్యాయం చేస్తాను. కానీ కెమెరా ఆగిపోయాక, నేను జరీనాను. ఈ ద్వంద్వ జీవితాన్ని నేను ఆస్వాదిస్తున్నాను" అని నదియా తెలిపారు.
Latest News