|
|
by Suryaa Desk | Mon, Nov 25, 2024, 07:52 PM
గ్రేటర్ హైదరాబాద్ పరిధిలోని చెరువులు, కుంటలు, ప్రభుత్వ స్థలాలు ఆక్రమించి నిర్మించిన అక్రమ కట్టడాలను హైడ్రా అధికారులు కూల్చేస్తున్న సంగతి తెలుస్తోంది. ఇప్పటికే చెరువులు, కుంటల బఫర్, ఎఫ్టీఎల్ పరిధిని ఆక్రమించి నిర్మించిన వందల కట్టడాలను హైడ్రా కమిషనర్ ఆధ్వర్యంలోని ప్రత్యేక టీం బుల్డోజర్లతో నేలమట్టం చేసింది. ఈ కూల్చివేతలపై భిన్నాభిప్రాయాలు వ్యక్తం అవుతున్నాయి. కొందరు సమర్థిస్తుంటే.. మరికొందరు వ్యతిరేకిస్తున్నారు. పెద్దల ఇండ్లను వదిలేసి పేదల ఇండ్లను మాత్రమే కూల్చుతున్నారని ఆగ్రహం వ్యక్తం చేస్తున్నారు.
ఈ నేపథ్యంలో సాక్షాత్తూ హైడ్రా కమిషనర్ ఏవీ రంగనాథ్ ఉంటున్న ఇల్లు బఫర్ జోన్లో ఉందంటూ తాజాగా సోషల్ మీడియాలో ప్రచారం జరుగుతోంది. యూసుఫ్‌గూడ మధురానగర్‌లోని కృష్ణకాంత్ పార్క్ దగ్గరలోనే హైడ్రా కమిషనర్ ఏవీ రంగనాథ్ ఇల్లు ఉందని అంటున్నారు. అది చెరువు బఫర్ జోన్ పరిధిలోకే వస్తుందని కొందరు పోస్టులు పడుతున్నారు. ప్రస్తుతం కృష్ణకాంత్ పార్కు ఉన్న ప్రాంతం ఒకప్పుడు పెద్ద చెరువు అని కాంగ్రెస్ బహిషృత నేత బక్కా జడ్సన్ వెల్లడించారు. చంద్రబాబు హయాంలో చెరువును పూడ్చేసి పార్కు నిర్మించారని అన్నారు. రంగనాథ్ నివసిస్తున్న ప్రస్తుత ఇల్లు.. పెద్ద చెరువు బఫర్ జోన్‌లోనే ఉందని ఆయన ఆరోపించారు. చెరువు బఫర్ జోన్లో నిర్మించిన ఇంట్లో నివసించడంలేదని రంగనాథ్ నిరూపించుకోగలరా? అంటూ జడ్సన్ సవాల్ విసిరారు.
ఈ ప్రచారంపై హైడ్రా కమిషనర్ ఏవీ రంగనాథ్ స్పందించి క్లారిటీ ఇచ్చారు. తాను నివాసం ఉంటున్న ఇల్లు బఫర్ జోన్లో లేదని ఆయన స్పష్టం చేశారు. తప్పుడు సమాచారంతో కొందరు ప్రజల్ని తప్పుదోవ పట్టిస్తున్నారని మండిపడ్డారు. ఈ మేరకు తన ఇంటికి సంబంధించిన మ్యాప్లను మీడియాకు రిలీజ్చేశారు. మధురానగర్‌లో తన తండ్రి ఏపీవీ సుబ్బయ్య 1980లో ఇంటిని నిర్మించినట్లు తెలిపారు. 44 ఏళ్ల క్రితం నిర్మించిన అదే ఇంట్లో ప్రస్తుతం తన తండ్రితో కలిసి ఉంటున్నట్లు చెప్పారు. కృష్ణాకాంత్ పార్కు ఉన్న స్థలంలో సుమారు 25 సంవత్సరాల క్రితం ఒక చెరువు ఉండేదని చెప్పుకొచ్చారు. చెరువున్నప్పటి నిబంధనల ప్రకారం తమ ఇల్లు కట్టకు ఒక కిలోమీటరు దూరంలోనే ఉందన్నారు.
కృష్ణకాంత్ పార్కు దిగువున ఉన్న వేల ఇండ్ల తర్వాత తమ ఇల్లు ఉంటుందని చెప్పారు. తమ ఇంటికి ఒక కిలోమీటర్ దూరంలో కట్ట మైసమ్మ గుడి ఉందని చెప్పారు. చెరువు కట్ట ఎత్తుపై ఆధారపడి దిగువ భాగంలో 5- 10 మీటర్ల వరకు ఉన్న స్థలాన్ని బఫర్ జోన్‌గా నిర్ణయిస్తారని చెప్పారు. చెరువు కట్టకు దిగువున10 మీటర్లు దాటితే.. కింద ఉన్న నివాసాలు ఇరిగేషన్ నిబంధనల మేరకు బఫర్ జోన్ పరిధిలోకి రావని వెల్లడించారు.
