|
|
by Suryaa Desk | Sat, Nov 23, 2024, 10:00 PM
అడ్డ బొట్టు సాంబ శివునికి ఆ సూర్య భగవానుడు తన సింధూర వర్ణ కిరణాలతో నిలువు తిలకం దిద్దాడు. కార్తీక మాసం వేళ ఈ అరుదైన అద్భుత దృశ్యం.. హైదరాబాద్ జూబ్లీహిల్స్ సమీపంలోని వెంకటగిరిలో ఉన్న శ్రీ వీరాంజనేయ స్వామి ఆలయంలో ఆవిష్కృతమైంది. ఆలయ ప్రాంగణంలో ఉన్న శివుని గుడిలోని లింగంపై సూర్యకిరణాలు సింధూరమై మెరిశాయి. శనివారం (నవంబర్ 23న) రోజున శివునికి అభిషేకం చేస్తున్న సమయంలో సూర్యకిరణాలు నేరుగా శివలింగంపై పడటంతో.. అవి ఆ శివలింగానికి తిలకం దిద్దినట్టుగా కనిపించాయి. ఈ అద్భుత దృశ్యాన్ని అక్కడే ఉన్న భక్తులు ఎంతో ఆసక్తిగా తిలకించారు. ఈ అద్భుత క్షణం ఆ శివయ్య మహిమేనని భావించిన భక్తులు.. శివనామస్మరణతో మనుసులోని కోరికలను ఆయన ముందుంచారు.
అయితే.. ఈ సన్నివేశాన్ని చూసిన భక్తులు.. ఏపీలోని ప్రముఖ పుణ్యక్షేత్రాన్ని స్మరించుకున్నారు. ఏపీలో ప్రసిద్ధ పుణ్యక్షేత్రంగా విలసిల్లుతోన్న.. అరసవల్లి సూర్యనారాయణ స్వామి దేవాలయంలోనూ.. మూలవిరాట్‌ను సూర్యకిరణాలు తాకుతాయని.. అచ్చంగా అలాగే ఈరోజు ఆ శివయ్యను సూర్య కిరణాలు తాకాయని భక్తులు గుర్తు చేసుకున్నారు. సూర్య భగవానుని నుంచి ప్రసరించిన లేలేత కిరణాలు నేరుగా శివలింగాన్ని తాకుతూ తిలకం దిద్దినట్టుగా పడటాన్ని.. ప్రత్యక్షంగా వీక్షించినందుకు.. భక్తులు పరవశించిపోయారు. ఈ సందర్భంగా.. ఆలయం శివనామస్మరణతో మారుమోగింది. స్వామివారికి ప్రత్యేక పూజలు నిర్వహించారు.
ప్రతిరోజూ వీరాంజనేయ స్వామి సన్నిధానంలో ప్రత్యేక పూజలు, భజనలతో స్వామివారిని కొలుస్తున్నామని వివరించిన అయ్యప్పస్వాములు.. ఈరోజు ఇలాంటి అద్భుత క్షణాలను దర్శించుకోవటం ఎంతో సంతోషంగా ఉందని పులకించిపోయారు. ఉదయం 6 గంటల 35 నిమిషాలకు ఈ అద్భుతం ఆవిష్కృతమైందని.. కొన్ని నిమిషాల పాటు సూర్యకిరణాలు లింగంపై ప్రసరించాయని వివరించారు. ఇది కచ్చితంగా ఆ భగవంతుని మహిమేనని.. ఇంత మహిమ గలిగిన ఆలయంలో పూజలు చేస్తున్నందుకు స్వామివారి కృపకు ధన్యులమంటూ చెప్పుకొచ్చారు.
అయితే.. చాలా ఆలయాల్లో సూర్యుని నుంచి ప్రసరించే కిరణాలు మూల విరాట్ మీద పడేలా డిజైన్ చేస్తుంటారు. ఇటీవలే నిర్మించిన అయోధ్య రామమందిరంలో కూడా ఇలాంటి నిర్మాణమే చేశారు. ఏడాది మొత్తంగా ఒక్క రోజు.. సూర్య కిరణాలు మూల విరాట్‌పై పడేలా.. అవి కూడా అచ్చంగా రామునికి తిలకం దిద్దినట్టుగా పడేలా ప్రత్యేకంగా డిజైన్ చేశారు. కాగా.. ఇటీవలే ఆ అద్భుత సన్నివేశం కూడా ఆవిష్కృతమైంది కూడా. ఆ సన్నివేశాన్ని చూసి రామభక్తులు పులకించిపోయారు. అందుకు సంబంధించిన వీడియోలు ఫోటోలు సోషల్ మీడియాలో వైరల్ అయ్యాయి కూడా.
