రాత్రి 9 వరకు ఉస్మానియా వర్సిటీ గేట్లు ఓపెన్.. తీరనున్న ట్రాఫిక్ కష్టాలు
|
|
by Suryaa Desk | Tue, Nov 26, 2024, 10:14 PM
హైదరాబాద్ నగరంలో ట్రాఫిక్ రద్దీ రోజు రోజుకూ పెరిగిపోతుంది. ఉదయం, సాయంత్రం వేళల్లో అయితే ట్రాఫిక్‌లో నరకం చూడాల్సిన పరిస్థితి. కొన్ని చోట్ల కిలో మీటర్ల మేర వాహనాలు బారులు తీరుతుంటాయి. తార్నాక, నల్లకుంట ప్రాంతాల్లోనూ ట్రాఫిక్ రద్దీ అధికం. ఈ నేపథ్యంలో ఆయా ప్రాంతాల్లో ట్రాఫిక్ రద్దీకి చెక్ పెట్టేలా.. ఉస్మానియా యూనివర్సిటీ వైస్ వీసీ కుమార్ కీలక నిర్ణయం తీసుకున్నారు. మెయిన్ రోడ్ గేట్లను ఇక నుంచి ప్రతిరోజూ రాత్రి 9 గంటల వరకు తెరిచి ఉంచనున్నట్లు ప్రకటించారు.
గతంలో వర్సటీ గేట్లను రాత్రి 8 గంటలకే మూసేవారు. ఉదయం 8 గంటల నుంచి రాత్రి 8 గంటల వరకు మాత్రమే గేట్లు ఓపెన్ ఉండేవి. దీంతో దీంతో క్యాంపస్ నుంచి బయటకు వెళ్లిన విద్యార్థులు, అద్యాపకులు, సిబ్బంది తిరిగి వచ్చే సమయానికి గేట్లు మూసి ఉంచడంతో తీవ్ర ఇబ్బందులు ఎదుర్కొనేవారు. ఈ విషయం గురించి వీసీ ప్రొఫెసర్ కుమార్ ఇటీవల విద్యార్థులు వినతలు సమర్పించారు. దీంతో సానుకూలంగా స్పందించిన వీసీ రాత్రి 9 గంటల వరకు గేట్లు ఓపెన్ చేసి ఉంచాలని ఉత్తర్వులు జారీ చేశారు.
బయటివ్యక్తులు, బయటి వెహికల్స్ రాకపోకలు పెరిగి క్యాంపస్ వాతావరణానికి విఘాతం కలుగుతోందని మూడేళ్ల క్రితం గేట్లు 8 గంటలకే మూసేయాలని ఆదేశాలిచ్చారు. బయట నుంచి వచ్చే వెహికల్స్ వల్ల క్యాంపస్ విద్యార్థులు, ఉద్యోగులకు ప్రమాదాలు జరుగుతున్నాయని అప్పటి వీసీ ప్రొఫెసర్ రవీందర్ యాదవ్ ఎన్సీసీ గేటుతో పాటు ఓయూ పీఎస్ వద్ద బారికేడ్లు ఏర్పాటు చేయించారు. ఎన్సీసీ గేటును రాత్రి 8 గంటలకు మూసేసి ఉదయం 8 గంటలకు తెరిచేవారు.
అయితే దీనిపై అప్పట్లో విద్యార్థులు ఆందోళన చేపట్టారు. బయటకు వెళ్లినప్పుడు ఆలస్యమైతే విద్యానగర్ మీదుగా తిరిగి రావాల్సి వస్తుందని విన్నవించగా స్పందించలేదు. మూసివేసే సమయాన్ని గంటపాటు పొడిగించాలని కోరినా అప్పటి వీసి పట్టించుకోలేదు. తాజాగా వీసీగా ప్రొఫెసర్ కుమార్ బాధ్యతలు చేపట్టాక విద్యార్థుల కోరిక మేరకు రెండువైపులా గేట్లను రాత్రి 9గంటల వరకు తెరిచి ఉంచేందుకు ఆదేశాలు జారీ చేశారు.
ఈ నిర్ణయంతో తార్నాక, నల్లకుంట, విద్యానగర్ తదితర ప్రాంతాల్లో ట్రాఫిక్ రద్దీ కొంత మేర తగ్గనుంది. రాత్రి 9 గంటల వరకు గేట్లు ఓపెన్ ఉండనుండటంతో ఆయా ప్రాంతాలకు వెళ్లేవారు ఓయూ క్యాంపస్ నుంచి వెళ్లే ఛాన్స్ ఉంది. వీసీ నిర్ణయంపై విద్యార్థులు హర్షం వ్యక్తం చేస్తున్నారు.
